Efezyen 1 - Labib An Kreol Seselwa

Konpliman

¹ Sa let i sorti kot Pol, en zapot Zezi-Kri, par lavolonte Bondye. Pour bann kretyen ki dan Efez e ki fidel dan Zezi-Kri:

² Bondye, nou Papa, e Senyer Zezi-Kri i donn zot lagras ek lape.

Benediksyon ki Bondye I Donn Nou par Zezi-Kri

³ Nou loue Bondye, Papa nou Senyer Zezi-Kri. Ini avek Kris, i'n beni nou par akord nou toudsort benediksyon spirityel dan lesyel.

⁴ Avan ki i ti'n kree lemonn, Bondye ti swazir nou davans, par Zezi-Kri, koman son bann zanfan adoptif, pour ki nou sen e san repros devan li.

⁵ Dan son lanmour, Bondye ti'n deside davans pour fer nou vin son bann garson atraver Zezi-Kri. Sanmenm sa ki i'n oule dan son bonte.

⁶ Alor, annou loue Bondye pour son lagras, pour donn nou gratwitman sa kado, dan son Garson byenneme.

⁷ Annefe, par disan Zezi-Kri, nou'n ganny sove, e par larises son lagras, nou bann pese in ganny pardonnen.

⁸ Avek sazes ek lentelizans, i'n donn nou tousala annabondans.

⁹ I'n fer nou konn son plan sekre dapre ki dan son bonte, i ti'n deside pour akonpli davans, par Kris.

¹⁰ Sa plan ki pou ganny egzekite dan letan lafen, pour reini tou keksoz ki dan lesyel e lo later, anba en sel sef: Kris.

¹¹ Dan nou linyon avek Kris, nou'n resevwar par ki nou ti'n ganny promet. Annefe, dapre son plan, Bondye ti'n swazir nou davans, e Bondye i realiz tou, dapre sa ki i'n oule e ki i'n deside.

¹² Nou ki ti bann premye pour met nou lesperans dan Kris, annou loue Bondye dan son grander!

¹³ Zot osi, kan zot ti antann mesaz laverite, Bonn Nouvel ki'n vin sov zot, zot i'n krwar dan Kris. Alor, Bondye in met son mark personnel lo zot kan i ti donn zot Lespri Sen ki i ti'n promet.

¹⁴ Lespri Sen i garanti sa ki'n ganny rezerve pour nou. I asir nou ki nou pou pran posesyon kan nou delivrans ava konplet. Alor, annou loue Bondye dan son laglwar!

Lapriyer Pol

¹⁵ Pour sa rezon, depi ki mon'n antann koz lo zot lafwa dan Senyer Zezi, e lo zot lanmour pour tou bann krwayan,

¹⁶ mon pa zanmen aret remersye Bondye lo zot size. Mon mazin zot dan mon lapriyer.

¹⁷ Mon demann Bondye nou Senyer Zezi-Kri, nou Papa merveye, donn zot Lespri lasazes ki ava revel avek zot e fer zot konn li vreman.

¹⁸ Mon priye pour ki i ouver zot lizye ver lalimyer, pour ki zot konpran sa lesperans ki i'n ofer zot; grander larises sa leritaz merveye ki i'n rezerve pour bann kretyen;

¹⁹ sa pwisans ekstraordiner ki i annan pour nou ki krwar dan li. Sanmenm sa pwisans ki i ti manifeste avek bokou lafors,

²⁰ kan i ti resisit Kris e fer li asiz lo son kote drwat dan lesyel.

²¹ La, Kris in ganny plase par lao tou pouvwar, lotorite, pwisans, dominasyon. In ganny plase par lao tou tit ki egziste pa selman dan lemonn aktyel, me osi dan lemonn lavenir.

²² Bondye in plas tou anba lipye Kris e i'n etabli li koman sef parlao tou, koman sef siprenm.

²³ Legliz i lekor Kris. Kris i totalman prezan dan Legliz; i ranpli liniver antye.