2 Rwa 16 - Labib An Kreol Seselwa

Akaz, Lerwa Zida

¹ Dan disetyenm lannen renny Peka, garson Remalia, Akaz, garson Yotanm, ti vin lerwa Zida.

² Akaz ti annan 20 an ler i ti konmans rennyen, i ti renny 16 an dan Zerizalenm. I pa ti fer plezir SENYER, son Bondye, parey son papa David ti'n fer.

³ Me i ti fer parey bann lerwa Izrael e i ti menm ofer an sakrifis son garson, dapre bann pratik degoutan bann nasyon ki SENYER ti'n sase devan pep Izrael.

⁴ I ti ofer sakrifis e bril lansan dan bann landrwa sakre lo bann kolin, e anba tou bann pye dibwa ki annan verdir.

⁵ Alor Rezin, lerwa Lasiri, ek Peka, garson Remalia, lerwa Izrael, ti al atak Zerizalenm. Zot ti anserkle Akaz, me zot pa ti lager.

⁶ Dan sa letan, lerwa Edonm, ti repran Eilat avek bann Edomit, e sas bann zonm Zida dan Eilat. Alor, bann Edomit ti retourn Eilat, kot zot in reste ziska ozordi.

⁷ Akaz ti anvoy bann mesaze kot Tiglat-Pileser, lerwa Asiri, pour dir li, “Mwan ou serviter e ou garson. Monte e vin sov mwan dan lanmen lerwa Asiri ek lerwa Izrael, ki pe atak mwan.”

⁸ Akaz ti pran larzan ek lor ki ti dan tanp SENYER e dan trezor pale lerwa e anvoy koman prezan pour lerwa Asiri.

⁹ Lerwa Asiri ti ekout li, e i ti al atak Damas ki i ti pran. I ti deport son bann zabitan Kir, koman prizonnyen, e fer touy Rezin.

¹⁰ Lerwa Akaz ti mont Damas pour al zwenn Tiglat-Pileser, lerwa Asiri. Ler i ti war lotel ki ti Damas, lerwa Akaz ti anvoy en model sa lotel avek tou bann detay, kot pret Ouri.

¹¹ Pret Ouri ti konstri en lotel parey sa model ki lerwa Akaz ti'n anvoy li depi Damas. Pret Ouri ti fini sa lotel avan ki lerwa Akaz ti retournen sorti Damas.

¹² Kan lerwa ti arive sorti Damas, i ti enspekte lotel. Lerwa ti apros devan lotel.

¹³ I ti ofer son sakrifis konplet ek son sakrifis legren, fer lofrann labwason e asperz lotel avek disan son bann sakrifis lape.

¹⁴ I ti deplas, lotel an bronz ki ti devan SENYER, ant nouvo lotel ek tanp SENYER, e plas li akote nouvo lotel lo kote Nor.

¹⁵ Lerwa Akaz ti donn sa lord pret Ouri: Lo sa gran lotel ou ava ofer sakrifis konplet bomaten ek sakrifis vezetal aswar, sakrifis konplet pour lerwa, avek son sakrifis vezetal, sakrifis konplet lepep antye, son bann lofrann vezetal ek son bann lofrann labwason. Ou ava asperz lotel avek disan bann sakrifis konplet e tou lezot sakrifis. Me pour lotel an bronz, mon ava okipe mwan menm.

¹⁶ Pret Ouri ti fer tou parey lerwa ti'n ordonn li.

¹⁷ Apre, Lerwa Akaz ti dekoup tou bann pano an bronz, tir bann lankadreman ek tou bann basen. I ti fer desann sa gran kivet an bronz ki ti lo bann bef an bronz e poz li lo en pavaz an ros.

¹⁸ Pour fer plezir lerwa Asiri, i ti kas sa galri pour saba ki ti ant tanp ek lantre pour lerwa.

¹⁹ Leres bann aksyon Akaz ek tou sa ki i ti fer in ganny ekri dan liv Listwar bann lerwa Zida.

²⁰ Akaz ti mor e ganny antere avek son bann zanset dan lavil David. Ezekyas, son garson, ti vin lerwa dan son plas.