2 Rwa 17 - Labib An Kreol Seselwa

Oze, Lerwa Izrael

¹ Dan douzyenm lannen renny Akaz, lerwa Zida, Oze, garson Ela, ti vin lerwa lo Izrael dan Samari. I ti rennyen pandan 9 an.

² I ti fer tou sa ki depler SENYER, me pa otan ki bann lerwa Izrael avan li.

³ Salmanazar, lerwa Asiri, ti al atak li; Oze ti kapitile e pey li taks.

⁴ Lerwa Asiri ti dekouver en konplo par Oze kont li, akoz i ti'n anvoy bann mesaze kot So, lerwa Lezip e refize pey taks lerwa Asiri, ki i ti pe peye dan bann lannen avan. Alor, lerwa Asiri ti met li dan prizon e ansenn li.

Izrael Annegzil Dan Asiri

⁵ Apre, lerwa Asiri ti anvai pei antye. I ti ariv Samari ki i ti anserkle pandan 3 an.

⁶ Nevyenm lannen renny Oze, lerwa Asiri ti pran lavil Samari e anmenn bann Izraelit annegzil Asiri. I ti fer zot reste Hala, lo Habor, larivyer Gozann e dan bann lavil Med.

Rezon Larin Rwayonm Izrael

⁷ Sa ti arive akoz pep Izrael ti'n fer pese kont SENYER zot Bondye ki ti'n fer zot sorti Lezip e delivre zot dan lanmen Faraon, lerwa Lezip; osi akoz zot ti'n ador lezot bondye.

⁸ Zot ti'n swiv koutim bann nasyon ki SENYER ti'n sase devan pep Izrael, ek bann koutim ki bann lerwa Izrael ti'n entrodwir.

⁹ Pep Izrael ti'n fer an sekre, bann keksoz ki defann kont SENYER zot Bondye. Zot ti'n konstri bann landrwa sakre dan tou zot bann lavil, depi dan bann post obzervasyon, ziska bann lavil fortifye.

¹⁰ Zot ti etabli bann ros sakre lo latet tou bann kolin e anba tou bann pye dibwa avek feyaz.

¹¹ Zot ti bril lansan dan sa bann landrwa sakre, parey bann nasyon ki SENYER ti'n sase devan zot. Zot ti'n fer sa ki mal e provok lakoler SENYER.

¹² Zot ti'n ador bann zidol ki SENYER ti'n dir: Fodre pa zot fer sa.

¹³ SENYER ti'n averti Izrael ek Zida par lentermedyer tou son bann profet, e tou son bann vizyoner, ler i ti dir zot: Abandonn zot bann move mannyer fer e obzerv bann komannman ek bann regleman ki mon'n donn zot dapre bann lalwa ki mon'n donn zot zanset par lentermedyer mon bann serviter, bann profet.

¹⁴ Me zot pa ti oule ekoute; zot ti antete parey zot bann zanset, ki pa ti krwar dan SENYER, zot Bondye.

¹⁵ Zot ti'n rezet son bann regleman, lalyans ki i ti'n fer avek zot bann zanset, ek bann avertisman ki i ti'n donn zot. Zot ti'n swiv bann lobze ki pa vo nanryen e zot menm zot in perdi zot valer. Zot ti swiv koutim bann nasyon otour zot, e ki SENYER Bondye ti'n defann zot imite.

¹⁶ Zot ti'n abandonn tou bann komannman SENYER, zot Bondye. Zot ti'n fabrik de pti toro an metal; zot ti fer bann poto sakre, dor bann zetwal dan lesyel; zot ti osi ador Baal.

¹⁷ Zot ti'n ofer zot garson ek zot fiy an sakrifis; zot ti'n pratik divinasyon, konsilte bann sorsye e vann zot lekor pour fer sa ki depler SENYER e provok son lakoler.

¹⁸ Alor, SENYER ti tre ankoler kont Izrael e ti fer zot disparet devan li; ti reste zis tribi Zida.

¹⁹ Zida osi pa ti gard komannman SENYER zot Bondye: Zot ti swiv bann koutim ki Izrael ti'n entrodwir.

²⁰ SENYER ti rezet tou bann desandan Izrael; i ti pini zot, e livre zot dan lanmen bann nasyon ki ti depouy zot, ziska ki i ti sas zot lwen avek li.

