Amos 6 - Labib An Kreol Seselwa

Zizman kont Gaspiyaz bann Ris

¹ Maler lo zot ki viv trankilman dan Siyon, e ki krwar zot an sekirite dan montanny Samari! Zot bann elit parmi bann nasyon, ver ki bann Izraelit i tournen!

² Al lavil Kalne e get sa ki pe pase. Apre, al dan sa gran lavil Hamat, e desann Gat, kot bann Filisten. Eski zot vo plis ki sa bann rwayonm? Eski zot pei i pli gran ki pour ou?

³ Ou krwar ou kapab fer rekile sa zour maler; me ou pe zis apel renny lavyolans.

⁴ Zot pe dormi lo bann lili dekore avek livwar; zot alonze lo bann sofa pour manz bon lavyann mouton sorti dan troupo, ek lavyann zenn toro sorti dan letab.

⁵ Zot sante avek lakonpannyman laarp; parey David, zot envant bann nouvo lenstriman lanmizik.

⁶ Zot bwar diven dan bann gran lakoup; zot parfim zot lekor avek bann pli bon lesans. Me zot pa montre lapenn pour dezas ki menas Izrael.

⁷ Pour sa rezon, zot pou premye pour ganny egzile. Bann parese! Zot pou ganny deporte.

⁸ Senyer BONDYE, par en serman, SENYER, Bondye liniver i deklare: Lorgey pep Izrael i degout mwan; mon deteste lorgey lafanmir Zakob ek son bann pale. Mon pou livre lavil Samari dan lanmen lennmi ek tou sa ki ladan.

⁹ Si i reste dis zonm dan en lakaz, tou pou mor.

¹⁰ Kan en manm lafanmir ava pran en mor pour al brile, i ava demann avek sa ki la si napa personn ankor dan lakaz. Lot ava reponn: Napa personn. Alor, i ava azoute: Reste trankil. Pa mansyonn non SENYER.

¹¹ Annefe, SENYER i donn lord: Kraz bann gran lakaz; met an morso bann pti lakaz.

¹² Eski en seval i galope lo ros? Eski en dimoun i kiltiv lanmer avek son bef? Zot in sanz ladrwatir pour fer li vin en pwazon e fer lazistis vin en keksoz anmer.

¹³ Zot selebre akoz zot laviktwar lo lavil Lodabar, savedir: Pa vo nanryen. Zot dir: Nou ase for pour pran Karnaim, lavil ki reprezant lafors.

¹⁴ Me SENYER Bondye liniver i deklare: Pep Izrael! Mon pou anvoy en larme etranze ki pou fer ou santi son pouvwar. I pou kraz ou depi Lebo-Hamat dan Nor, ziska larivyer Araba dan Sid.