Akt de Zapot 7 - Labib An Kreol Seselwa

Diskour Etyenn

¹ Gran-Pret ti demann Etyenn, “Eski sa i vre?”

² Etyenn ti reponn: Mon bann frer e mon bann papa! Ekout mwan. Bondye dan son mazeste ti aparet avek nou zanset Abrahanm, kan i ti pe reste dan Mezopotami, avan ki i ti al reste Harann.

³ I ti dir li: Kit ou pei ek ou fanmir e al dan sa pei ki mon pou montre ou.

⁴ Alor, Abrahanm ti kit pei bann Kaldeen e i ti al reste Harann. Apre lanmor son papa, Bondye ti fer li sorti Harann pour vin reste la kot zot pe reste ozordi.

⁵ Bondye pa ti donn li okenn propriyete, pa menm en pti morso later pour met son lipye, me i ti promet pour donn li ek son desandans, sa pei. Kan Bondye ti fer sa promes, Abrahanm ti napa zanfan.

⁶ La sa ki Bondye ti dir li: Ou desandans pou viv dan en pei etranze, koman lesklav e zot pou ganny maltrete pandan 400 an.

⁷ Me mon pou pas mon zizman lo sa nasyon ki'n fer zot lesklav. Apre, zot pou kit sa pei e zot pou vin ador mwan isi dan sa pei.

⁸ Bondye ti fer en lalyans avek Abrahanm e donn li sirkonsizyon koman en siny. Alor, Abrahanm ti sirkonsi son garson Izaak, wityenm zour apre son nesans. Izaak ti fer parey: I ti sirkonsi Zakob, e Zakob ti sirkonsi nou douz patriars.

⁹ Nou bann patriars ti zalou Zozef, e zot ti vann li koman lesklav pour ganny anmennen Lezip. Me Bondye ti avek li.

¹⁰ I ti delivre li dan tou son bann difikilte. Bondye ti fer Zozef ganny faver Faraon, lerwa Lezip, ki ti etabli li koman gouverner Lezip ek son pale.

¹¹ Plitar, ti annan en gran lafanmin dan pei Lezip antye ek pei Kanaan ki ti fer nou bann zanset soufer en kantite. Zot pa ti ganny nanryen pour manze.

¹² Kan Zakob ti tande ki ti annan dible Lezip, i ti anvoy nou bann zanset pour en premye fwa.

¹³ Kan zot ti al dezyenm fwa, Zozef ti fer son bann frer konn li, e konmsa, Faraon ti konn bann fanmir Zozef.

¹⁴ Alor, Zozef ti anvoy sers son papa Zakob ek tou son fanmir; ti annan an tou, 75 dimoun.

¹⁵ Zakob ti al reste Lezip kot i ti mor, e kot nou bann zanset osi ti mor.

¹⁶ Zot lekor ti ganny transporte Sikenm e ganny antere dan en latonm ki Abrahanm ti'n aste pour en sonm larzan avek bann garson Hamor.

¹⁷ Kan letan ti pros pour Bondye realiz son promes ki i ti'n fer avek Abrahanm, nou pep ti'n ogmante e vin nonbre dan Lezip.

¹⁸ Dan sa letan, ti annan en nouvo lerwa Lezip ki pa ti'n konn Zozef.

¹⁹ Sa lerwa ti tronp nou pep, maltret nou zanset e obliz zot abandonn zot bann pti baba e les zot mor.

²⁰ Se dan sanmenm sa lepok ki Moiz ti ne. Moiz ti en zoli baba ki Bondye ti kontan. I ti ganny sonnyen pandan trwa mwan dan lakaz son papa.

²¹ Kan i ti ganny abandonnen, fiy Faraon ti ranmas li, e sonny li koman son prop garson.

²² Alor, Moiz ti ganny edike dan tou sa ki bann Ezipsyen ti devre konnen. I ti vin en zonm byen enportan, par parol koman par aksyon.

²³ Kan Moiz ti ganny 40 an, i ti deside pour al war son bann frer Izraelit.

²⁴ Kan i ti war en Ezipsyen pe maltret enn parmi zot, i ti pran defans sa zonm ki ti pe ganny maltrete. Pour vanze, i ti touy sa Ezipsyen.

²⁵ I ti mazinen ki son bann frer Izraelit ti ava konpran ki Bondye ti pou servi li pour delivre zot; me zot pa ti konpran.

²⁶ Lannmen, Moiz ti war de Izraelit pe lager e i ti oule met lape ant zot. I ti dir zot: Mon bann zanmi! Zot frer, akoz zot pe maltret kanmarad?

²⁷ Me sa enn ki ti pe fer ditor son kanmarad ti pous Moiz. I ti dir li: Lekel ki'n etabli ou koman nou sef e ziz?

²⁸ Eski ou oule touy mwan parey ou ti touy sa Ezipsyen yer?

²⁹ Kan Moiz ti antann sa bann parol, i ti sove e i ti al viv dan pei Madyann, la kot i ti ganny de garson.

³⁰ Anviron 40 an plitar, dan dezer pre avek Montanny Sinai, en lanz ti aparet avek Moiz dan laflanm en zarbis ki ti pe brile.

³¹ Moiz ti etonnen ler i ti war en tel vizyon. I ti al pli pre pour gete, e i ti antann lavwa Senyer ki ti dir:

³² Mwan Bondye ou bann zanset, Bondye Abrahanm, Izaak ek Zakob! Moiz ti konmans tranble e i pa ti oze gete.

