2 Rwa 23 - Labib An Kreol Seselwa

Zozyas I Renouvle Lalyans avek Bondye

¹ Lerwa ti fer rasanble kot li, tou bann ansyen dan Zida e dan Zerizalenm.

² I ti mont dan tanp SENYER avek tou bann zonm dan Zida e tou bann zabitan Zerizalenm, pret, profet, lepep antye, gran koman pti. I ti lir devan zot tou, bann parol sa liv lalyans ki zot ti'n trouve dan tanp SENYER.

³ Lerwa ti pe debout pre avek kolonn tanp e i ti fer en lalyans devan SENYER. I ti angaz li pour swiv SENYER e obei son bann komannman, bann desizyon, bann regleman avek tou son leker e son et antye, pour met an pratik tou sa ki'n ekri dan sa liv lalyans. Lepep antye ti aksepte sa lalyans.

Zozyas I Fer bann Reform

⁴ Lerwa ti donn lord Gran-Pret Hilkiya, bann pret asistan ek bann gardyen laport pour tir dan tanp SENYER tou bann lobze ki ti'n konsakre pour Baal, Asera ek tou bann zetwal. I ti bril tousala dan laplenn Sedron, an deor Zerizalenm e fer anmenn zot lasann Betel.

⁵ I ti sas bann pret ki bann lerwa Zida ti'n etabli pour ofer lansan dan bann landrwa sakre, dan tou bann lavil Zida e otour Zerizalenm. I ti osi debaras li avek tou bann pret ki ti bril lansan devan Baal, soley, lalin, tou bann konstelasyon, e tou bann zetwal dan lesyel.

⁶ I ti tir dan tanp SENYER, poto sakre Asera ki i ti anmenn an deor Zerizalenm. Zot ti bril li dan vale Sedron, ziska ki i ti vin lasann ki i ti zet dan lafos kot dimoun ordiner i ganny antere.

⁷ I ti detri bann lakaz bann zonm prostitye ki ti dan tanp SENYER, la kot bann fanm ti fabrik lenz pour ladorasyon Asera.

⁸ I ti fer vin tou bann pret sorti dan bann lavil Zida, e rann enpir bann landrwa sakre kot bann pret ti bril lansan, depi Geba ziska Berseba; i ti detri tou bann landrwa sakre kot bann laport, ki ti dan lantre laport Zozye, gouverner lavil, lo kote gos laport lavil.

⁹ Me bann pret dan bann landrwa sakre pa ti mont kot lotel SENYER, Zerizalenm. Me zot ti manz dipen san lelven parmi zot bann konfrer.

¹⁰ Lerwa ti rann enpir Tofet ki dan laplenn bann garson Hinonm, pour ki personn pa ofer ankor ni son garson, ni son fiy, an sakrifis dan dife pour Molek.

¹¹ I ti detri dan lantre tanp SENYER, bann seval ki bann lerwa Zida ti'n konsakre an loner soley, pre avek lasanm Netann-Melek, en o zofisye; i ti bril tou bann kales an loner soley.

¹² Lerwa ti detri tou bann lotel Akaz ki ti dan letaz, lo twa lakaz ki bann lerwa Zida ti'n fer, ensi ki bann lotel ki Manase ti'n konstri dan de lakour tanp SENYER. I ti kraz zot an morso e fann lapousyer dan vale Sedron.

¹³ Lerwa ti rann enpir bann landrwa sakre ki ti dan Les Zerizalenm, dan Sid montanny Destriksyon ki Salomon, lerwa Izrael, ti konstri pour Astarte. Sa ti en pratik degoutan bann Sidonit pour Kemos, Moab e pour Milkonm. Sa ti en pratik degoutan bann Amonit.

¹⁴ I ti kraz bann kolonn sakre, koup bann poto sakre Asera e ranpli landrwa kot zot ti ete avek lezo imen.

Reform Relizyez dan Izrael

¹⁵ Lerwa ti osi kraz lotel ki ti Betel ek bann landrwa sakre ki Zeroboanm, garson Nebat, ti'n konstri e ki ti fer Izrael komet pese. I ti demoli sa lotel ek landrwa sakre; i ti fer li vin lapousyer e bril poto sakre Asera.

¹⁶ Kan Zozyas ti get otour li, i ti war bann latonm lo montanny. I ti fer retir bann lezo ki ti dan bann latonm e bril zot lo lotel e rann li enpir, dapre parol SENYER ki ti'n predir par lentermedyer son profet.

