2 Kronik 36 - Labib An Kreol Seselwa

Yoakaz, Lerwa Rwayonm Zida

¹ Bann zabitan Zida ti swazir Yoakaz pour fer li vin lerwa dan plas son papa Zozyas, dan Zerizalenm.

² Yoakaz ti vin lerwa laz 23 an. I ti renny pandan trwa mwan, dan Zerizalenm.

³ Apre, lerwa Lezip ti aras li pouvwar dan Zerizalenm. I ti fer rwayonm Zida pey en taks trwa tonn larzan ek 30 kilo lor.

⁴ I ti met Elyakim, frer Yoakaz, koman lerwa Zida ek Zerizalenm e sanz son non an Yoyakim. Kanta Yoakaz, son frer, Neko ti anmenn li Lezip.

Yoyakim, Lerwa Rwayonm Zida

⁵ Yoyakim ti annan 25 an ler i ti vin lerwa e i ti renny pandan 11 an dan Zerizalenm. Bann aksyon degoutan ki i ti komet pa ti fer plezir SENYER, son Bondye.

⁶ Naboukodonozor, lerwa Babilonn, ti atak Yoyakim e anmenn li koman prizonnyen. I ti anmar li dan lasenn e anmenn li Babilonn.

⁷ Naboukodonozor ti osi pran en pe bann lobze sakre dan tanp SENYER ki i ti anmenn dan son pale Babilonn.

⁸ Lezot aksyon Yoyakim in ganny ekri dan Liv bann Lerwa Izrael ek Zida. Son garson, Yoyakin, ti vin lerwa dan son plas.

Yoyakin, Lerwa Rwayonm Zida

⁹ Yoyakin ti annan 8 an, ler i ti vin lerwa. I ti renny pandan trwa mwan ek dis zour dan Zerizalenm. I ti fer sa ki ti depler SENYER.

¹⁰ Dan konmansman lannen, lerwa Naboukodonozor ti anvoy sers Yoyakin pour anmenn li Babilonn avek bann lobze presye dan tanp SENYER. I ti swazir son frer, Sedesyas, koman lerwa lo Zida ek Zerizalenm.

Sedesyas, Lerwa Rwayonm Zida

¹¹ Sedesyas ti annan 21 an kan i ti vin lerwa. I ti renny 11 an dan Zerizalenm.

¹² I ti fer sa ki ti depler SENYER, son Bondye. I pa ti imilye li devan profet Zeremi ki ti koz lo non SENYER.

Zerizalenm I Tonm dan Lanmen Lennmi

¹³ Sedesyas ti revolte osi kont lerwa Naboukodonozor ki ti'n fer li pret serman lo non SENYER. Olye retourn ver SENYER, Bondye Izrael, i ti montre li retif e antete.

¹⁴ Tou bann sef parmi bann pret e parmi lepep, ti vin pli enfidel anver Bondye e zot ti imit bann nasyon dan zot bann pratik degoutan. Zot ti profann tanp SENYER, ki i ti'n konsakre, dan Zerizalenm.

¹⁵ SENYER, Bondye zot zanset, ti konstaman anvoy son bann mesaze kot zot, akoz i ti pran pitye pour zot e pour son tanp kot i reste.

¹⁶ Me zot pa ti respekte bann mesaze Bondye. Zot pa ti pran ka; zot ti negliz Parol Bondye e monk son bann profet, ziska ki lakoler SENYER ti monte kont son pep; ti nepli annan okenn solisyon.

¹⁷ Alor, SENYER ti livre zot dan lanmen lerwa Babilonyen ki ti atak zot pei. I ti masakre bann zennzan dan sanktyer, san okenn pitye pour personn: Ni zennzan, ni zenn fiy, ni adilt, ni vyeyar. I ti livre zot dan lanmen lerwa Babilonn.

¹⁸ I ti pran tou bann lobze dan tanp, gran koman pti, tou bann trezor dan tanp SENYER, trezor lerwa ek trezor son bann zofisye.

¹⁹ Zot ti met dife dan tanp e demoli miray Zerizalenm. Zot ti met dife dan bann pale e detri tou bann lobze presye.

²⁰ Lerwa ti deport Babilonn tou bann ki pa ti'n ganny touye. Zot ti vin son lesklav e lesklav son bann garson, ziska ki rwayonm Lapers ti ganny etabli,

²¹ pour ki parol SENYER par lentermedyer profet Zeremi i realize: Ziska ki pei i gard bann saba pour letan ki i'n reste abandonnen; fodre i gard saba ziska ki 70 an i pase.

Siris I Donn Lord Rekonstri Tanp

²² Pandan premye lannen renny Siris, lerwa Lapers, SENYER ti realiz parol ki i ti'n prononse par profet Zeremi. I ti met dan lespri Siris, lerwa Lapers, lide pour fer en proklanmasyon e pibliy sa teks swivan partou dan son rwayonm antye:

²³ La sa ki Siris, lerwa Lapers, i dir: SENYER, Bondye lesyel, in donn mwan tou bann rwayonm lo later. I'n ordonn mwan konstri en tanp pour li dan Zerizalenm, dan pei Zida. Bann parmi zot ki form parti son pep, ale; e ki SENYER, Bondye i avek zot.