³³ Senyer ti dir li: Tir ou sandal, akoz landrwa kot ou pe debout i sen.

³⁴ Mon'n war soufrans mon pep dan Lezip. Mon'n antann zot soupir e mon'n desann pour delivre zot. Vini! Aprezan, mon pou anvoy ou Lezip.

³⁵ Sa Moiz ki bann Izraelit ti rezete, kan zot ti dir li: Lekel ki'n etabli ou koman sef e ziz? Bondye ti anvoy li koman sef e liberater, par lentermedyer sa lanz ki ti aparet avek li dan sa zarbis.

³⁶ Pour li fer bann Izraelit sorti Lezip, Moiz ti fer serten siny ek mirak dan sa pei, dan lanmer Rouz e pandan 40 an dan dezer.

³⁷ Se sa menm Moiz ki ti dir avek bann Izraelit: Bondye pou anvoy zot en profet parey mwan, ki pou sorti parmi zot prop pep.

³⁸ Li menm ki ti la avek pep Izrael ki ti'n rasanble dan dezer. I ti la avek nou bann zanset e avek lanz ki ti koz avek li lo montanny Sinai. I ti resevwar bann parol lavi pour transmet avek nou.

³⁹ Nou bann zanset ti refize obei li. Zot ti rezet li, e dan zot leker, zot ti oule retourn Lezip.

⁴⁰ Alor, zot ti dir avek Aaron: Fer bann bondye pour nou, ki pou mars devan nou. Nou pa konnen ki'n devenir avek sa Moiz ki'n tir nou Lezip.

⁴¹ Alor, zot ti fabrik en zenn toro; zot ti ofer li sakrifis; e zot ti fete, selebre avek sa ki zot prop lanmen ti'n fabrike.

⁴² Me Bondye ti tourn ledo kont zot, e les zot ador bann zetwal dan lesyel, parey in ekri dan liv bann profet: Pep Izrael! Eski pour mwan ki zot ti ofer bann sakrifis lape ek sakrifis konplet, pandan 40 an dan dezer?

⁴³ Zot ti anmenn latant Molek, zot Bondye, ek zetwal zot bondye Refann, sa bann zidol ki zot ti fer pour adore. Pour sa rezon, mon pou deport zot lo lot kote Babilonn.

⁴⁴ Nou bann zanset ti annan Latant Temwannyaz avek zot dan dezer. Sa Latant ti'n ganny fer egzakteman parey Bondye ti'n ordonn Moiz. Annefe, Bondye ti'n dir Moiz reprodwir sa model ki i ti'n war.

⁴⁵ Sa Latant ti ganny transmet avek nou bann zanset ki ti vin apre. Plitar, zot ti anmenn li avek zot, kan avek Zozye, zot ti pran pei bann nasyon ki Bondye ti fer disparet devan zot. Sa Latant ti reste ziska lepok David,

⁴⁶ ki ti'n resevwar faver Bondye. I ti demann permisyon pour fer en lakaz pour Bondye Zakob.

⁴⁷ Me se Salomon ki ti fer en lakaz pour Bondye.

⁴⁸ Me parey profet i deklare, Bondye ki dan lesyel, pa reste dan lakaz konstri par zonm:

⁴⁹ Lesyel i mon tronn, Senyer i deklare. Later i marspye anba mon lipye. Ki kalite lakaz ou kapab konstri pour mwan? Kote mon pou kapab repoze?

⁵⁰ Pa mwan menm ki'n kree tousala?

⁵¹ Zot bann zonm antete; zot leker ek zot zorey pa'n ganny sirkonsi. Zot fermen avek mesaz Bondye. Zot touzour pe reziste Lespri Sen. Zot parey zot bann zanset.

⁵² Lekel profet ki zot bann zanset pa'n persekite? Zot in touy tou bann ki'n anons larive sa enn ki Zis. Aprezan, li menm ki zot in trai e ki zot in touye.

⁵³ Zot ki'n resevwar Lalwa Bondye par lentermedyer bann lanz, zot pa'n obei sa Lalwa.

Lanmor Etyenn

⁵⁴ Kan zot ti antann sa bann parol, bann manm Konsey ti pran en gran lakoler, e zot ti grens zot ledan kont Etyenn.

⁵⁵ Me ranpli avek Lespri Sen, Etyenn ti lev lizye e fikse lesyel. I ti war mazeste Bondye, avek Zezi pe debout lo kote drwat Bondye.

⁵⁶ I ti dir, “Mon war lesyel ouver, e Fis-de-Lonm pe debout lo kote drwat Bondye.”

⁵⁷ Alor, zot ti konmans kriye; zot ti bous zot zorey e zot tou ansanm, zot ti sot lo li.

⁵⁸ Zot ti trenn li an deor lavil e konmans saboul li avek ros pour touy li. Bann temwen ti kit zot lenz pour veye, avek en zennonm ki ti apel Sol.

⁵⁹ Pandan ki i ti pe ganny saboule, Etyenn ti fer sa lapriyer, “Senyer Zezi! Resevwar mon lespri!”

⁶⁰ I ti tonm azenou e kriye avek en lavwa for, “Senyer! Pardonn zot pour sa pese!” Apre sa bann parol, Etyenn ti mor.