Amos 8 - Labib An Kreol Seselwa

Katriyenm Vizyon: En Pannyen Fri Mir

¹ Senyer BONDYE ti montre mwan en pannyen fri mir dan en vizyon.

² SENYER ti demann mwan, “Amos, ki ou war?” Mon ti reponn “En pannyen fri mir.” Alor, SENYER ti dir mwan: Letan lafen pour mon pep Izrael, in arive. Mon pa pou eparny li.

³ Senyer BONDYE i deklare: Sa zour, bann sanson dan pale, pou vin kantik dey. Pou annan en kantite lanmor. Bann kadav pou ganny zete partou. Partou pou silans.

Kont bann Komersan Voras

⁴ Ekoute, zot ki kraz bann malere, e ki oule detri bann pov dan sa pei.

⁵ Zot dir dan zot menm: I'n ler pour lafet nouvellin fini! Konmsa, nou ava kapab vann nou prodwi. I'n ler pour saba terminen! Konmsa, nou ava kapab ouver nou sak dible. Nou ava diminyen lo mezir, nou ava ogmant pri e fos bann balans.

⁶ Nou ava kapab aste dimoun feb pour larzan e bann ki pov, pour pri en per sandal. Nou ava kapab vann menm restan dible.

⁷ SENYER in fer sa serman par Zakob: Mon pa pou zanmen oubliy zot bann aksyon.

⁸ Pour sa rezon, later pou tranble. Tou bann zabitan pou an dey. Pei antye pour ganny sekwe; i pou leve e desann parey larivyer Nil dan Lezip.

⁹ La sa ki Senyer BONDYE i deklare: Sa zour la, mon pou fer soley kouse midi, e lannwit pou vin lizour lo later.

¹⁰ Mon pour sanz zot lafet an dey, e zot bann sanson an lamantasyon. Mon pou met zot lenz dey e raz zot latet, konmsi lanmor zot sel garson. Sa zour pou en zour tris.

¹¹ La sa ki Senyer BONDYE i deklare: Sa zour pe vini, kan mon pou anvoy lafanmin dan pei. Dimoun pou mor lafen, me pa akoz zot mank manze. Zot pou mor laswaf, me pa akoz zot mank delo. Zot pou lafen, zot pou swaf, pour antann parol SENYER.

¹² Zot pou al partou, en landrwa a en lot: Depi Sid a Was, depi Nor pei a Les, pour zot rod antann parol SENYER. Me zot pa pou trouve.

¹³ Sa zour la, bann zoli zenn fiy ek bann zoli zennzan pou perdi konnesans akoz laswaf.

¹⁴ Serten pou fer serman lo non bann fo bondye Samari. Zot pou dir: Par lavi bondye Dann! Par semen sakre ki al Berseba! Zot pou tonbe e pa pou zanmen releve.