2 Rwa 14 - Labib An Kreol Seselwa

Amasya, Lerwa Zida

¹ Dan dezyenm lannen renny Yoas, garson Yoakaz, lerwa Izrael, Amasya, garson Zoas, ti vin lerwa Zida.

² I ti annan 25 an ler i ti vin lerwa; i ti rennyen pandan 29 an dan Zerizalenm. Son manman, en zabitan Zerizalenm, ti apel Yehoadann.

³ Amasya ti fer tou sa ki fer plezir SENYER, me pa parey son papa, David. I ti fer egzakteman parey son papa, Zoas.

⁴ Me bann landrwa sakre pa ti ganny detri; lepep ti kontinyen al ofer bann sakrifis e bril lansan lo bann oter.

⁵ Apre ki Amasya ti'n konsolid son pouvwar rwayal, i ti fer touy sa bann zofisye ki ti'n touy lerwa, son papa.

⁶ Me i pa ti touy bann zanfan sa bann kriminel, dapre sa ki'n ekri dan liv lalwa Moiz: Bann papa pa devre ganny touye akoz zot zanfan, ni bann zanfan pa devre ganny touye akoz zot papa; me sakenn ava ganny touye akoz son prop pese.

⁷ Amazya ti touy 10,000 Edomit dan Vale Disel. Dan lager, i ti pran lavil Sela, ki i ti apel Yokteel, non ki'n reste ziska ozordi.

Yoas, Lerwa Izrael I Bat Amasya

⁸ Amasya ti anvoy bann mesaze kot Yoas, garson Yoakaz, garson Zehou, lerwa Izrael, pour dir li: Annou konfront kanmarad fas a fas.

⁹ Yoas, lerwa Izrael, ti anvoy dir Amasya, lerwa Zida, “En zarbis pikan Liban ti anvoy dir en pye sed Liban: Donn ou fiy pour marye avek mon garson. Me en zannimo sovaz Liban ti pase e kraz sa zarbis pikan.

¹⁰ Ou'n bat bann Edomit, e ou fyer pour sa. Me kontant ou avek ou laglwar e reste se ou! Akoz ou anvi provok maler? Ou pou tonbe, e Zida avek ou?”

¹¹ Me Amasya pa ti ekoute. Alor, Yoas, lerwa Izrael ti al atake. I ti fer fas avek Amasya, lerwa Zida, dan lager Bet-Semes, ki dan teritwar Zida.

¹² Izrael ti bat Zida, e tou dimoun ti sove kot zot.

¹³ Zoas, lerwa Izrael, ti fer prizonnyen Amasya, lerwa Zida, garson Zoas, garson Akazya, dan Bet-Semes. I ti ariv Zerizalenm, kot i ti kas miray lo en longer 200 met, depi laport Efraim ziska laport Kwen.

¹⁴ I ti sezi tou lor ek larzan, ek tou bann lobze ki ti annan dan tanp e dan bann dan kof pale rwayal. I ti osi pran bann otaz e i ti retourn Samari.

¹⁵ Leres bann aksyon Yoas, tou sa ki i'n fer, son bravour ek bann lager ki i ti'n fer kont Amasya, lerwa Zida, tousala in ekri dan liv Listwar bann Lerwa Izrael.

¹⁶ Zoas ti mor e ganny antere Samari, avek son bann zanset e avek bann lerwa Izrael. Son garson Zeroboanm ti vin lerwa dan son plas.

¹⁷ Amazya, garson Zoas, lerwa Zida, ti viv 15 an apre lanmor Yoas, garson Yoakaz, lerwa Izrael.

¹⁸ Leres bann aksyon Amazya, in ekri dan liv Listwar bann lerwa Zida.

¹⁹ Zot ti fer en konplo kont li Zerizalenm; i ti sov Lakis. Zot ti pourswiv li Lakis kot i ti ganny touye.

²⁰ Zot ti anmenn li lo seval, e anter li Zerizalenm, avek son bann zanset, dan lavil David.

²¹ Pep Zida antye ti pran Azarya, ki ti annan 16 an, e fer li vin lerwa dan plas son papa, Amasya.

²² Apre lanmor lerwa Amasya, Azarya ti rekonstri lavil Eilat e rann li avek Zida.

Zeroboanm II, Lerwa Zida

²³ Dan kenzyenm lannen Amasya, garson Zoas, lerwa Zida, Zeroboanm, garson Yoas, lerwa Izrael, ti konmans son renny dan Samari. I ti renny pandan 41 an.

²⁴ I ti fer tou sa ki depler SENYER; i pa ti abandonn bann pese Zeroboanm, garson Nebat, ki i ti fer Izrael komet.

²⁵ I ti retabli bann frontyer Izrael depi lantre Amat ziska lanmer Araba, dapre parol SENYER, Bondye Izrael, ki i ti dir par lentermedyer son profet Zonas, garson Amitai, profet Gat-Hefer.

²⁶ Annefe, SENYER ti'n war gran soufrans ki Izrael. Ti nepli annan personn, ni lesklav ni zonm lib, pour sekour Izrael.

²⁷ Me SENYER pa ti'n dir ki i pou ekstermin sa pep lo later. Alor, i ti sov li par lentermedyer Zeroboanm, garson Yoas.

²⁸ Leres bann aksyon Zeroboanm, ek tou sa ki i'n fer, son bravour dan lager, ki mannyer i ti retabli dominasyon Izrael lo Damas ek Amat ki ti pour Zida, tousala in ganny ekri dan liv Listwar bann Lerwa Izrael.

²⁹ Zeroboanm ti mor e ganny antere avek son bann zanset, bann lerwa Izrael. Son garson, Zakari ti renny dan son plas.