¹⁷ I ti demande, “Ki sa moniman ki mon war laba?” Bann zabitan lavil ti reponn li, “Sa latonm profet Bondye ki sorti Zida e ki ti anons sa ki ou'n fer kont bann latonm dan Betel.”

¹⁸ I ti dir, “Les li. Personn pa tous son bann lezo.” Alor, zot ti les son bann lezo trankil ansanm avek bann lezo sa profet ki ti sorti Samari.

¹⁹ Zozyas ti osi fer disparet tou bann lakaz dan landrwa sakre dan bann lavil Samari, ki bann lerwa Izrael ti'n fer pour provok lakoler SENYER. I ti tret zot parey i ti fer Betel.

²⁰ I ti ofer lo bann lotel tou bann pret dan bann landrwa sakre ki ti prezan, e bril bann lezo imen. Apre, i ti retourn Zerizalenm.

Selebrasyon Lafet Pak

²¹ Lerwa ti donn sa lord avek lepep antye: Selebre Pak an loner SENYER, zot Bondye, parey in ekri dan sa liv lalyans.

²² Okenn Pak parey sa enn, ti'n ganny selebre depi lepok ki bann ziz ti gouvern Izrael, ni menm depi lepok bann lerwa Izrael ek bann lerwa Zida.

²³ Me dan sa dizwityenm lannen renny lerwa Zozyas, zot ti selebre sa lafet Pak an loner SENYER dan Zerizalenm.

Konklizyon lo Renny Zozyas

²⁴ Pour li realiz bann parol lalwa ki'n ganny ekri dan sa liv ki pret Hilkiya ti'n trouve dan tanp SENYER, Zozyas ti osi elimin tou dimoun ki envok bann lespri ek bann medyonm, bann pti stati bondye, bann gran stati ek tou bann pratik degoutan ki ti egziste dan pei Zida e dan Zerizalenm.

²⁵ Avan Zozyas, ti napa okenn lerwa parey li, ki ti retourn kot SENYER avek tou son leker, avek son et antye, e avek tou son lafors, dapre tou bann lalwa Moiz. I pa'n zanmen annan personn parey li, ni avan, ni apre.

²⁶ Me SENYER ti gard son gran lakoler, ki i ti'n pran kont Zida, akoz bann provokasyon Manase pour kontrarye li.

²⁷ SENYER ti dir, “Mon pou rezet Zida parey mon'n rezet Izrael; mon pou rezet Zerizalenm, lavil ki mon'n swazir, ensi ki mon tanp lo lekel mon ti dir: La, mon pou plas mon non.”

Zozyas I Mor dan Lager

²⁸ Leres bann aksyon Zozyas ek tou sa ki i'n fer, in ganny ekri dan liv Listwar bann lerwa Zida.

²⁹ Dan son lepok, Faraon Neko, lerwa Lezip, ti al lager kont lerwa Asiri dan direksyon larivyer Efrat. Lerwa Zozyas ti sorti kont li; me koman i ti war li, faraon Neko ti touy li Megido.

³⁰ Son bann zonm ti anmenn li mor dan en kales, depi Megido ziska Zerizalenm kot zot ti anter li dan son prop latonm. Lepep sa pei ti pran Yoakaz, garson Zozyas, donn li lonksyon e etabli li koman lerwa dan plas son papa.

Yoakaz, Lerwa Zida

³¹ Yoakaz ti annan 23 an le kan i ti vin lerwa. I ti renny trwa mwan Zerizalenm. Son manman ti apel Hamoutal, fiy Zeremi, en zabitan Libna.

³² Yoakaz ti fer tou sa ki depler SENYER, parey son bann zanset ti fer.

³³ Faraon Neko ti ansenn li Ribla dan pei Hamat, pour li pa renny dan Zerizalenm; i ti enpoz en taks trwa tonn larzan ek 30 kilo lor.

³⁴ Faraon Neko ti etabli Eliakim, garson lerwa Zozyas, dan plas Zozyas, son papa. I ti sanz son non e apel li Yoyakim. I ti fer Yoakaz prizonnyen. I ti vin Lezip, kot i ti mor.

³⁵ Yoyakim ti donn Faraon larzan ek lor. Me i ti enpoz taks lo pep sa pei, sakenn dapre son larises, pour li kapab pey Faraon Neko larzan ek lor.

Yoyakim, Lerwa Zida

³⁶ Yoyakim ti annan 25 an kan i ti vin lerwa. I ti renny 11 an dan Zerizalenm. Son manman ti apel Zebouda, fiy Pedaya, en zabitan Rouma.

³⁷ I ti fer sa ki depler SENYER, parey son bann zanset.