2 Kronik 8 - Labib An Kreol Seselwa

Bann Diferan Aktivite Salomon

¹ Salomon ti pran 20 an pour li konstri tanp SENYER ek son prop pale rwayal.

² I ti osi rekonstri bann lavil ki Hiranm ti'n donn li, e etabli pep Izrael.

³ Apre, Salomon ti atak lavil Hamat-Soba, ki i ti kaptire.

⁴ I ti konstri Tadmor dan dezer ek lezot lavil koman antrepo pour gard provizyon an rezerv dan rezyon Hamat.

⁵ I ti osi konstri Bet-Horonn leo ek Bet-Horonn leba, bann lavil fortifye, antoure avek miray ek baro,

⁶ Baalat ek lezot lavil ki Salomon ti posede: Bann antrepo pour gard provizyon an rezerv, bann lavil pour son bann seval ek lavil pour son kales lager. Salomon ti reisi realiz tou son bann plan pour tou sa ki i ti anvi konstri dan Zerizalenm, dan Liban, e dan tou teritwar anba son dominasyon.

⁷ Tou bann pep ki ti reste parmi bann Hitit, Amorit, Perizit, Hivit ek Zebizit ki pa ti form parti pep Izrael,

⁸ desandan bann zabitan ki ti reste dan pei e ki Izrael pa ti detri, Salomon ti met zot anba travoforse. Zot bann desandan i ankor lesklav ziska ozordi.

⁹ Me Salomon pa ti enpoz lesklavaz lo okenn Izraelit. I ti etabli zot koman gerye, zofisye, bann komandan kales lager, kavalye,

¹⁰ an tou 250 zonm ki ti'n ganny swazir e plase koman bann sef lo pep Izrael.

¹¹ Salomon ti anmenn fiy Faraon reste dan pale ki i ti'n konstri pour li. I ti dir, “Mon fanm pa devre pe reste dan pale David, lerwa Izrael, akoz bann landrwa kot Kof Lalyans SENYER in antre i sakre.”

¹² Alor, Salomon ti ofer SENYER sakrifis konplet lo lotel ki i ti'n konstri pour SENYER, devan lasal antre Tanp.

¹³ Salomon ti ofer sakrifis dapre lord pour sak zour ki Moiz ti'n fikse: Pour bann zour saba, pour bann nouvellin, pour lokazyon trwa gran lafet dan lannen: Lafet Dipen san lelven, lafet Larekolt ek lafet Payot.

¹⁴ Parey son papa David ti'n deside, Salomon ti plas sak pret ek sak levit dapre zot ran. Bann levit ti sante e rann glwar SENYER devan bann pret e ede dan servis, sak zour. I ti plas osi bann portye kot sak laport tanp; tou, dapre lord ki David, serviter Bondye, ti'n donnen.

¹⁵ Zot ti fer sir ki tou detay lenstriksyon ki David ti'n etabli, ti ganny aplike konsernan bann pret, bann levit e menm sa ki konsern bann lasal trezor.

¹⁶ Konmsa, ki tou proze travay Salomon ti ganny realize, depi fondasyon konstriksyon ziska son finisyon. Alor, konstriksyon tanp SENYER ti fini.

¹⁷ Apre, Salomon ti al dan por Esionn-Geber ek Eilat, obor lanmer Akaba, dan pei Edonm.

¹⁸ La, lerwa Hiranm ti anvoy Salomon bann bato par bann lekipaz eksperyanse lo lanmer, e ansanm avek bann serviter Salomon, zot ti al dan pei Ofir e retourn avek 13 tonn lor, ki zot ti anmenn kot lerwa Salomon.