2 Kronik 5 - Labib An Kreol Seselwa

¹ Kan Salomon ti fini tou son travay lo tanp SENYER, i ti anmenn tou bann lobze ki lerwa David, son papa, ti'n konsakre pour SENYER. I ti plas larzan, lor ek tou lezot lobze dan kof tanp Bondye.

Kof Lalyans I Ganny Plase dan Tanp

² Apre, Salomon ti rasanble otour li dan Zerizalenm, tou bann ansyen parmi pep Izrael, tou sef bann tribi, sef bann fanmir Izraelit, pour fer monte Kof Lalyans SENYER, sorti dan lavil David, setadir Siyon.

³ Alor, tou bann Izraelit ti rasanble otour lerwa pour lafet ki ti tonm dan setyenm mwan.

⁴ Ler tou bann sef ti'n rasanble, bann levit ti anmenn Kof Lalyans.

⁵ Bann pret-levit ti anmenn Kof Lalyans Latant Rankont, ek tou leres bann lobze sakre ki ti dan Latant Rankont.

⁶ Salomon avek tou kominote Izrael ki ti'n rasanble, ti plas zot devan Kof Lalyans. Zot ti ofer en si gran kantite mouton ek bef koman sakrifis, ki personn pa ti kapab konte.

⁷ Apre, bann pret ti transport Kof Lalyans SENYER dan landrwa ki ti'n prepare pour li, e depoz li dan Lasal Tre Sen, anba lezel bann Seriben.

⁸ Annefe, bann seriben ti'n ganny plase avek zot lezel ouver, pour kouver landrwa kot Kof Lalyans ti devre ganny depoze. Alor, i ti form en kouvertir proteksyon pour Kof Lalyans avek bann bar ki servi pour transport Kof.

⁹ Sa bann bar ti telman long, ki en dimoun ki ti dan en bout, kot Kof, dan Lasal Tre Sen, pa kapab war deor. Kof in reste la ziska ozordi.

¹⁰ Dan Kof Lalyans, ti annan zis sa de plak ros lalwa ki Moiz ti met ladan, lo montanny Horeb, kot SENYER ti fer en lalyans avek pep Izrael, apre ki zot ti'n sorti Lezip.

¹¹ Tou bann pret ti sorti dan sanktyer. Zot tou, zot ti'n pirifye zot san tenir kont lord zot ran.

¹² Bann levit ki ti mizisyen, Asaf, Hemann, Yedoutoun, zot bann garson, ek lezot manm lafanmir, abiye dan lenz latwal linenn, ti debout lo kote Les lotel avek zot lenstriman lanmizik: Senbal, laarp, ek lir, avek zot, ti annan 120 pret ki ti konn soufle tronpet.

¹³ Bann santer, bann zwer tronpet ti zwenn ansanm dan larmoni, pour rann glwar e remersye SENYER: SENYER i bon; son fidelite i reste pour touzour. Sa ti ganny akonpannyen par bann son senbal avek lezot lenstriman lanmizik. Anmenmtan, en nyaz ti ranpli tanp SENYER.

¹⁴ Akoz sa nyaz, bann pret pa ti kapab kontiny zot seremoni. Laglwar SENYER ti ranpli tanp Bondye.