2 Samyel 7 - Labib An Kreol Seselwa

Mesaz Natan pour David

¹ Lerwa David ti'n enstal li dan son pale. SENYER ti'n met li an sekirite kont son bann lennmi otour li.

² I ti dir profet Natan, “Get mwan, mon pe viv dan en pale an bwa sed, tandis ki Kof Bondye i anba en latant.”

³ Natan ti reponn lerwa, “Ale, fer sa ki ou annan dan ou lespri. SENYER ava avek ou.”

⁴ Sa menm swar, SENYER ti koz avek Natan:

⁵ Al dir mon serviter David, la sa ki SENYER i deklare: Ou ki oule konstri en lakaz pour mwan reste ladan?

⁶ Mon pa'n reste dan en lakaz depi zour ki mon ti fer pep Izrael sorti dan Lezip ziska ozordi, me mon'n deplas mwan touzour anba en latant.

⁷ Partou, mon'n akonpanny pep Izrael. Eski mon'n deza demann okenn sef bann tribi Izrael ki mon'n swazir pour vey lo mon pep Izrael: Akoz ou pa'n konstri en lakaz an bwa sed pour mwan?

⁸ Aprezan, al dir mon serviter David: La sa ki SENYER liniver i deklare: Mwan ki'n tir ou dan laplenn zerb deryer bann troupo, pour ou vin sef mon pep, Izrael.

⁹ Mon'n avek ou partou kot ou'n ale; mon'n fer disparet tou ou bann lennmi devan ou. Aprezan, mon pou fer ou non vin renonmen parey bann gran dimoun lo later.

¹⁰ Mon pou swazir en landrwa pour mon pep Izrael e etabli zot pour ki zot ganny en pei pour zot menm, san ki zot kontinyen ganny deranze. Bann malfeter pa pou rekonmans kraz zot parey avan.

¹¹ Depi zour ki mon ti etabli bann ziz lo Izrael, mon pep, mon'n donn ou en repo e delivre ou avek ou bann lennmi. Aprezan, SENYER in anons ou: Mwan SENYER ki pou etabli en desandans pour ou.

¹² Alafen ou lavi, apre ou lanmor, mon pou swazir enn ou prop zanfan pour ranplas ou, e mon pou konsolid son renny.

¹³ Li menm ki pou konstri en lakaz an mon non, e mon pou etabli son tronn rwayal pour touzour.

¹⁴ Mon pou vin son papa, i ava vin mon garson. Si i fer fot, mon pou koriz li avek en baton ki zonm i servi, avek kou ki zonm i donnen.

¹⁵ Me mon pa pou retir mon lanmour pour li, parey mon ti fer avek Sail ki mon'n rezete.

¹⁶ Ou desandans avek ou rwayonm pour reste pour touzour; mon pou etabli ou tronn pour touzour.

¹⁷ Natan ti raport avek David tou sa bann parol avek sa vizyon.

Lapriyer David

¹⁸ Lerwa David ti al prezant li devan SENYER. I ti dir: Ki mon ete mwan, Senyer BONDYE, e ki mon fanmir i ete pour ki ou'n fer nou ariv dan sa pozisyon?

¹⁹ Konmsi pour ou tousala pa ase, Senyer BONDYE, ou'n osi koz lo lavenir desandans ou serviter. Eski i normal pour azir konmsa anver en et imen?

²⁰ Ki mwan David, mon kapab dir ou an plis? Ou konn ou serviter tre byen, Senyer BONDYE!

²¹ Akoz ou promes ek ou labonte, ou'n fer sa bann keksoz merveye, e ou'n revel zot avek mwan, ou serviter.

²² Senyer BONDYE, ou gran! Napa personn parey ou, e dapre sa ki nou'n tande, napa en lot Bondye apard ou.

²³ Lekel nasyon lo later ki parey Izrael, ou pep, ki bann bondye in sove pour fer en pep pour zot, e donn li en non? Ou'n akonpli bann mervey pour zot; ou'n akonpli bann keksoz terib pour ou pei devan ou pep ki ou ti fer sorti Lezip; ou'n liber li avek bann nasyon ek zot bann bondye pour fer li vin ou pep.

²⁴ Ou'n etabli Izrael, ou pep pour li vin ou pep pour touzour, e ou SENYER, ou'n vin son Bondye.

²⁵ Aprezan, SENYER mon Bondye, tenir promes ki ou'n fer pour touzour, parey ou'n anonse konsernan ou serviter ek son desandans. Akonpli ou promes.

²⁶ Ou non pou touzour gran. Alor, dimoun pou dir, SENYER, i Bondye pep Izrael. Alor, fanmir ou serviter David pou ganny etabli devan ou.

²⁷ SENYER liniver! Ou menm Bondye Izrael, ki'n enform ou serviter, ler ou ti dir: Mon pou konstri en lakaz pour ou. Sa i donn mwan kouraz pour fer sa lapriyer.

²⁸ Senyer BONDYE, ou menm Bondye! Ou parol i laverite, e ou'n promet ou serviter sa bann bon keksoz.

²⁹ Aprezan, beni mon fanmir, pour ki i reste touzour devan ou. Ou menm Senyer BONDYE ou'n anonse, ki ou benediksyon ava reste lo fanmir ou serviter pour touzour.