Danyel 6 - Labib An Kreol Seselwa

Konplo kont Danyel

¹ Dariis ti deside apwent 120 gouverner pour gouvern rwayonm antye.

² I ti met trwa sef ansarz. Danyel ti enn parmi; bann gouverner ti bezwen rann kont avek zot pour fer sir ki lentere lerwa pa ganny afekte.

³ Danyel ti montre li meyer ki sa bann sef ek bann gouverner, akoz ti annan en lespri ekstraordiner dan li. Lerwa ti annan lentansyon met Danyel ansarz rwayonm antye.

⁴ Alor, sa bann sef ek bann gouverner ti rod fason pour akiz Danyel lo size zafer leta. Me, zot pa ti trouv nanryen kont li pour kapab akiz li, ni neglizans, ni okenn fot; i ti en zonm konfyans, san defo.

⁵ Sa bann zonm ti dir: Nou pa pou war nanryen pour fer en lakizasyon kont sa Danyel, amwen ki nou rod enn dan lalwa son Bondye.

⁶ Apre, sa bann sef ek bann gouverner ti depese pour al kot lerwa. Zot ti dir li: Lerwa Dariis! Viv pour touzour!

⁷ Tou bann sef ou rwayonm, bann administrater, bann gouverner, bann konseye, ek bann zofisye, in tonm dakor pour pibliy sa lord: Okenn dimoun, ki pandan 30 zour, i adres lapriyer anver okenn lot bondye oubyen et imen, apard ou, Mazeste, ava ganny zete dan kavern lyon.

⁸ Aprezan, Mazeste, konfirmen e siny sa lord, pour ki personn pa kapab sanze, dapre lalwa bann Med ek bann Pers, ki pa kapab sanze.

⁹ Alor, lerwa Dariis ti siny sa lord.

Danyel dan Kavern Lyon

¹⁰ Kan Danyel ti aprann ki sa lord ti'n ganny sinyen, i ti al dan son lakaz, dan lasanm letaz, kot bann lafnet ki vir ver Zerizalenm. Trwa fwa par zour, i ti met li azenou pour priye e loue son Bondye, parey i ti abitye fer.

¹¹ Sa bann zonm ti vin kot li e zot ti war Danyel ki ti pe priye e fer son siplikasyon devan son Bondye.

¹² Apre, zot ti al kot lerwa e koz avek li konsernan sa lord rwayal, “Eski pa ou ti siny en lord ki okenn dimoun ki adres lapriyer anver okenn lot bondye, oubyen et imen, apard ou Mazeste, pou ganny zete dan kavern lyon?” Lerwa ti reponn, “Sa i vre, dapre lalwa bann Med ek bann Pers, ki personn pa kapab sanze.”

¹³ Alor, zot ti dir lerwa, “Danyel, enn parmi bann egzile sorti Zida, pa'n pran okenn kont lerwa, ni sa lord ki ou'n sinyen. I pe fer son lapriyer trwa fwa par zour.”

¹⁴ Kan lerwa ti antann sa, i ti tourmante. I ti anvi sov Danyel, e ziska soley kouse, i ti fer tou son posib pour sov li.

¹⁵ Bann lennmi Danyel ti al ankor kot lerwa. Zot ti dir li, “Mazeste i konnen ki dapre lalwa bann Med ek Pers, okenn lord e okenn regleman ki lerwa in sinyen, personn pa kapab sanze.”

¹⁶ Alor, lerwa ti ordonnen ki zot anmenn Danyel e zet li dan kavern lyon. Lerwa ti dir avek Danyel, “Ou Bondye, ki ou servi avek perseverans ava delivre ou!”

¹⁷ Zot ti met en ros devan lantre kavern; lerwa ti poz lo la son sele avek son bag personnel e avek bag son bann gran zofisye, pour ki nanryen pa ganny sanze konsernan Danyel.

¹⁸ Apre sa, lerwa ti al dan son pale; i ti reste azen tou lannwit e i pa ti fer apel son bann menazer kot li; i pa ti kapab ganny sonmey.

Danyel I Ganny Sove

¹⁹ Koman lizour ti fer, lerwa ti leve e al kot kavern bann lyon.

²⁰ I ti aprose e avek en lavwa enkyet, i ti kriye, “Danyel, serviter Bondye vivan, eski ou Bondye ki ou servi avek perseverans in kapab delivre ou kont bann lyon?”

²¹ Danyel ti dir lerwa, “Mazeste! Viv pour touzour!

²² Mon Bondye in anvoy son lanz pour ferm lagel bann lyon ki pa'n fer mwan okenn dimal, akoz i'n war mon linosans. Devan ou osi Mazeste, mon pa'n fer nanryen mal.”

²³ Lerwa ti vreman kontan, e i ti ordonnen ki Danyel i ganny tire dan kavern lyon. Alor, Danyel ti ganny tire dan kavern e ti napa okenn blesir lo li, akoz i ti'n met son konfyans dan son Bondye.

²⁴ Lerwa ti ordonnen ki bann ki ti'n akiz Danyel, zot ganny anmennen e ganny zete dan kavern lyon, zot, zot zanfan ek zot fanm. Avan menm ki zot ti ariv dan fon lafos, bann lyon ti sot lo zot e kraz zot bann lezo.

²⁵ Apre sa, lerwa Dariis ti ekri tou bann pep, tou nasyon dan diferan pei e tou langaz atraver later antye: Mon swete ki zot ava ganny en gran lape!

²⁶ Mon ordonnen ki partou dan mon rwayonm, tou dimoun i montre respe ek loner anver Bondye Danyel. Annefe, Bondye i vivan e i viv pour touzour! Son rwayonm pa pou zanmen ganny detri! Son dominasyon pou reste ziska lafen.

²⁷ I delivre e i sove. I akonpli bann siny ek mervey dan lesyel e lo later. I'n delivre Danyel dan grif bann lyon.

²⁸ Alor, Danyel ti prospere pandan renny lerwa Dariis e pandan renny Siris, lerwa Lapers.