2 Timote 4 - Labib An Kreol Seselwa

¹ Mon demann ou solannelman devan Bondye e devan Zezi-Kri ki pou ziz bann vivan ek bann mor; mon demann ou lo non retour Zezi-Kri e lo non son Renny:

² Proklanm Laparol, ensiste dan tou sirkonstans ki prezante, favorab ou non; konvenk dimoun, reprimann zot, ankouraz zot, ansenny zot avek bokou pasyans.

³ Annefe, en letan pe vini, kan dimoun pou nepli siport lansennyman laverite; me zot pou swiv zot prop dezir. Zot pou rasanble en kantite ansennyan otour zot pour dir zot sa ki zot zorey i oule tande.

⁴ Zot pou nepli oule ekout laverite, me zot pou prefer bann fab.

⁵ Me ou, kontrol ou dan tou sirkonstans; siport lasoufrans, fer ou travay koman predikater Bonn Nouvel, e ranpli ou devwar dan servis Bondye.

⁶ Kanta mwan, ler in arive pour mwan ganny ofer an sakrifis; ler mon depar in arive.

⁷ Mon'n konbat en bon konba, mon'n fini sa lakours, mon'n gard lafwa.

⁸ Dezormen, kouronn lazistis in ganny rezerve pour mwan, sa enn ki Senyer ki ziz avek lazistis pou donn mwan sa zour; pa zis mwan, me osi tou bann ki'n esper war son retour.

Remark Personnel

⁹ Fer tou ou posib vin rezwenn mwan pli vit,

¹⁰ akoz Demas in abandonn mwan, e i'n al Tesalonik. I pli kontan sa lemonn prezan. Kresans in al Galasi e Tit i'n al Dalmasi.

¹¹ Zis Lik tousel ki la avek mwan. Anmenn Mark avek ou, akoz in ed mwan dan mon minister.

¹² Mon'n anvoy Tisik Efez.

¹³ Kan ou vini, anmenn sa lenz ki mon ti kit Troas kot Karpis. Anmenn osi mon bann liv, sirtou bann roulo dokiman.

¹⁴ Aleksann, sa forzron, in fer mwan bokou ditor. Senyer ki pou rann li sa ki i merite.

¹⁵ Ou osi, fer li byen atansyon, akoz in konteste bokou mesaz ki nou'n anonse.

¹⁶ Personn pa ti asiste mwan kan mon ti prezant mon premye defans; me tou dimoun ti abandonn mwan. Mon demande ki Senyer pa gard sa kont zot.

¹⁷ Me Senyer in ed mwan e i'n fortifye mwan. Konmsa, mon'n kapab anons son mesaz e fer tou bann nasyon tande e ganny delivre dan lagel lyon.

¹⁸ Senyer pou delivre mwan dan tou latak visye. I pou sov mwan pour son rwayonm dan lesyel. Laglwar i pour Bondye pour touzour e touzour! Amenn.

Konpliman

¹⁹ Fer salanm Prisil ek Akila, osi lafanmir Onezifor.

²⁰ Erast in reste Korent e mon ti kit Trofim, akoz i ti malad Mile.

²¹ Fer mannyer ariv avan liver. Ebilis, Pidans, Linis, Klodya ek tou lezot bann frer i fer ou salanm.

²² Mon demande ki Senyer ava avek ou lespri! Ki son lagras ava avek zot tou!