2 Rwa 15 - Labib An Kreol Seselwa

Azarya, Lerwa Zida

¹ Dan vennsetyenm lannen Zeroboanm, lerwa Izrael, Azarya, garson Amazya, ti vin lerwa dan Zida.

² I ti annan 16 an ler i ti vin lerwa; i ti renny pandan 52 an dan Zerizalenm. Son manman ti apel Yekolya, en zabitan Zerizalenm.

³ Azarya ti fer tou sa ki fer plezir SENYER, parey son papa, Amazya.

⁴ Me bann landrwa sakre pa ti ganny detri: Lepep ti kontinyen ofer bann sakrifis e bril lansan lo bann oter.

⁵ SENYER ti pini lerwa ki ti ganny lalep ziska son lanmor, e viv dan en lakaz separe. Yotanm, garson lerwa, ti vin sef lafanmir rwayal e i ti gouvern lepep son pei.

⁶ Leres bann aksyon Azarya, ek tou sa ki i ti fer, in ganny ekri dan liv Listwar bann lerwa Zida.

⁷ Azarya ti mor e ganny antere avek son bann zanset dan lavil David. Yotanm ti vin lerwa dan son plas.

Zakari, Lerwa Izrael

⁸ Dan trantwityenm lannen renny Azarya, lerwa Zida, Zakari, garson Zeroboanm, ti vin lerwa lo Izrael dan Samari. I ti renny pandan sis mwan.

⁹ I ti fer sa ki depler SENYER, parey son bann zanset. I pa ti abandonn bann pese Zeroboanm, garson Nebat, ki i ti fer Izrael komet.

¹⁰ Saloum, garson Yabes, ti fer konplo kont li e touy li devan lepep. Konmsa ki i ti touy li e vin lerwa dan son plas.

¹¹ Leres bann aksyon Zakari in ganny ekri dan Liv Listwar bann Lerwa Izrael.

¹² Promes ki SENYER ti'n fer avek Zehou ti ganny akonpli: Ou bann desandan pou asiz lo tronn Izrael ziska katriyenm zenerasyon. Sanmenm sa ki ti arive.

Saloum, Lerwa Izrael

¹³ Saloum, garson Yabes, ti konmans son renny dan trantnevyenm lannen renny Ozyas, lerwa Zida. I ti renny en mwan dan Samari.

¹⁴ Menahenm, garson Gadi, ti monte depi Tirsa, antre dan Samari e touy Saloum, garson Yabes e renny dan son plas.

¹⁵ Leres bann aksyon Saloum, e konplo ki i ti fer, tousala in ganny ekri dan liv Listwar bann Lerwa Izrael.

¹⁶ Ti dan sa lepok, ki Menahenm ti sas tou bann zabitan Tifsa e dan teritwar antye, depi Tirsa. I ti sas zot akoz zot pa ti'n ouver laport lavil pour li. I ti ouver vant tou bann fanm ansent.

Menahenm, Lerwa Izrael

¹⁷ Dan trantnevyenm lannen Azarya, lerwa Zida, Menahenm, garson Gadi, ti vin lerwa Izrael. I ti renny 10 an dan Samari.

¹⁸ I ti fer sa ki depler SENYER. Pandan tou son lavi, i pa ti abandonn bann pese Zeroboanm, garson Nebat, ki i ti fer Izrael komet.

¹⁹ Poul, lerwa Asiri, ti antre dan pei. Menahenm ti donn li 30 tonn larzan pour ed li konsolid son pouvwar rwayal.

²⁰ Pour li kapab ganny sa larzan pour donn lerwa Asiri, Menahenm ti fer tou bann zonm ris dan Izrael pey sakenn 50 pyes larzan. Alor, lerwa Asiri ti ale; i pa ti reste dan pei.

²¹ Leres bann aksyon Menahenm, e tou sa ki i'n fer, in ganny ekri dan Liv Listwar bann Lerwa Izrael.

²² Menahenm ti mor e ganny antere avek son bann zanset. Pekaya, son garson ti renny dan son plas.

Pekaya, Lerwa Izrael

²³ Dan senkantyenm lannen renny Azarya, lerwa Zida, Pekaya, garson Menahenm ti vin lerwa lo Izrael, dan Samari. I ti renny de lannen.

²⁴ I ti fer sa ki depler SENYER; i pa ti abandonn bann pese Zeroboanm, garson Nebat, ki i ti fer Izrael komet.

²⁵ Peka, garson Remalia, son zofisye, ti fer konplo kont li: Avek 50 zonm sorti Galaad, Peka ti touy li Samari dan en lasal pale rwayal, ansanm avek Argob ek Arie. Konmsa ki i ti touy Pekaya e vin lerwa dan son plas.

²⁶ Leres bann aksyon Pekaya, ek tou sa ki i'n fer, tousala in ganny ekri dan Listwar bann Lerwa Izrael.

Peka, Lerwa Izrael

²⁷ Dan senkanndezyenm lannen renny Azarya, lerwa Zida, Peka, garson Remalia ti vin lerwa lo Izrael, dan Samari. I ti renny pandan 20 an.

²⁸ I ti fer sa ki depler SENYER; i pa ti abandonn bann pese ki Zeroboanm, garson Nebat, ti fer Izrael komet.

²⁹ Ti dan lepok Peka, lerwa Izrael, ki Tiglat-Pileser, lerwa Asiri, ti atak e pran sa bann lavil: Iyonn, Abel-Bet-Maaka, Yanoa, Kedes, Hasor, Galaad ek Galile, pei Neftali antye. I ti anvoy tou zabitan prizonnyen annegzil Asiri.

³⁰ Oze, garson Ela, ti fer en konplo kont Peka, garson Remalia, e touy li. I ti vin lerwa dan son plas, dan ventyenm lannen renny Yotanm, garson Azarya.

³¹ Leres bann aksyon Peka, ek tou sa ki i'n fer, tousala, in ganny ekri dan Listwar bann Lerwa Izrael.

Yotanm, Lerwa Zida

³² Dan dezyenm lannen Peka, garson Remalia, lerwa Izrael, Yotanm, garson Oze, ti vin lerwa Zida.

³³ I ti annan 25 an ler i ti konmans son renny. I ti renny pandan 16 an dan Zerizalenm. Son manman ti apel Yerousa, fiy Sadok.

³⁴ I ti fer plezir SENYER; i ti fer tou parey son papa, Oze.

³⁵ Me, bann landrwa sakre pa ti ganny detri; lepep ti kontinyen ofer bann sakrifis e bril lansan lo bann oter. Yotanm ti konstri laport dan letaz tanp SENYER.

³⁶ Leres bann aksyon Yotanm, ek tou sa ki i ti fer, in ganny ekri dan liv Listwar bann lerwa Zida.

³⁷ Dan sa lepok, SENYER ti konmans anvoy Rezin, lerwa Lasiri ek Peka, garson Remalia kont Zida.

³⁸ Yotanm ti mor e ganny antere avek son bann zanset dan lavil David, son papa. Son garson Akaz ti renny dan son plas.