2 Tesalonisyen 2 - Labib An Kreol Seselwa

Revolt Final

¹ Mon bann frer ek ser! Pour sa ki konsern retour nou Senyer Zezi-Kri ek nou rasanbleman avek li, mon sipliy zot:

² Pa les zot lespri trouble fasilman ni alarme, si en dimoun i vin anonse ki zour Senyer in arive. Pa krwar li, menm si i pretann ki en profesi, en deklarasyon oubyen en let i sorti kot nou.

³ Pa les personn tronp zot dan okenn fason. Sa zour pa pou arive avan ki sa gran revolt kont Bondye i arive e sa gran rebel i ganny revele. Avan ki sa lennmi ki'n ganny destinen pour destriksyon, i aparet.

⁴ Li menm sa lennmi ki pou kont tou sa ki zonm i adore, e ki'n ganny konsakre pour Bondye. I pou menm enstal li dan Tanp Bondye e fer li pas pour Bondye.

⁵ Zot ava rapel ki mon ti koz lo la, kan mon ti ankor avek zot.

⁶ Aprezan, zot konnen kwa ki pe retenir li. Alor, I pou aparet kan son letan pou arive.

⁷ Annefe, sa pwisans move i deza pe travay an sekre. Me sa bann levennman pou arive selman kan sa enn ki pe retenir li ava les li fer.

⁸ Alor, sa pwisans move pou aparet. Senyer Zezi pou touy li par souf sorti dan son labous. I pou detri li par manifestasyon son retour.

⁹ Sa pwisans move pou azir avek pwisans Satan. I pou fer toudsort mirak ek bann siny ekstraordiner pour tronp dimoun.

¹⁰ I pou servi tou kalite move aksyon pour tronp sa bann ki pou ganny detri akoz zot pa'n akey, ni kontan laverite ki ti ava'n sov zot.

¹¹ Pour sa rezon, Bondye i anvoy lo zot en pwisans ki pous zot pour fer zot krwar dan mansonz.

¹² Alor, tou bann ki pa'n krwar laverite, me ki'n pran plezir dan sa ki mal, pou ganny kondannen.

¹³ Kanta nou, frer ek ser! Nou devre toultan remersye Bondye pour zot, ki Senyer i kontan. Annefe, Bondye in swazir zot an premye pour li sov zot, par Lespri ki rann zot lavi sen, e gras a zot lafwa dan laverite.

¹⁴ Se pour sa osi ki Bondye in apel zot par Bonn Nouvel ki nou'n anonse, pour ki zot annan par dan laglwar nou Senyer Zezi-Kri.

¹⁵ Alor, mon bann frer ek ser! Reste solid e gard byen bann lansennyman ki nou'n transmet zot, swa par parol oubyen par let.

¹⁶ Mon demande ki nou Senyer Zezi-Kri li menm, e Bondye, nou Papa ki'n kontan nou, e ki, par son lagras, i donn nou en lankourazman eternel ek en bon lesperans,

¹⁷ i ranpli zot leker avek kouraz; ki i donn zot lafors pour touzour pratik sa ki byen, par aksyon e an parol.