2 Samyel 5 - Labib An Kreol Seselwa

David, Lerwa Izrael

¹ Tou bann tribi Izrael ti vin Hebron kot David. Zot ti dir li, “Nou ou prop disan.

² Lontan, ler Sail ti nou lerwa, ou ki ti diriz tou bann ekspedisyon militer. SENYER ti dir avek ou, Ou pou gouvern mon pep Izrael, e ou pou vin sef pep Izrael.”

³ Kan tou bann ansyen dan pep Izrael ti'n vin Hebron kot lerwa David, lerwa ti fer en lalyans avek zot devan SENYER e zot ti vers delwil lo latet David koman lerwa pep Izrael antye.

⁴ David ti annan 30 an ler i ti vin lerwa; i ti renny pandan 40 an.

⁵ I ti renny set an e sis mwan Hebron koman lerwa Zida, e 33 an Zerizalenm koman lerwa pep Izrael antye.

David I Kaptir Zerizalenm

⁶ Avek son bann zonm, lerwa ti sorti kont Zerizalenm pour en latak kont bann Zebizit, bann zabitan sa rezyon. Zot ti dir David, “Ou pa pou antre isi; menm bann aveg ek bann ki bwete pou anpes ou.” Zot ti oule dir par la, ki David pa pou zanmen kapab kaptir sa lavil.

⁷ Me David ti kaptir fortres Siyon, ki ti apel lavil David.

⁸ Sa zour, David ti dir, “Sa ki pou bat bann Zebizit ava bezwen mont par rigol delo e atak bann ki bwete ek bann aveg, bann ki David pa kontan.” Pour sa rezon ki zot dir: Bann aveg ek bann ki i bwete pa pou antre dan pale.

⁹ David ti reste dan fortres ki i ti apel lavil David. David ti konstri lavil tou otour depi Milo e ver lenteryer.

¹⁰ David ti vin deplizanpli pli for, akoz SENYER, Bondye ti avek li.

¹¹ Hiranm lerwa Tir, ti anvoy bann mesaze kot David. I ti anvoy li dibwa sed, bann sarpantye ek mason pour konstri en pale pour David.

¹² David ti rekonnet ki Bondye in etabli li koman lerwa lo pep Izrael e in fer son rwayonm enportan akoz son pep Izrael.

Bann garson David ki'n Ne Zerizalenm

¹³ Apre ki David ti'n sorti Hebron e etabli li dan Zerizalenm, i ti pran ankor plizyer fanm ek menazer ki ti donn li ankor plis garson ek fiy.

¹⁴ La non bann zanfan ki ti ne Zerizalenm: Sanmoua, Sobab, Natan, Salomon,

¹⁵ Yibar, Elisoua, Nefeg, Yafya,

¹⁶ Elisama, Eliada ek Elifelet.

Laviktwar David lo bann Filisten

¹⁷ Ler bann Filisten ti aprann ki David ti'n ganny konsakre koman lerwa pep Izrael, zot ti monte zot tou pour rod David. Ler David ti ganny nouvel i ti desann dan fortres.

¹⁸ Bann Filisten ti arive e pran zot pozisyon dan vale Refaim.

¹⁹ David ti konsilte SENYER, “Eski mon devre al atak bann Filisten? Eski ou pou livre zot dan mon lanmen?” SENYER ti dir David, “Ale, akoz mon pou livre bann Filisten dan ou lanmen.”

²⁰ David ti ariv Baal-Perasim, kot i ti bat bann Filisten. I ti dir, “SENYER in ouver defans lennmi devan mwan parey delo i defons en baraz.” Pour sa rezon, sa landrwa i apel Baal-Perasim.

²¹ Bann Filisten ti abandonn tou zot bann zidol la, e David avek son bann zonm ti pran e anmenn avek zot.

²² Bann Filisten ti mont ankor pour atake e pran pozisyon dan vale Refaim.

²³ David ti konsilte SENYER, ki ti dir li, “Non, pa atak zot. Fer letour par deryer, e apros zot lo kote lafore, vizavi bann pye dibwa.

²⁴ Ler ou ava antann tapaz lepa lao dan pye dibwa, ou ava degaze, akoz SENYER ki pe avans devan ou pour bat larme Filisten.”

²⁵ David ti fer parey SENYER ti'n ordonn li; i ti bat bann Filisten depi Geba ziska Gezer.