2 Zan 1 - Labib An Kreol Seselwa

¹ Sa let i sorti kot Ansyen, pour sa gran Madanm, swazi par Bondye ek son bann zanfan, ki mon kontan bokou dan laverite. Pa zis mwan ki kontan ou, me osi tou bann ki konn laverite.

² Sa laverite i dan nou, e i pou reste avek nou pour touzour.

³ Mon demande ki Bondye nou Papa ek Zezi-Kri, Garson son Papa, ava donn nou son lagras, pardon ek lape, dan laverite ek lanmour.

Laverite ek Lanmour

⁴ I ti en gran lazwa pour mwan trouv en pe ou bann zanfan pe viv dan laverite, parey nou Papa in ordonn nou.

⁵ Aprezan, Madanm! La sa ki mon demann ou: Kontan kanmarad. Sa pa en nouvo komannman ki mon pe ekri; me sa enn ki nou'n resevwar depi o konmansman.

⁶ Sa lanmour, se ki nou viv dapre bann komannman Bondye. Sanmenm sa komannman dan lekel nou devre viv, parey nou'n tande depi o konmansman.

⁷ Annefe, bokou manter in fannen partou dan lemonn, bann dimoun ki pa aksepte ki Zezi-Kri in vin koman en zonm vreman. En tel dimoun, i en manter e Ladverser Kris.

⁸ Alor, fer byen atansyon ki zot pa perdi bann fri zot travay, me ki zot resevwar en rekonpans konplet.

⁹ Sa enn ki pa gard lansennyman Kris, me ki azout keksoz avek, i pa an kominyon avek Bondye. Sa enn ki gard lansennyman Bondye, i an kominyon avek Bondye Papa e avek son Garson.

¹⁰ Si en dimoun i vin kot ou avek en lot lansennyman, pa resevwar li se ou, e refize menm dir li bonzour.

¹¹ Annefe, sa enn ki dir li bonzour i partisip dan son bann move aktivite.

¹² Mon ti ava annan ankor bokou keksoz pour dir zot. Me mon prefere pa fer li avek papye ek lank. Mon espere vin war zot e koz avek zot personnelman, pour ki nou lazwa i konplet.

¹³ Bann zanfan ou ser, ki'n ganny swazi par Bondye, i fer zot tou salanm.