2 Kronik 9 - Labib An Kreol Seselwa

Larenn Saba I Vizit Lerwa Salomon

¹ Kan larenn Saba ti antann koz lo lerwa Salomon, i ti desann Zerizalenm pour li teste Salomon avek detrwa kestyon difisil. I ti annan en gran lantouraz ek bann samo ki ti pe anmenn tou kalite bon lesans, en kantite lor, ek pyer presyez. Ler i ti ariv kot Salomon i ti rakont tou sa ki i ti annan dan son lespri.

² Salomon ti donn leksplikasyon tou sa ki i ti demande; napa nanryen ki Salomon pa ti kapab eksplike.

³ Larenn Saba ti ekout bann parol lasazes Salomon; i ti vizit son pale ki i ti'n konstri.

⁴ I ti war bann pla ki ti servi atab, lakaz son bann zofisye, lorganizasyon personnel dan pale ek zot liniform, son bann domestik ek zot liniform, sakrifis konplet ki i ti ofer dan tanp SENYER. I ti reste dan ladmirasyon.

⁵ Alor, larenn ti dir Salomon: Tou sa ki mon'n antann dir depi dan mon pei, konsernan ou bann parol ek ou gran lasazes, i vre.

⁶ Mon pa ti krwar mon zorey, ziska ki mon'n war avek mon prop lizye. Mon pa ti'n antann lanmwatye; sa ki mon'n war i depas tou sa ki mon'n tande.

⁷ Ou bann serviter ek tou ou lantouraz, zot annan lasans reste dan ou prezans e antann ou bann parol lasazes.

⁸ Loue SENYER ou Bondye, ki'n fer ou en gran faver, pour plas ou lo son tronn koman lerwa pour SENYER, ou Bondye. Ou Bondye i kontan Izrael, e i oule etabli li pour touzour. I'n plas ou koman lerwa lo zot pour gouvern avek drwatir e aplik lazistis.

⁹ Larenn Saba ti fer lerwa Salomon kado trwa tonn edmi lor, en gran kantite lesans ki personn pa'n zanmen war ek pyer presyez.

¹⁰ Bann zonm Hiranm ek bann zonm Salomon ki ti'n al Ofir, ti retourn avek lor, dibwa santal ek pyer presyez.

¹¹ Avek sa dibwa santal, Salomon ti fer plans pour tanp SENYER ek pale rwayal. I ti osi fer fabrik bann lenstriman lanmizik: Lir ek laarp pour bann mizisyen. Personn pa ti'n deza war keksoz parey, dan pei Zida.

¹² Lerwa Salomon ti fer kado Larenn Saba tou sa ki i ti anvi, bokou plis ki sa ki i ti'n anmennen pour Salomon. Apre, larenn Saba ti retourn dan son pei avek son bann serviter.

Larises Salomon

¹³ Dan en sel lannen, Salomon ti resevwar 20 tonn lor.

¹⁴ Anplis, ti annan bann taks ki bann komersan ek bann marsan ti anmennen, san kont lor ek larzan ki bann lerwa Arabi ek bann gouverner pei ti donn Salomon.

¹⁵ Lerwa Salomon ti fer fabrik 200 gran boukliye avek lor pir. Ti bezwen sis kilo lor pour fer sak boukliye.

¹⁶ I ti fer fabrik 300 pti boukliye avek lor pir e sak boukliye ti servi trwa kilo lor. I ti plas sa bann boukliye dan batiman ki ti apel: Mezon Lafore Liban.

¹⁷ Lerwa ti fer fabrik en gran tronn avek livwar e rekouver avek lor.

¹⁸ Sa tronn ti annan sis mars e en lot mars annor devan tronn; tousala ti rekouver avek lor. Ti annan osi lebra lo sak kote tronn ek de lyon skilpte, debout kot sak lebra.

¹⁹ Ti annan osi 12 lyon, enn kot sak kote mars. Okenn lerwa pa ti'n deza fer en tel keksoz dan son rwayonm.

²⁰ Tou bann lakoup lerwa Salomon ti annor e tou vesel pour Mezon Lafore Liban ti osi annor pir. Larzan an metal, ti napa gran valer dan lepok lerwa Salomon.

²¹ Bann bato lerwa Salomon ti al Tarsis avek bann maren lerwa Hiranm. Tou le 3 an, sa bann bato ti retourn avek kargezon lor, larzan, livwar, zako ek pan.

²² Larises ek lasazes Salomon ti depas tou lerwa lo later.

²³ Annefe, Bondye ti'n met lasazes dan son leker e bann lerwa ti sorti partou pour vin ekout li.

²⁴ Toulezan, sak lerwa ki ti vizit li, ti ofer li kado bann lobze annarzan e annor, lenz, anminisyon, parfen, seval ek bourik.

²⁵ Salomon ti fer konstri bann lekiri pour 4,000 seval ek kales lager. I ti posed 12,000 kavalye ki i ti plas dan serten lavil e en pe i ti kit kot li Zerizalenm.

²⁶ Salomon ti domin lo bann lerwa depi larivyer Efrat atraver pei Filisten, ziska frontyer Lezip.

²⁷ Lerwa ti fer larzan dan Zerizalenm vin konmsi ros, e sed an gran kantite, parey sikomor dan Sefela.

²⁸ Seval lerwa ti ganny enporte sorti Lezip ek bokou lezot pei.

²⁹ Tou leres bann aksyon Salomon, depi premye ziska dernyen, in ganny ekri dan listwar profet Natan, dan bann profesi Silonit Ahiya, ek bann vizyon profet Yeedo konsernan Zeroboanm, garson Nebat.

³⁰ Salomon ti renny pandan 40 an dan Zerizalenm, lo pep Izrael antye.

³¹ Salomon ti mor e ganny antere dan lavil David son papa; son garson Roboanm ti vin lerwa dan son plas.