3 Zan 1 - Labib An Kreol Seselwa

¹ Sa let i sorti kot Ansyen, pour mon zanmi, Gayis, ki mon kontan dan laverite.

² Mon zanmi! Mon swete ki tou i al byen pour ou, ki ou an bonn sante fizik e spirityel.

³ Mon ti byen kontan kan bann frer ti arive e rann temwannyaz lo laverite ki dan ou lavi, e fason ki ou pe viv dan laverite.

⁴ Napa nanryen ki rann mwan pli ere, kan mon aprann ki mon bann zanfan pe viv dan laverite.

⁵ Mon zanmi! Kan ou rann servis bann frer, sirtou bann etranze, ou pe azir dapre ou lafwa.

⁶ Zot in rann temwannyaz devan kominote nou Legliz, konsernan ou lanmour. I ava byen si ou ed zot dan zot vwayaz dan en fason ki fer plezir Bondye.

⁷ Annefe, se pour non Senyer ki zot pe fer sa vwayaz, san resevwar okenn led sorti kot bann ki pa konn Bondye.

⁸ Nou devre donk ed bann zonm parey, pour ki nou osi, nou partisip koman kolaborater laverite.

Konplent kont Dyotref ek Demetriis

⁹ Mon'n ekri en pti let Legliz; me Dyotref ki kontan plas sef, pa aksepte mon lotorite.

¹⁰ Pour sa rezon, kan mon vini, mon pou denons tou sa ki i pe fer, bann parol mesanste ek mansonz ki i pe dir lo mwan. Konmsi sa pa ase, i refize resevwar bann krwayan. I anpes dimoun ki oule akey zot e i menase pous zot dan Legliz.

¹¹ Mon zanmi! Pa imit sa ki mal, me imit plito sa ki byen. Sa enn ki pratik sa ki byen, i pour Bondye. Sa enn ki fer sa ki mal, pa konn Bondye.

¹² Tou dimoun i dir dibyen lo Demetriis. Laverite i temwanny dan son faver. Nou osi, nou rann en bon temwannyaz e ou konnen ki nou temwannyaz i vre.

¹³ Mon ti annan bokou keksoz pour ekri, me mon pa oule fer li avek plim ek lank.

¹⁴ Mon espere war ou byento, e nou ava koz fas a fas.

¹⁵ Mon swete ki lape ava reste avek ou. Ou bann zanmi i fer ou salanm. Ou osi, fer salanm tou nou bann zanmi.