Akt de Zapot 3 - Labib An Kreol Seselwa

Pyer ek Zan I Geri En Zonm Paralize

¹ En zour, Pyer ek Zan ti pe al dan Tanp 3 er apremidi pour lapriyer.

² Kot lantre Tanp ki zot ti apel, Zoli Laport, en zonm paralize depi son nesans, ti pe ganny anmennen. Tou le zour, i ti ganny depoze la pour li demann lomonn avek dimoun ki antre dan Tanp.

³ Kan sa zonm ti war Pyer ek Zan pe antre, i ti demann zot en lomonn.

⁴ Pyer ek Zan ti fikse li e Pyer ti dir li, “Get nou!”

⁵ Sa zonm ti fikse zot, esperan ki i ti pou ganny keksoz.

⁶ Me Pyer ti dir li, “Mon napa ni larzan ni lor, me sa ki mon annan, mon ava donn ou: Lo non Zezi-Kri sa Nazareen, mon ordonn ou: Leve, marse!”

⁷ Pyer ti atrap li par son lanmen drwat e fer li leve. Toudswit, lipye ek sevir sa zonm paralize ti vin for.

⁸ I ti sot debout, e konmans marse. I ti antre dan Tanp avek sa de zapot, an marsan, an sotan e an remersyan Bondye.

⁹ Tou dimoun ki ti la dan lafoul ti war li pe marse e pe remersye Bondye.

¹⁰ Kan zot ti rekonnet li koman sa mandyan ki ti abitye asiz dan sa lantre Tanp ki ti apel Zoli Laport, zot tou, zot ti ranpli avek ladmirasyon ek letonnman pour sa ki ti'n ariv li.

Diskour Pyer dan Tanp

¹¹ Akoz sa zonm pa ti kit Pyer ek Zan, bann dimoun ti dan gran letonnman. Zot ti tay kot Pyer ek Zan dan Arkad Salomon.

¹² Kan Pyer ti war sa, i ti dir avek lafoul, “Mon bann frer Izraelit! Akoz zot etonnen konmsa par sa gerizon? Akoz zot get nou konmsa, konmsi nou ki'n fer marse sa zonm par nou prop pouvwar, oubyen nou prop merit?

¹³ Bondye Abrahanm, Izaak ek Zakob, Bondye tou nou bann zanset, in montre mazeste son serviter Zezi-Kri, ki zot ti livre avek lotorite, e renye devan Pilat, ki pourtan ti'n deside larg li.

¹⁴ Zot in renye sa enn ki sen e zis, e zot in prefere demann Pilat pour donn laliberte en kriminel.

¹⁵ Konmsa ki zot i'n met anmor sa enn, ki li menm sours lavi. Me Bondye in resisit li, e nou, nou la koman temwen.

¹⁶ Se par lafwa dan non Zezi-Kri, e gras a sa non, ki sa zonm ki zot konnen e ki zot war, in reganny lafors. Parey zot tou zot kapab konstate, se lafwa dan Zezi, ki'n donn sa zonm gerizon konplet.

¹⁷ Sepandan, mon bann frer! Mon konnen ki zot ek zot bann sef, zot in azir par linyorans.

¹⁸ Me Bondye in fer realize sa ki depi lontan i ti'n anonse par labous tou son bann profet, ki son Mesi pou soufer.

¹⁹ Donk, sanz zot mannyer viv e retourn ver Bondye pour ki i pardonn zot, zot pese.

²⁰ Alor, Senyer ava donn zot letan pour renouvle zot lafors spirityel e i ava anvoy sa enn ki davans in swazir pour zot: Zezi, ki li menm Kris.

²¹ Pour lemoman, Zezi-Kri i bezwen reste dan lesyel ziska letan i arive pour renouvle tou keksoz, parey Bondye in anonse depi lontan par bann profet ki pour Bondye.

²² Annefe, Moiz ti dir: Senyer, zot Bondye pou anvoy zot en profet parey mwan, ki pour sorti parmi zot prop pep. Zot ava ekout tou sa ki i dir zot.

²³ Tou dimoun ki pa ekout sa profet pou ganny rezete parmi pep Bondye e ganny detri.

²⁴ Tou bann profet ki'n koze depi letan Samyel ziska ozordi, enn apre lot, in anons sa ki pe arive ozordi.

²⁵ Sa promes ki Bondye ti fer par bann profet i pour zot. Zot annan par dan sa lalyans ki Bondye ti fer avek zot bann zanset, kan i ti dir avek Abrahanm: Mon pou beni tou pep later atraver ou desandan.

²⁶ Alor, Bondye in swazir e anvoy son serviter kot zot an premye. I'n anvoy li pou beni zot e fer zot tou abandonn zot move fason viv.”