2 Samyel 9 - Labib An Kreol Seselwa

David ek Mefi-Boset

¹ David ti demande: Eski napa personn ki reste dan lafanmir Sail, pour ki mon azir avek bonte pour li, akoz Zonatan?

² Dan lafanmir Sail ti annan en serviter ki ti apel Siba, e zot ti anmenn li devan David. David ti demann li, “Ou menm Siba?” I ti reponn, “Wi, mwan menm.”

³ Lerwa ti demande, “Eski napa personn ki reste dan lafanmir Sail, pour mwan montre labonte Bondye anver li?” Siba ti dir lerwa, “I reste ankor en garson Zonatan; son lazanm i paralize.”

⁴ Lerwa ti demann li, “Kote i ete?” Siba ti reponn, “I reste Lo-Debar kot Makir, garson Amyel.”

⁵ Alor lerwa David ti anvoy sers Lo-Debar, kot Makir, garson Amyel.

⁶ Ler Mefi-Boset, garson Zonatan, garson Sail ti ariv kot David, i ti tonm ater e prosternen devan lerwa. David ti demann li, “Ou menm Mefi-Boset?” I ti reponn, “Wi! Mon la pour servi ou.”

⁷ David ti dir li, “Pa per; mon pou azir bon anver ou akoz ou papa Zonatan, e mon pou rann ou tou later ou papa Sail. An plis, ou pou manz avek mwan tou le zour.”

⁸ Mefi-Boset ti prosternen, an dizan, “Pour ki rezon ou bezwen pran ka en pov lisyen koman mwan?”

⁹ Alor lerwa ti apel Siba, serviter Sail. I ti dir li, “Mon donn garson ou met, ek son fanmir antye, tou sa ki ti pour Sail, son garson.

¹⁰ Ou, avek ou bann garson ek ou bann serviter, zot ava travay later pour li, fer bann rekolt, pour ki garson ou met i annan dekwa manze. Mefi-Boset, garson ou met, pou touzour manz avek mwan.” Siba, ti annan 15 garson ek 20 serviter.

¹¹ Alor Siba ti dir lerwa, “Mon pou fer tou parey mon rwa, mon senyer in ordonnen.” David ti'n dir: Mefi-Boset pou manz avek mwan, parey enn bann garson lerwa.

¹² Mefi-Boset ti annan en zenn garson, ki ti apel Mise. Tou sa ki ti reste kot Siba, ti vin serviter Mefi-Boset.

¹³ Mefi-Boset ti reste Zerizalenm, akoz i ti touzour manz avek lerwa. I ti paralize tou le de lazanm.