2 Kronik 4 - Labib An Kreol Seselwa

Lekipman pour Tanp

¹ Lerwa Salomon ti fer fabrik en lotel an bronz ki ti mezir 10 met sak kote e 5 met oter.

² I ti osi fer fabrik en gran basen laform ron, an bronz ki ti mezir 5 met dyamet, i ti mezir 2 met edmi fonder e 15 met otour.

³ Anba son bor ti annan dekorasyon dan laform bef; 20 bef par met kare. Zot ti form de ranze, enn par lao lot; zot ti'n ganny fonn ansanm avek leres basen.

⁴ Sa basen ti repoz lo 12 bef an bronz, trwa lo sak kote: Trwa ti vir dan Nor, trwa ti vir dan Sid, trwa ti vir dan Was e trwa ti vir dan Les. Parti deryer sa bann bef, ti vir anndan, anba basen.

⁵ Basen ti lepeser lanmen, son bor ti parey bor en lakoup, dan laform en flerdelis. Sa basen ti kapab kontenir anviron 120,000 lit delo.

⁶ I ti osi fer dis kivet an bronz, e plas senk lo kote drwat e senk lo kote gos tanp. Sa ti servi pour lav bann zannimo pour sakrifis, tandis ki bann pret, ti servi sa gran basen pour bennyen.

⁷ I ti osi fabrik dis portlanp annor, dapre lareg fikse, ki i ti plas dan Tanp: Senk lo kote drwat e senk lo kote gos.

⁸ I ti osi fer dis latab, senk lo sak kote. I ti osi fer 100 bol annor pour aspersyon.

⁹ Salomon ti donn lord fer en lakour zis pour bann pret, e bann laport kouver an bronz pour en gran lakour.

¹⁰ Sa gran basen ki zot ti apel lanmer ti ganny plase lo kote drwat, pre avek kwen, lo Sides tanp.

¹¹ Hiranm ti osi fabrik bann sandriye, lapel, ek bol. I ti fini tou travay tanp ki Salomon ti'n donn li:

¹² 2 kolonn, 2 kornis plase anler lo kolonn,

¹³ 400 fri parey grenad, ki ti tenir avek girlann lo sak kornis, setadir, sak girlann ti tenir 2 ranze grenad.

¹⁴ 10 kivet avek zot sipor,

¹⁵ sa gran basen ron, avek son 12 bef ki ti anba li,

¹⁶ bann sandriye, bann lapel ek gran fourset pour lavyann. Tousala, ti bann lekipman ki Houranm-Abi ti fabrike lo lord lerwa Salomon pour met dan tanp SENYER. Tou ti ganny fer avek bronz poli.

¹⁷ Lerwa ti fer koul sa bann lobze, ant Soukot ek Seredata, ki trouv dan vale Zourden.

¹⁸ Salomon ti fer fabrik en sitan gran kantite lobze, ki personn pa konn pwa total bronz ki i ti servi pour fabrik tousala.

¹⁹ Lerwa Salomon ti fer osi fabrik bann lobze annor pour tanp Bondye: Lotel ek bann latab pour dipen ki ganny ofer devan Bondye;

²⁰ bann portlanp ek bann lalanp annor ki ti ganny alimen dapre lord, devan Lasal Tre Sen,

²¹ bann fler dekorasyon, bann lalanp, ek bann penset, ti annor pir;

²² bann tennywar lalanp, bol pour met disan, lansanswar, plak pour anmenn labrez, ti osi annor pir. Bann laport Tanp ek bann laport ki al dan Lasal Tre Sen ti osi kouver annor.