Ebre 4 - Labib An Kreol Seselwa

¹ Bondye in les nou sa promes konmkwa nou pou kapab antre dan son repo ki i'n prepare pour nou. Alor, annou fer byen atansyon ki personn parmi zot pa mank lokazyon antre dan sa repo.

² Annefe, nou'n resevwar mesaz Bonn Nouvel parey zot, me sa mesaz ki zot in tande pa'n servi zot dan nanryen, akoz sa dimoun ki ti antann li pa ti resevwar li avek lafwa.

³ Nou ki krwar, nou pou antre dan sa repo Bondye. I ti deklare: Dan mon lakoler, mon ti fer sa serman: Zot pa pou antre dan sa pei kot mon'n prepar en repo pour zot. I ti dir sa, menm si son travay ti'n fini depi ki i ti kre lemonn.

⁴ Annefe, konsernan setyenm zour, Lekritir i deklare: Setyenm zour, Bondye ti repoze apre tou son travay.

⁵ I dir ankor lo sa menm size: Zot pa pou antre dan mon repo.

⁶ Annefe, bann ki ti premye pour resevwar sa Bonn Nouvel pa ti kapab antre dan sa repo, akoz zot dezobeisans.

⁷ Alor, Bondye i fikse en nouvo zour ki apel: Ozordi. I ti dir sa plizyer lannen plitar par lentermedyer David, kot Lekritir i deklare: Ozordi, si ou antann son lavwa, pa andirsi ou leker.

⁸ Annefe, si Zozye ti'n kondwir pep Izrael dan sa repo, Bondye pa ti ava'n koz plitar, lo en lot zour.

⁹ Sa i vedir ki i annan ankor en repo pour pep Bondye. Sa i setyenm zour.

¹⁰ Annefe, sa enn ki antre dan sa repo Bondye, i repoze avek son travay, parey Bondye ti repoze avek sa ki pour li.

¹¹ Alor, annou fer tou zefor posib pour antre dan sa repo, pour ki personn pa tonbe par dezobeisans, parey nou bann zanset.

¹² Parol Bondye i vivan e pwisan. I pli koupe ki en lepe ki koup de kote. I kapab penetre ziska pli profon nou leker, ziska zwentir ek lanmwel lezo. I kapab ziz tou dezir ek sekre leker imen.

¹³ Napa nanryen dan kreasyon ki kapab reste kasyet devan Bondye. Kreasyon antye i ekspoze devan lizye sa enn avek ki nou bezwen rann kont.

Zezi, Gran-Pret Siprenm

¹⁴ Alor, pandan ki nou annan en Gran-Pret siprenm, Zezi, Garson Bondye ki'n travers lesyel, annou tenir byen for lafwa ki nou proklanmen.

¹⁵ Annefe, nou Gran-Pret i enn ki kapab soufer avek nou dan nou febles. I sa enn ki'n ganny tante dan tou keksoz, parey nou, me san komet okenn pese.

¹⁶ Alor, annou apros avek konfyans devan tronn lagras Bondye, pour ki nou ganny pardonnen e trouv lagras pour ed nou dan bon moman.