2 Rwa 10 - Labib An Kreol Seselwa

Lafanmir Akab I Ganny Masakre

¹ Akab ti annan 70 garson dan Samari. Alor, Zehou ti ekri en let ki i ti anvoy Samari kot tou bann sef Zizreel, bann ansyen ek titer bann garson Akab. La sa ki ti'n ekri:

² Akoz bann garson zot met i avek zot, e ki zot annan kales lager ek seval, en lavil fortifye ek bann zarm,

³ swazir parmi bann garson zot met, sa enn ki pli kalifye pour met li lo tronn son papa e defann lafanmir zot met. Met li lo tronn son papa, e lite pour lafanmir zot met.

⁴ Me zot ti annan en gran lafreyer. Zot ti dir: De lerwa pa'n kapab tenir devan li; ki mannyer nou pou kapab tenir?

⁵ Alor, sa ki ti ansarz pale, gouverner lavil, ansanm avek bann ansyen ek bann titer, ti anvoy dir Zehou, “Nou ou bann serviter; nou pou fer tou sa ki ou ava demann nou. Nou pa pour fer personn vin lerwa; fer tou sa ki ou krwar i bon.”

⁶ Zehou ti ekri zot en dezyenm let dan lekel i ti dir: Si zot lo mon kote, si zot pare pour obei mwan, koup likou bann garson ou met, e vin kot mwan Zizreel demen bomaten, menm ler. Dan sa letan, sa 70 garson lerwa ti kot bann dimoun enportan dan lavil ki ti responsab zot ledikasyon.

⁷ Kan zot ti resevwar sa let, zot ti pran sa 70 garson lerwa e touy zot. Zot ti met zot latet dan bann pannyen e anvoy Zizreel, kot Zehou.

⁸ Ler mesaze ti arive e dir li: Zot in anmenn latet bann garson lerwa, i ti reponn, “Met zot an de ta dan lantre laport lavil, ziska demen bomaten.”

⁹ Lannmen bomaten, i ti sorti, e prezant li devan lepep antye. I ti dir, “Zot inosan. Mwan ki ti fer konplo kont mon senyer, e ki'n touy li; me lekel ki'n touy tousala?

¹⁰ Rekonnet alor, ki okenn parol SENYER pa pou pase san realize, bann parol ki SENYER in dir konsernan fanmir Akab, akoz SENYER in akonpli sa ki i'n dir par lentermedyer son profet Eli.”

¹¹ Zehou ti touy tou sa ki ti reste dan fanmir Akab, dan Zizreel, tou bann dimoun enportan, son bann zanmi, son bann pret, san les okenn sirvivan.

Zehou I Fer Masakre bann Paran Akazya

¹² Apre, Zehou ti leve e al Samari. Anrout, ler i ti ariv Kan Berze,

¹³ i ti rankontre bann fanmir Akazya, lerwa Zida. I ti dir zot, “Lekel zot?” Zot ti reponn, “Nou bann fanmir Akazya, lerwa Zida. Nou pe desann pour al dir bonzour bann garson lerwa ek bann garson larenn mer.”

¹⁴ I ti dir, “Pran zot vivan.” Zot ti ganny atrape vivan, egorze e ganny zete dan sitern Kan Berze. Ti annan an tou 45 zonm. Zehou pa ti les personn sape.

Zehou I Rankontre Yonadab

¹⁵ Ler i ti kit Kan Berze, i ti rankontre Yonadab, garson Rekab ki ti vin zwenn li. I ti salye li e dir li, “Eski ou leker i senser parey mon leker anver ou leker?” Yonadab ti reponn, “Wi i senser.” Zehou ti reponn, “Si ou senser, donn mwan ou lanmen.” Yonadab ti donn li lanmen. Alor, Zehou ti fer li monte e fer li asiz dan bor li, dan son kales.

¹⁶ I ti dir li, “Vin avek mwan e ou ava war pasyon mon lanmour pour SENYER.” Alor, i ti vwayaz avek li dan son kales.

