Danyel 7 - Labib An Kreol Seselwa

Vizyon Danyel: Kat Bebet

¹ Pandan premye lannen renny Baltazar, lerwa Babilonn, Danyel ti ganny en rev. I ti war en vizyon pandan ki i ti pe dormi lo son lili. I ti ekri sa rev. La sa ki i ti ekri:

² Mwan, Danyel, dan mon vizyon, dan lannwit, mon ti war sa kat divan dan lesyel pe azit sa gran lanmer.

³ Kat gro bebet ti sorti dan lanmer, sakenn diferan avek lot.

⁴ Premye bebet ti parey en lyon. I ti annan lezel leg. Pandan ki mon ti pe gete, i ti ganny arase son bann lezel. I ti ganny leve par lao later e i ti debout lo son de lapat deryer parey en imen, e i ti ganny en lespri imen.

⁵ Apre, ti annan en dezyenm bebet. I ti parey en lours. I ti kabann lo en kote; i ti annan trwa kot dan son lagel, ant son bann ledan. I ti ganny dir: Leve, devor bokou laser!

⁶ Apre sa, mon ti war en trwazyenm bebet. I ti parey en leopar ki ti annan kat lezel zwazo lo son ledo, ek kat latet. I ti resevwar pouvwar pour domin lemonn.

⁷ Apre sa, mon ti kontinyen regard tou sa ki ti dan mon vizyon dan lannwit. Mon ti war en katriyenm bebet. I ti terib e fer per. I ti annan en lafors ekstraordiner. I ti annan bann gran ledan an fer e i ti pe devor tou, kas tou an morso, e kraz anba son lipye tou sa ki reste. I ti diferan avek lezot bebet avan li. I ti annan dis korn.

⁸ Pandan ki mon ti pe egzamin sa bann korn, en pti korn ti pouse parmi lezot pour fer plas pour sa pti korn, trwa parmi lezot korn ti ganny arase. Lo sa korn ti annan lizye, parey lizye imen e en labous ki ti koz avek larogans.

Vizyon Sa Enn ki Vivan pour Touzour

⁹ Pandan ki mon ti kontinyen regarde, bann tronn ti ganny enstale. En Vyeyar ti asiz lo tronn. Son lenz ti blan parey lannez, son seve ti parey lalenn pir. Son tronn ti briye avek laflanm, bann larou tronn ti alimen parey dife.

¹⁰ En larivyer dife ti sorti e koule devan li. Plizyer milyon dimoun ti servi li, e plizyer milyar ti debout devan li. Bann ziz ti pran zot plas, e bann liv ti ganny ouver.

¹¹ Mon ti kontinyen regarde, akoz sa bann parol arogan ki sa korn ti dir. Letan mon ti pe regarde, sa bebet ti ganny touye. Son lekor ti ganny detri e i ti ganny zete dan dife pour brile.

¹² Lezot bebet ti ganny arase zot pouvwar, me zot ti ganny permisyon pour viv ankor en serten letan.

¹³ Dan mon bann vizyon pandan lannwit, mon ti war arive avek bann nyaz dan lesyel, enn ki ti resanble en zonm. I ti apros ver sa Vyeyar; zot ti anmenn li dan son prezans.

¹⁴ I ti resevwar lotorite, loner ek rwayote; tou bann pep, tou bann nasyon, dimoun ki sorti dan tou langaz ti servi li. Son pouvwar pou reste pour touzour. Son renny pa pou zanmen fini. Son rwayonm pa pou zanmen ganny detri.

Lenterpretasyon Vizyon Danyel

¹⁵ Mwan, Danyel, mon ti bokou trouble. Mon lespri ti tourmante par sa bann vizyon.

¹⁶ Mon ti apros enn sa bann personnaz ki ti la, e demann li en leksplikasyon sa bann vizyon. I ti donn mwan lenterpretasyon:

¹⁷ Sa kat gro bebet, i kat lerwa ki pou leve lo later.

¹⁸ Me bann sen ki devan Bondye Toupwisan pou resevwar sa rwayonm e zot pou posed rwayote pour touzour e touzour.

¹⁹ Alor, mon ti anvi ganny leksplikasyon lo sa katriyenm bebet ki ti diferan avek lezot e pli terib, ki ti annan ledan an fer ek grif an bronz. I ti devor e kraz an morso son viktim e pil lo tou sa ki ti reste.

²⁰ Mon ti osi anvi leksplikasyon konsernan sa dis korn lo son latet, sa lot korn ki ti'n pouse, e sa trwa korn ki ti tonbe devan li; sa korn ki ti annan lizye e en labous ki ti koz avek larogans e ki ti paret pli for ki lezot.

²¹ Mon ti war sa korn deklar lager kont bann sen e ti pe ganny laviktwar lo zot,

²² ziska ki sa vyeyar ti vin rann lazistis an faver bann sen ki pour Bondye Toupwisan. Letan ti'n arive pour donn bann sen pouvwar rwayal.

²³ I ti dir mwan: Sa katriyenm bebet, i en katriyenm rwayonm lo later. I pou diferan avek tou lezot rwayonm. I pou devor tou, kraz tou e kas an morso tou sa ki lo later.

²⁴ Sa dis korn, i dis lerwa ki pou leve dan sa rwayonm. En lot lerwa pou leve apre zot. I pou diferan avek sa bann avan, e i pou fer tonbe trwa lerwa.

²⁵ I pou koz kont Bondye Toupwisan. I pou fer soufer bann sen ki pour Bondye Toupwisan, I pou esey sanz bann zour lafet ek lalwa. Bann sen pou ganny livre dan son lanmen pandan en lannen, de lannen, e lanmwatye en lannen.

²⁶ Apre sa, pou ariv ler zizman. I pou ganny arase son pouvwar. I pou ganny konpletman detri e i pou disparet.

²⁷ Rwayote, pouvwar ek grander dan tou bann rwayonm anba lesyel pou ganny donnen dan lanmen pep sen ki pour Bondye Toupwisan. Sa rwayonm pou dire pour touzour, e tou bann pwisans pou servi e obeir li.

²⁸ Mon vizyon i fini la. Me mwan, Danyel, mon lespri ti bokou trouble; mon ti vin pal e mon ti gard sa bann parol dan mon leker.