Amos 4 - Labib An Kreol Seselwa

Kont bann Fanm Samari

¹ Bann fanm dan montanny Samari, ki gra parey bann vas Basann, ekout sa parol: Zot ki maltret dimoun ki feb, ki kraz bann pov, e ki dir zot mari anmenn keksoz pour bwar,

² Senyer BONDYE in fer sa serman: Par mon sentete, sa zour pe vini kan zot pou ganny trennen parey pwason ki'n pri dan lanmson.

³ Zot ava sorti, par bann trou dan miray ki drwat devan zot. Zot pou ganny zete an deor lavil dan kote Nor pei. SENYER ki deklare.

⁴ Zabitan Izrael! Al Betel e kontinyen revolte kont mwan. Kontinyen revolte dan Gilgal! Ofer zot bann sakrifis tou le bomaten, e lo trwazyenm zour, anmenn zot bann ladim.

⁵ Ofer lofrann remersiman avek dipen leve. Proklanm bann lofrann, devan pep Izrael! Sanmenm ki zot kontan! Senyer BONDYE ki deklare.

Lavertisman Sorti kot Bondye

⁶ Mwan ki ti anvoy lafanmin dan tou zot lavil. Mon'n anpes bann vilaz ganny manze. Malgre sa, zot pa'n retourn ver mwan. SENYER ki deklare.

⁷ Mon'n anpes lapli tonbe depi trwa mwan avan rekolt. Mon'n fer lapli tonm lo en lavil me pa lo en lot lavil. Lapli in tonm lo en plantasyon me sa enn ki pa'n ganny lapli, in sek.

⁸ Zabitan detrwa lavil in marse pour zot rod delo pour bwar, me zot pa'n pas zot laswaf. Malgre sa, zot pa'n retourn ver mwan. SENYER ki deklare.

⁹ Mon'n anvoy maladi lo zot bann plantasyon. Zot bann zarden, bann plantasyon rezen, ek zot plantasyon zoliv, in ganny devore par senir. Malgre sa, zot pa'n retourn ver mwan. SENYER ki'n deklare.

¹⁰ Mon ti anvoy lepidemi lo zot, parey mon ti anvoy lo Lezip. Mon'n masakre zot bann zennzan dan lager, mon'n les zot bann seval ganny vole. Mon'n fer monte dan zot nennen piyanter lanmor dan zot bann kan. Malgre tousala, zot pa'n retourn ver mwan. SENYER ki'n deklare.

¹¹ Mon'n detri serten parmi zot, parey mon ti detri Sodonm ek Gomor. Bann ki'n sape, ti parey en tizon ki'n ganny tire dan dife. Malgre sa, zot pa'n retourn ver mwan. SENYER ki'n deklare.

¹² Izrael! Pour tou sa bann rezon, ou pou war koman mon pou pini ou. Akoz mon pou egzekit mon desizyon, Izrael, prepar ou, pour ou prezant ou devan ou Bondye.

Senyer, Kreater Liniver

¹³ Bondye i sa enn ki form bann montanny e kree divan. I revel son bann plan avek bann imen. I fer lizour vin lannwit. I mars lo bann oter. Son non: SENYER, Bondye liniver.