¹⁷ Kan i ti ariv Samari, i ti touy tou dimoun ki ti reste dan fanmir Akab dan Samari; i ti fer zot tou disparet dapre parol ki SENYER ti'n dir profet Eli.

Zehou I Fer Touy Tou Adorater Baal

¹⁸ Apre, Zehou ti rasanble lepep antye. I ti dir zot, “Akab ti servi Baal en pe, Zehou pou servi li bokou.

¹⁹ Aprezan, konvok tou bann profet Baal kot mwan, tou bann ki ador li ek tou son bann pret; fodre ki tou dimoun i la, akoz mon oule ofer Baal en gran sakrifis. Sa enn ki mank sa, ava pey avek son lavi.” Me Zehou ti pe azir par riz, pour li detri tou bann ki ador Baal.

²⁰ Zehou ti donn sa lord, “Konvok en lasanble solannel an loner Baal.” Alor zot ti anons sa lord.

²¹ Zehou ti anvoy bann mesaz atraver Izrael. Tou bann ki ador Baal ti vini; pa ti mank personn. Zot ti antre dan tanp Baal e tanp Baal ti plen.

²² Zehou ti donn lord responsab bann lenz sakre, “Tir bann lenz bann adorater Baal.” I ti anmenn sa bann lenz sakre.

²³ Alor, Zehou ti antre dan tanp Baal avek Yonadab, garson Rekab. I ti dir sa bann ki ador Baal, “Rod byen e gete si napa okenn serviter SENYER isi, me ki i annan zis sa bann ki ador Baal.”

²⁴ Apre, zot ti antre pour ofer bann sakrifis konplet. Zehou ti'n plas 80 zonm deor. I ti'n dir zot, “Si en sel zonm parmi sa bann zonm ki mon'n met dan zot lanmen i sape, zot ava pey avek zot lavi.”

²⁵ Osito ki i ti'n fini ofer bann sakrifis konplet, Zehou ti dir bann gard ek bann zofisye, “Antre e touy zot; pa les personn sape.” Bann gard ek bann zofisye ti masakre zot e zet zot an deor lavil. Apre, zot ti rantre dan lavil kot tanp Baal;

²⁶ zot ti tir bann kolonn sakre ki dan tanp Baal e brile.

²⁷ Zot ti demoli bann kolonn Baal; zot ti demoli tanp Baal e fer latrin avek, ziska ozordi.

Zehou, Lerwa Izrael

²⁸ Konmsa ki Zehou ti detri Baal dan Izrael.

²⁹ Me i pa ti arete komet bann pese ki Zeroboanm, garson Nebat, ti fer Izrael komet. Zot ti ador bann pti toro annor ki ti Betel ek Dann.

³⁰ SENYER ti dir Zehou, “Akoz ou'n azir byen; ou'n fer sa ki mon konsider byen: Ou'n azir anver fanmir Akab parey mon ti oule, ou desandan pou asiz lo tronn Izrael ziska katriyenm zenerasyon.”

³¹ Me Zehou pa ti pran ka pour mars dapre lalwa SENYER, Bondye Izrael avek tou son leker. I ti kontinyen komet bann menm pese ki Zeroboanm ti fer Izrael komet.

Lanmor Zehou

³² Dan sa letan, SENYER ti'n konmans diviz Izrael. Azael ti bat Izrael atraver pei antye,

³³ depi larivyer Zourden dan direksyon Les, Galaad antye, bann Gadit, bann Ribenit, ek bann Manasit, depi Aroer, pre avek larivyer Arnon, ziska Galaad ek Basann.

³⁴ Leres bann aksyon Zehou, ek tou sa ki i'n fer avek tou son kouraz in ganny ekri dan liv Listwar bann lerwa.

³⁵ Zehou ti mor e i ti ganny antere Samari avek son bann zanset. Yoakaz son garson, ti renny dan son plas.

³⁶ Zehou ti renny lo Izrael, dan Samari pandan 28 an.