Amos 9 - Labib An Kreol Seselwa

Senkyenm Vizyon: Zizman Izrael

¹ Mon ti war SENYER debout kot lotel. I ti dir: Tap kornis bann kolonn e son fondasyon i ganny sekwe! Kraz zot e fer tonm lo zot latet; Mon pou fer masakre sa bann ki reste. Personn pa pou sape; personn pa pou kapab sove.

² Si zot al kasyet parmi bann dimoun mor, mon pou al sers zot. Si zot mont ziska dan lesyel, mon pou fer zot desann.

³ Si zot al kasyet lo montanny Karmel, mon pou al rod zot e atrap zot. Si zot esey al kasyet dan fon lanmer, mon pou ordonn serpan lanmer pour mord zot.

⁴ Si zot bann lennmi i deport zot, mon pou donn lord touy zot. Mon lizye pou reste fikse lo zot, pour zot maler, pa pour zot boner.

Senyer ki Ziz Later

⁵ Senyer, BONDYE liniver i tous later e later i fonn. Tou bann zabitan later i met dey. Later i monte e i desann parey larivyer Nil dan Lezip.

⁶ Bondye in etabli son demer dan lesyel e kouver later avek en twa. I tir delo dan lanmer pour devers li lo later. SENYER i son non.

Senyer I Ziz Rwayonm Izrael

⁷ La sa ki SENYER i deklare: Zabitan Izrael! Pa zot vo otan pour mwan ki bann Etyopyen? Pa mwan ki ti fer Izrael sorti Lezip, bann Filisten sorti Kaftor, ek bann Arameen sorti Kir?

⁸ Lizye Senyer BONDYE pa kit rwayonm Izrael ki koupab. Mon pou fer li disparet lo sirfas later. Me mon pa pou detri bann desandan lafanmir Zakob. SENYER ki deklare.

⁹ Annefe, mon pou donn mon bann lord; mon pou sekwe zabitan Izrael parey ou sekwe legren dan en tanmi, e napa okenn gravye ki pou tonbe.

¹⁰ Bann peser parmi mon pep pou ganny masakre. Menm sa bann ki dir: Maler pa pou ariv kot nou.

Restorasyon Izrael

¹¹ La sa ki SENYER i deklare: Sa zour pe vini kan mon pou rekonstri lavil David ki'n tonm anrin parey en payot. Sa zour la, mon pou repar li, mon pou remet li debout. Mon pou rekonstri li e retourn li parey i ti ete avan.

¹² Alor, pep Izrael ava kapab repran posesyon restan rwayonm Edonm ek tou bann nasyon ki ti ador mwan. SENYER i deklare, ki i pou fer sa.

¹³ La sa ki SENYER i deklare: Sa bann zour pe vini kan, osito apre ki ou'n plante, dible pou ganny rekolte, e rekolt rezen pou swiv zis apre rekolt dible. Alor, diven nouvo pou koule lo montanny e i ava desann dan kolin.

¹⁴ Mon pou fer mon pep Izrael retourn dan son pei. Zot ava rekonstri bann lavil ki'n ganny detri e reste ladan. Zot ava plant pye rezen e zot ava bwar diven. Zot ava kiltiv bann zarden e manz zot fri.

¹⁵ Mon pou retabli mon pep lo son later. Zanmen zot pou ganny derasinen lo sa later ki mon'n donn zot. SENYER zot Bondye ki deklare.