2 Rwa 24 - Labib An Kreol Seselwa

¹ Dan sa lepok, Naboukodonozor, lerwa Babilonn ti sorti pour al fer lager. Yoyakim ti anba son pouvwar pandan 3 an. Apre, i ti revolte kont li.

² SENYER ti anvoy kont li, bann troup Babilonyen, Siriyen, Moabit ek Amonit. I ti anvoy zot kont Zida pour detri li, parey SENYER ti'n dir par lentermedyer son bann serviter, bann profet.

³ Sa ti arive kont Zida lo lord SENYER, pour fer Zida disparet devan li. Annefe, Manase ti'n komet bokou pese:

⁴ I ti'n fer koule telman disan inosan, ki Zerizalenm ti'n ranpli avek disan. SENYER pa ti oule pardonnen.

⁵ Leres bann aksyon Yoyakim ek tou sa ki i ti fer, tousala in ekri dan liv Listwar bann lerwa Zida.

⁶ Yoyakim ti mor e i ti ganny anter avek son bann zanset. Son garson, Yoyakin, ti renny dan son plas.

⁷ Lerwa Lezip ti nepli kit son pei, akoz lerwa Babilonn ti'n pran tou sa ki ti pour lerwa Lezip, depi larivyer Lezip, ziska larivyer Efrat.

Yoyakin, Lerwa Zida

⁸ Yoyakin ti annan 18 an kan i ti vin lerwa. I ti renny trwa mwan dan Zerizalenm. Son manman ti apel Nehousta, fiy Elnatan, sorti Zerizalenm.

⁹ I ti fer sa ki depler SENYER, parey son bann zanset ti'n fer.

¹⁰ Dan sa lepok, bann serviter Naboukodonozor, lerwa Babilonn ti al atak Zerizalenm, e zot ti anserkle lavil.

¹¹ Naboukodonozor, lerwa Babilonn, ti ariv devan lavil, pandan ki son bann zonm ti'n anserkle li.

¹² Alor, Yoyakin, lerwa Zida, ti rann son lekor avek lerwa Babilonn, ansanm avek son manman, son bann zonm, bann sef ek tou bann o zofisye. Lerwa Babilonn ti fer li prizonnyen dan wityenm lannen son renny.

¹³ I ti anmenn tou bann trezor ki ti dan tanp SENYER, e tou bann trezor ki ti dan pale lerwa; i ti kraz an morso tou bann resipyan annor ki ti dan tanp SENYER, ki Salomon, lerwa Izrael, ti'n fer, parey SENYER ti'n anonse.

¹⁴ I ti deport tou bann zabitan Zerizalenm, tou bann elit ek tou bann vayan gerye. An tou 10,000 egzile, san kont tou bann artizan ek bann ki fer serir; ti reste zis bann pli pov dan pei.

¹⁵ I ti anvoy Yoyakin annegzil Babilonn. I ti osi anmenn manman lerwa, bann fanm lerwa, son bann o zofisye ek bann dimoun enportan dan pei, annegzil sorti Zerizalenm pour Babilonn.

¹⁶ Lerwa ti osi anmenn annegzil Babilonn tou bann gerye; 7,000 an tou, bann artizan ek bann travayer ki fer serir; 1,000 an tou; zot tou, zot ti bann zonm vayan, pare pour fer lager. Lerwa Babilonn ti anvoy zot annegzil Babilonn.

¹⁷ Lerwa Babilonn ti pran Matanya, tonton Yoyakin e etabli li lerwa dan son plas; i ti sanz son non e apel li Sedesyas.

Sedesyas, Lerwa Zida

¹⁸ Sedesyas ti annan 21 an kan i ti vin lerwa. I ti renny 11 an dan Zerizalenm. Son manman ti apel Hamoutal, fiy Zeremi, sorti Libna.

¹⁹ I ti fer sa ki ti mal devan SENYER, parey Yoyakim.

²⁰ Zerizalenm ek Zida ti provok lakoler SENYER, ziska i ti rezet zot lwen avek li. Sedesyas ti revolte kont lerwa Babilonn.