2 Rwa 13 - Labib An Kreol Seselwa

Yoakaz, Lerwa Izrael

¹ Dan venntrwazyenm lannen, Zoas, garson Akazya, lerwa Zida, Yoakaz, garson Zehou, ti vin lerwa Izrael. I ti renny dan Samari pandan 17 an.

² I ti fer tou sa ki mal pour depler SENYER. I ti imit bann pese Zeroboanm, garson Nebat, ki ti fer Izrael komet pese. I pa ti sanz son fason fer.

³ SENYER ti ankoler avek Izrael; i ti toultan livre zot dan lanmen Azael, lerwa Lasiri, e dan lanmen Benn-Hadad, garson Azael.

⁴ Yoakaz, ti enplor SENYER. SENYER ti ekout li, akoz i ti war soufrans Izrael depi ki lerwa Lasiri ti pe domin zot.

⁵ Alor, SENYER ti anvoy Izrael en liberater, pour ki zot kapab sape dan lanmen bann Siriyen. Pep Izrael ti reste dan zot prop lakaz parey avan.

⁶ Malgre sa, Izrael pa ti abandonn pese ki fanmir Zeroboanm ti fer zot komet. Zot ti swiv sa move semen; bann ros sakre ti osi reste dan Samari.

⁷ Yoakaz pa ti annan plis ki 50 kavalye, 10 kales lager, 10,000 zonm apye, akoz lerwa Lasiri ti'n detri tou son larme. I ti'n tret zot parey lapousyer anba lipye.

⁸ Leres bann aksyon Yoakaz e tou sa ki i'n fer, son kouraz, in ekri dan liv Listwar bann Lerwa Izrael

⁹ Alor, Yoakaz ti mor e ganny antere avek son bann zanset dan Samari. Zoas, son garson, ti vin lerwa dan son plas.

Zoas, Lerwa Izrael

¹⁰ Dan trannsetyenm lannen Zoas, lerwa Zida, Yoas, garson Yoakaz ti vin lerwa Izrael dan Samari. I ti renny pandan 16 an.

¹¹ I ti fer sa ki mal e depler SENYER. I pa ti abandonn okenn bann pese ki Zeroboanm, garson Nebat, ti fer Izrael komet; i ti swiv sa menm semen.

¹² Leres bann aksyon Zoas e tou sa ki i'n fer, ek son kouraz avek ki i ti lager kont Amazya lerwa Zida, in ekri dan liv Listwar bann Lerwa Izrael.

¹³ Zoas ti mor e Zeroboanm ti mont lo son tronn. Zoas ti ganny antere Samari avek bann lerwa Izrael.

Lanmor Elize

¹⁴ Elize ti'n tonm malad. Son maladi ti pou anmenn son lanmor. Zoas, lerwa Izrael ti al war li. I ti plere devan li e kriye, “Papa! Mon papa! Ou pli for ki Kales Izrael ek tou son bann kavalye!”

¹⁵ Elize ti dir li, “Pran en fles ek bann dart.” I ti pran en fles ek bann dart

¹⁶ Apre, Elize ti dir lerwa Izrael, “Redi ou fles.” I ti redi li. Elize ti poz son lanmen lo lanmen lerwa.

¹⁷ I ti dir li, “Ouver lafnet ki vir kote Les.” I ti ouver. Elize ti dir li, “Tire!” I ti tire. Elize ti dir, “Sa i en dart laviktwar SENYER, en dart ki anons laviktwar kont Lasiri. Ou pou bat bann Siriyen dan lavil Afek, ziska ki ou detri zot konpletman.”

¹⁸ I ti dir ankor, “Pran bann dart.” I ti pran. I ti dir lerwa Izrael, “Tap zot ater.” I ti tap trwa fwa, e i ti arete.

¹⁹ Profet Bondye ti ankoler avek li. I ti dir, “Ou ti'n devre tap senk oubyen zis fwa; konmsa, ou ti ava'n bat bann Siriyen ziska ki ou ti ava'n detri zot konpletman; me la, ou pou bat zot zis trwa fwa.”

²⁰ Elize ti mor, e i ti ganny antere. Lannen swivan, bann troup Moabit ti penetre dan pei.

²¹ En zonm ti pe ganny antere. Ler zot ti war en gran troup pe vini, zot ti anvoy sa lekor dan latonm Elize; koman i ti tous avek bann lezo Elize, i ti reviv, e i ti dres debout lo son de lipye.

Laviktwar lo bann Siriyen

²² Azael, lerwa Lasiri ti kraz Izrael pandan tou lepok Yoakaz.

²³ SENYER ti pran pitye pour zot e i ti pardonn zot, akoz son lalyans ki i ti'n fer avek Abrahanm, Izaak, ek Zakob. I pa ti oule detri zot; ziska aprezan, i pa'n rezet zot lwen avek li.

²⁴ Kan Azael, lerwa Lasiri ti mor, son garson, Benn-Hadad ti vin lerwa dan son plas.

²⁵ Yoas, garson Yoakaz, ti repran bann lavil avek Benn-Hadad, garson Azael, ki son papa, Yoakaz ti'n gannyen dan lager. Zoas ti bat li trwa fwa e repran bann lavil Izrael.