2 Rwa 20 - Labib An Kreol Seselwa

Maladi ek Gerizon Ezekyas

¹ Dan sa letan, Ezekyas ti tonm malad; i ti pre pour mor. Profet Ezai, garson Amoz ti vin kot li. I ti dir li, “La sa ki SENYER i deklare: Met lord dan ou bann zafer, akoz ou pou mor; ou pa pou geri.”

² Ezekyas ti vir son figir kont miray e priy SENYER. I ti dir,

³ “Pitye SENYER! Mon sipliy ou, rapel koman mon ti swiv ou e mars devan ou avek fidelite e avek tou mon leker pour fer sa ki fer ou plezir.” Ezekyas ti pler en kantite.

⁴ Avan ki Ezai ti ariv deor dan lakour, SENYER ti koz avek li. I ti dir li,

⁵ “Retournen, e dir Ezekyas, sef mon pep: La sa ki SENYER, Bondye ou papa David i deklare: Mon'n antann ou lapriyer, mon'n war ou larm. Mon pou geri ou; dan trwa zour ou pou mont dan tanp SENYER.

⁶ Mon pou fer ou viv 15 an plis. Mon pou delivre ou ek sa lavil, dan lanmen lerwa Asiri; mon pou defann sa lavil pour mwan e akoz mon serviter David.”

⁷ Ezai ti dir, “Anmenn en pe lapat fig sek. Plas li lo landrwa malad e i ava geri.”

⁸ Ezekyas ti'n demann Ezai, “Ki siny pou fer mwan konnen ki SENYER pou geri mwan, pour ki mon ava al dan tanp SENYER dan trwa zour?”

⁹ Ezai ti dir, “La siny konmkwa SENYER pou fer sa ki i'n promet. Eski lonbraz pou avans par dis degre oubyen pou rekile par dis degre?”

¹⁰ Ezekyas ti reponn, “I normal pour lonbraz avans par dis degre, plito ki rekil par dis degre.”

¹¹ Alor, profet Ezai ti priy SENYER ki ti fer lonbraz rekile par dis degre lo kadran soler Akaz, kot lonbraz ti'n fini desann.

Ezekyas I Resevwar bann Anbasader Babilonn

¹² Dan sa lepok, Merodak-Baladann, garson Baladann, lerwa Babilonn, ti anvoy bann let ek en prezan pour Ezekyas. Annefe, i ti'n tande ki Ezekyas ti malad.

¹³ Ezekyas ti byen akey zot. I ti montre zot tou son bann trezor, larzan, lor, bann zepis, bann delwil parfimen, son bann magazen zarm ek tou sa ki ti dan son bann kof. Ezekyas pa ti kasyet nanryen; i ti montre zot tou sa ki ti annan dan son pale e dan son rwayonm.

¹⁴ Profet Ezai ti al kot lerwa Ezekyas. I ti dir li, “Ki sa bann zonm in dir? Kote zot sorti?” Ezekyas ti reponn, “Zot sorti dan en pei lwen, Babilonn, pour zot vin war mwan.”

¹⁵ Ezai ti dir, “Ki zot in war dan ou pale?” Ezekyas ti reponn, “Zot in war tou sa ki dan mon pale; napa nanryen ki dan mon bann magazen ki mon pa'n montre zot.”

¹⁶ Alor, Ezai ti dir Ezekyas, “Ekout parol SENYER:

¹⁷ Bann zour pe vini, kan tou sa ki dan ou pale e tou sa ki ou bann zanset ti'n anmase ziska ozordi, pou ganny anmennen Babilonn. Napa nanryen ki pou reste. SENYER ki deklare:

¹⁸ Serten parmi ou bann prop garson, ki ou'n fer, pou ganny anmennen; zot pou servi koman enik dan pale lerwa Babilonn.”

¹⁹ Ezekyas ti dir Ezai, “Parol SENYER ki ou'n dir mwan i bon.” I ti pe mazinen dan li menm: Akoz non si pou annan lape ek sekirite pandan mon lavi?

Lanmor Ezekyas

²⁰ Leres bann aksyon Ezekyas e tou son kouraz, ki mannyer i ti konstri en rezervwar e fer bann kondwit pour anmenn delo dan lavil, tousala in ganny ekri dan liv Listwar bann lerwa Zida.

²¹ Ezekyas ti mor e ganny antere avek son bann zanset; son garson, Manase, ti renny dan son plas.