2 Samyel 2 - Labib An Kreol Seselwa

David, Lerwa Zida

¹ Apre sa, David ti demann SENYER, “Eski mon ava mont dan enn bann lavil Zida?” SENYER ti reponn, “Wi, monte!” David ti demann ankor, “Dan lekel lavil mon pou monte?” SENYER ti reponn, “Hebron.”

² David ti monte avek son de fanm, Ahinoanm, en Zizreelit, ek Abigail, vev Nabal, en Karmelit.

³ David ti anmenn osi tou bann zonm ki ti avek li, avek zot fanmir. Zot tou, ti reste dan lavil Hebron.

⁴ Bann zabitan Zida ti vin kot David; zot ti konsakre li pour fer li lerwa pep Zida. David ti ganny nouvel ki bann zabitan Yabes dan Galaad ti'n anter Sail.

⁵ I ti anvoy bann mesaze kot bann zabitan Yabes dan Galaad pour dir zot, “SENYER ava beni zot, akoz zot in montre zot labonte anver Sail, zot met, e zot in anter li.

⁶ Aprezan, SENYER ava montre son bonte ek son fidelite anver zot! Mwan osi mon pou fer zot dibyen, akoz zot in byen azir.

⁷ Alor, pran kouraz, azir koman bann zonm brav; zot met, Sail, in mor, e bann zabitan Zida in konsakre mwan koman zot lerwa.”

Isboset, Lerwa Pep Izrael

⁸ Sepandan, Abner, garson Ner, komandan larme Sail, ti pran Isboset, garson Sail, e anmenn li Mahanaim.

⁹ La, zot ti proklanm li lerwa pour sa bann rezyon: Galaad, Aser, Zizreel, Efraim, Benzamen e Izrael antye.

¹⁰ Isboset, garson Sail, ti annan 40 an ler i ti vin lerwa Izrael, e i ti rennyen pandan 2 an. Zis pep Zida ki ti aksepte David.

¹¹ David ti gouvern pep Zida dan Hebron pandan set an edmi.

Lager ant Pep Zida ek Pep Izrael

¹² Abner, garson Ner, ek bann zonm Isboset, garson Sail, ti kit Mahanaim e al dan direksyon Gabaon, pour al lager.

¹³ Zoab, garson Serouya ek bann zonm David ti osi sorti pour al lager. Zot ti zwenn kanmarad pre avek lak Gabaon, kot zot ti pran pozisyon, sakenn lo en kote lak.

¹⁴ Alor, Abner ti dir Zoab, “Mon propoze ki nou fer bann zennzan fer en konpetisyon lager devan nou.” Zoab ti reponn, “Dakor!”

¹⁵ Bann zennzan ti leve e apros kanmarad an kantite egal, douz dan tribi Benzamen pour Isboset, garson Sail, e douz parmi bann zonm David.

¹⁶ Sakenn ti atrap son ladverser par latet, e anfons son lepe dan kote lot; zot tou, ti tonbe ansanm. Zot ti apel sa landrwa dan Gabaon, Helka-Sourim.

¹⁷ Ti annan en gro lager sa zour, kot Abner ek bann zonm Izrael ti ganny bate par bann zonm David.

¹⁸ Ti annan la sa trwa garson Serouya: Zoab, Abisai ek Asael. Asael ti rapid parey enn sa bann gazel ki taye dan lakanpanny.

¹⁹ I ti pourswiv Abner san sorti dan son latras, ni agos ni adrwat.

²⁰ Abner ti get deryer e demande, “Ou sa! Asael?” I ti reponn, “Wi! Mwan sa.”

²¹ Abner ti dir li, “Pourswiv en lot dimoun adrwat oubyen agos; atrap enn sa bann zennzan e depouy li.” Me Asael ti oule kontinyen pourswiv Abner.

²² Abner ti dir ankor avek Asael, “Aret pourswiv mwan. Pa obliz mwan touy ou. Koman mon pou kapab get ou frer Zoab, apre?”

²³ Me Asael ti refize. Alor, Abner ti anfons son lans dan vant Asael. Lans ti sorti par lot kote. Asael ti tonbe mor. Tou dimoun ti ariv dan landrwa kot Asael ti'n tonbe mor, zot ti arete.

²⁴ Zoab ek Abisai ti pourswiv Abner. Soley ti pe kouse ler zot ti ariv kot kolin Ama, ki anfas avek Guia, lo semen dezer Gabaon.

²⁵ Bann zonm Benzamen ti rasanble deryer Abner e form en troup ki ti aret lo latet kolin.

²⁶ Abner ti apel Zoab. I ti dir li, “Eski nou pou touzour fer lager? Ou pa konnen ki tousala pou mal fini? Kan eski ou pou deside dir ou bann zonm aret pourswiv zot bann frer?”

²⁷ Zoab ti reponn, “Par Bondye vivan, si ou pa ti'n koze, mon asir ou ki mon bann zonm ti ava'n kontinyen pourswiv zot ziska demen bomaten.”

²⁸ Zoab ti sonn tronpet e tou bann zonm ti arete pourswiv Izrael e zot ti aret konba.

²⁹ Abner avek son bann zonm ti mars tou lannwit dan dezer. Zot ti travers larivyer Zourden e ariv Mahanaim.

³⁰ Zoab ti'n aret pourswiv Abner; i ti rasanble son bann zonm. Ti mank 19 zonm David ek Asael.

³¹ Me bann zonm David ti'n touy 360 bann zonm Benzamen ek Abner.

³² Zot ti pran lekor Asael e al anter li dan kavo son papa, Betlehenm. Zoab ek son bann zonm ti marse tou lannwit. Zot ti ariv Hebron granmaten.