2 Kronik 7 - Labib An Kreol Seselwa

Salomon I Konsakre Tanp

¹ Ler Salomon ti fini priye, dife ti desann sorti dan lesyel e ti bril sakrifis konplet ek lezot bann sakrifis. Laglwar prezans SENYER ti ranpli tanp.

² Bann pret pa ti kapab antre dan tanp akoz laglwar SENYER ti ranpli tanp.

³ Kan pep Izrael ti war dife desann sorti dan lesyel, e laglwar prezans SENYER dan tanp, zot ti prosternen lafas ater e loue SENYER, akoz SENYER i bon e son fidelite i pour touzour.

⁴ Apre, lerwa ek lepep ti ofer sakrifis devan SENYER.

⁵ Lerwa Salomon ti ofer an sakrifis 22,000 bef ek 120,000 mouton. Konmsa ki lerwa ek tou lepep ti konsakre tanp Bondye.

⁶ Bann pret ti pran zot pozisyon. Bann levit ti zwe an loner SENYER, lenstriman lanmizik ki lerwa David ti'n fer pour selebre SENYER: Akoz son fidelite i pour touzour. Bann pret ki ti anfas, ti sonn tronpet e tou pep Izrael ti lev debout.

⁷ Salomon ti konsakre lakour ki devan tanp: La, i ti ofer sakrifis konplet, lofrann vezetal, ek morso lagres sakrifis pour lape, akoz lotel an bronz ti tro pti pour tou sa bann sakrifis.

⁸ Dan sa lepok, Salomon ti selebre lafet pandan set zour, ansanm avek pep Izrael antye. Zot ti'n desann pour sa gran rasanbleman sorti depi lantre Hamat dan Nor, ziska larivyer Lezip dan Sid.

⁹ Lo wityenm zour, zot ti annan en gran seremoni. Zot ti'n pas set zour pour konsekrasyon lotel e kontiny selebrasyon lafet pandan set zour.

¹⁰ Apre, venntrwazyenm zour, dan setyenm mwan, Salomon ti fer tou dimoun retourn kot zot. Zot ti santi zot ere e dan lazwa pour tou bann dibyen ki SENYER ti fer anver David, anver Salomon, e anver son pep, Izrael antye.

Senyer I Aparet ankor avek Salomon

¹¹ Salomon ti fini konstri tanp SENYER ek pale rwayal. I ti'n reisi fini konplet tou sa ki i ti anvi fer pour tanp ek son prop lakaz.

¹² SENYER ti aparet avek Salomon pandan lannwit. I dir li: Mon'n antann ou lapriyer e mon swazir sa landrwa pour ofer sakrifis.

¹³ Kan mon ava ferm lesyel e ki i napa lapli; kan mon ava ordonn bann sotrel pour devor pei; kan mon ava anvoy lepidemi parmi mon pep,

¹⁴ si mon pep ki port mon non, i imilye li, priye e rod mwan; si zot abandonn zot bann move kondwit, mon pou ekout zot depi lao dan lesyel, e pardonn zot pese e geri zot pei.

¹⁵ Mon pou ouver mon lizye byen gran, mon pou ekout lapriyer ki sorti la dan sa landrwa.

¹⁶ Mon'n swazir e konsakre sa landrwa kot mon non pou prezan pour touzour. Mon pou touzour vey lo li.

¹⁷ Ou, si ou obei mwan fidelman parey ou papa David, si ou fer tou sa ki mon komann ou, si ou gard mon komannman ek mon bann regleman,

¹⁸ alor, mon pou etabli ou pouvwar rwayal dapre lalyans ki mon ti fer avek ou papa David, ler mon ti dir: I pou touzour annan enn ou desandan, apre ou, pour gouvern Izrael.

¹⁹ Me si ou tourn ou ledo avek mwan, e si ou abandonn mon bann regleman ek mon bann komannman ki mon'n plas devan zot, pour zot al servi lezot bondye e ador zot,

²⁰ alor, mon pou derasin zot lo sa later ki mon'n donn zot. Sa tanp ki mon'n konsakre pour mon loner, mon pou rezet li lwen, e fer li vin en lobze ki bann nasyon pou servi pour gway Izrael.

²¹ Kan dimoun ki pas par la, pou war sa tanp ki ti sitan ganny onore pou demande: Akoz SENYER in fer sa avek sa pei ek sa tanp?

²² Dimoun pou reponn: Akoz zot in abandonn SENYER, Bondye zot zanset ki ti tir zot dan Lezip. Zot in al ver lezot bondye ki zot ti adore e servi. Pour sa rezon ki Bondye in fer tou sa bann maler tonm lot zot.