²¹ Kan i ti'n separ Izrael avek rwayonm David, pep Izrael ti fer Zeroboanm, garson Nebat, vin zot lerwa. Zeroboanm ti detourn avek SENYER e fer Izrael komet en gran pese.

²² Pep Izrael ti swiv tou bann pese ki Zeroboanm ti fer. Zot ti kontinyen dan sa bann pese,

²³ ziska ki SENYER ti fer Izrael disparet devan li, parey i ti'n anonse par lentermedyer son bann serviter, bann profet. Alor, Izrael ti ganny anvoye annegzil Asiri ziska ozordi.

Bann Samariten

²⁴ Lerwa Asiri ti fer tou dimoun vini sorti Babilonn, Kouta, Ava, Amat ek Sefarvaim. I ti fer zot enstal zot dan bann lavil Samari, dan plas pep Izrael, e zot ti pran posesyon Samari e reste dan son bann lavil.

²⁵ Kan zot ti konmans reste la, zot ti napa respe pour SENYER, e SENYER ti anvoy bann lyon ki ti touy bokou parmi zot.

²⁶ Dimoun ti al dir lerwa Asiri, “Sa bann nasyon ki ou'n etabli dan bann lavil Samari pa konn lalwa bondye sa pei; alor, i'n anvoy bann lyon parmi zot ki pe touy zot tou, akoz zot pa konn lalwa bondye sa pei.”

²⁷ Lerwa Asiri ti donn sa lord: Anvoy enn bann pret ki annegzil e ki sorti laba; fer zot al reste laba e ansenny zot lalwa bondye sa pei.

²⁸ Alor, enn parmi bann pret ki zot ti'n anmennen sorti Samari ti vin reste Betel; i ti ansenny zot respe pour SENYER.

²⁹ Me sak nasyon ti kontinyen fabrik son prop bondye. Zot ti plas zot bondye dan bann tanp e dan bann landrwa sakre, dan bann lavil kot bann Samariten ti reste.

³⁰ Bann zabitan Babilonn ti fer Soukot-Benot; zabitan Kouta ti fer Nergal; zabitan Amat, ti fer Asima;

³¹ zabitan Ava ti fer Nibaz ek Tartak; zabitan Sefarvaim ti bril zot bann zanfan an sakrifis pour zot bondye Adramelek ek Anamelek, bann bondye Sefarvaim.

³² Anmenmtan, zot ti ador SENYER; zot ti swazir parmi zot, tou kalite dimoun koman pret pour ofer sakrifis pour zot, dan bann landrwa sakre.

³³ Alor, zot ti ador SENYER, me anmenmtan zot ti ador zot bann prop bondye, dapre koutim bann nasyon kot zot sorti.

³⁴ Ozordi ankor, zot pe pratik zot bann vye koutim. Zot pa vreman ador SENYER, zot pa gard bann lalwa ek bann komannman ki SENYER in donn bann zanfan Zakob ki i ti apel Izrael.

³⁵ SENYER ti fer en lalyans avek zot e donn zot sa lord: Zot pa devre ador okenn lezot bondye ni prostern devan zot, ni servi zot, ni ofer zot okenn sakrifis.

³⁶ Zot devre ador SENYER ki'n fer zot sorti dan pei Lezip avek son gran pwisans ek lafors son lebra leve. Devan SENYER ki zot devre prosternen. An loner SENYER ki zot devre ofer sakrifis.

³⁷ Zot ava obzerve e met an pratik tou bann lalwa ek bann komannman ki i ti ekri pour zot. Zot pa devre ador okenn lezot bondye.

³⁸ Zot pa devre oubliy lalyans ki mon'n fer avek zot. Zot pa devre ador okenn lezot bondye.

³⁹ Zot ava ador SENYER zot Bondye; i ava delivre zot dan lanmen zot bann lennmi.

⁴⁰ Me zot pa ti ekoute e zot ti kontinyen pratik zot bann koutim parey avan.

⁴¹ Alor, sa bann nasyon ti ador SENYER e anmenmtan zot ti ador zot bann stati. Ziska ozordi, zot bann zanfan ek tou zot desandans, pe kontinyen fer parey zot zanset ti fer.