Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

2 Rwa 21 - Labib An Kreol Seselwa


Manase, Lerwa Zida

1 Manase ti annan 12 an ler i ti vin lerwa. I ti renny pandan 55 an dan Zerizalenm. Son manman ti apel Hefsi-Ba.

2 Manase ti fer sa ki depler SENYER, i ti pratik bann aksyon degoutan parey bann nasyon ki SENYER ti'n sase devan pep Izrael.

3 I ti rekonstri bann landrwa sakre ki Ezekyas son papa ti'n detri, e etabli bann lotel pour Baal; i ti osi fer en poto sakre, parey Akab, lerwa Izrael, ti fer; i ti ador tou bann zetwal dan lesyel e servi zot.

4 I ti konstri bann lotel dan tanp SENYER, lo ki SENYER ti'n dir: Dan Zerizalenm mon pou plas mon non.

5 I ti konstri bann lotel pour tou bann zetwal dan lesyel dan tou le de lakour tanp SENYER.

6 I ti ofer son garson an sakrifis; i ti menm pratik mazik e konsilte bann ki predir lavenir ek bann sorsye. I ti fer en kantite keksoz mal ki depler SENYER, e provok son lakoler.

7 I ti fabrik en stati Asera ki i ti plas dan tanp SENYER. Lo sa tanp, SENYER ti'n dir avek David ek son garson Salomon: Dan sa lakaz e dan Zerizalenm, ki mon'n swazir parmi tou bann tribi Izrael, ki mon pou plas mon non pour touzour.

8 Mon pa pou les Izrael vin eran lwen an deor pei ki mon'n donn son bann zanset; a kondisyon ki zot met an pratik tou sa ki mon'n ordonn zot, e ki zot swiv tou bann lalwa ki mon serviter Moiz in donn zot.

9 Me zot pa ti ekoute; Manase ti tronp zot e fer zot fer bann pli move keksoz ki sa bann nasyon ki SENYER ti'n detri devan pep Izrael.

10 Alor, par lentermedyer son bann serviter, bann profet, SENYER ti deklare:

11 Akoz Manase, lerwa Zida, in komet bann aksyon degoutan; akoz in fer pli mal ki sa bann Amorit ti fer avek zot; akoz in fer Zida komet pese par son bann zidol,

12 la sa ki SENYER, Bondye Izrael i deklare: La mon pou anvoy lo Zerizalenm e lo Zida, en maler ki pou fer abazourdi dimoun ki ava antann koz lo la.

13 Mon pou fer avek Zerizalenm parey mon'n fer avek Samari ek lafanmir Akab, e mon pou netway Zerizalenm parey en pla ki ou vire anba lao.

14 Mon pou abandonn leres mon patrimwann; mon pou livre zot dan lanmen zot bann lennmi ki pou depouy zot,

15 akoz zot in fer sa ki depler mwan e provok mwan, depi zour zot bann zanset ti sorti Lezip ziska ozordi.

16 Manase ti osi fer koule bokou disan inosan ziska ki i ti ranpli Zerizalenm antye, san kont bann pese ki i ti fer Zida komet. Annefe, i ti pous pep Izrael fer sa ki mal devan SENYER.

17 Leres bann aksyon Manase, tou sa ki i'n fer, pese ki i'n komet, tousala in ganny ekri dan liv Listwar bann lerwa Zida.

18 Manase ti mor e ganny antere avek son bann zanset. I ti ganny antere dan zarden Ouza, e son garson Amonn ti vin lerwa dan son plas.


Amonn, Lerwa Zida

19 Amonn ti annan 22 an ler i ti vin lerwa. I ti renny 2 an dan Zerizalenm. Son manman ti apel Mesoulemet, fiy Harous, en zabitan Yotba.

20 I ti fer sa ki depler SENYER, parey son papa Manase.

21 I ti mars dan semen son papa e ador bann zidol ki son papa ti adore e servi.

22 I ti abandonn SENYER, Bondye son bann zanset e i pa ti swiv sa ki SENYER ti demande.

23 Son bann zofisye ti fer en konplo kont li. Zot ti touy lerwa dan son pale.

24 Me lepep ti touy tou sa bann ki ti fer konplo kont lerwa Amonn. Zot ti fer son garson Zozyas vin lerwa dan son plas.

25 Leres bann aksyon Amonn ek tou sa ki i'n fer, tousala in ganny ekri dan liv Listwar bann lerwa Zida.

26 I ti ganny antere dan son latonm dan zarden Ouza. Son garson Zozyas ti renny dan son plas.

Labib An Kreol Seselwa © Seychelles Bible Society, 2013.

ကြှနျုပျတို့နောကျလိုကျပါ:



ကြော်ငြာတွေ