2 Kronik 35 - Labib An Kreol Seselwa

Zozyas I Selebre Lafet Pak

¹ Zozyas ti selebre lafet Pak an loner SENYER, dan Zerizalenm. Zot ti egorz zenn mouton pour selebrasyon Pak, katorzyenm zour dan premye mwan.

² I ti nonm bann pret dan zot fonksyon e ankouraz zot dan servis tanp SENYER.

³ I ti dir avek bann levit ki ti'n ganny konsakre dan servis SENYER, e ki ti responsab pour ansenny pep Izrael, “Met Kof Lalyans dan tanp ki Salomon, garson David, lerwa Izrael ti konstri. Zot pa bezwen kontinyen transport li lo zot zepol. Aprezan, servi SENYER zot Bondye ek Izrael, son pep.

⁴ Organiz zot par group fanmir, dapre regleman ki David, lerwa Izrael ek Salomon son garson ti donnen.

⁵ Sak group levit dapre fanmir, ava ganny plase dan sanktyer, pour servi lezot fanmir pep Izrael.

⁶ Zot ava egorz zenn mouton Pak, pirifye zot e fer preparasyon pour zot bann frer Izraelit, parey SENYER in ordonnen par lentermedyer Moiz.”

⁷ Pour sakrifis Pak, Zozyas ti kontribye pour lepep ki ti la prezan: 30,000 mouton ek kabri, ensi ki 3,000 toro, sorti dan bann troupo lerwa.

⁸ Son bann minis ti osi donn en kontribisyon volonter pour lepep, pour bann pret ek levit. Bann responsab tanp, Hilkiya, Zakari ek Yehiel ti donn bann pret 2,600 mouton ek kabri pour sakrifis Pak ek 300 toro.

⁹ Bann sef levit, Konanya ek son bann frer, Hasabya, Yehiel ek Yozabad ti osi fer zot kontribisyon pour sakrifis Pak. Zot ti donn bann levit 500 toro, 5,000 zenn mouton ek kabri.

¹⁰ Seremoni ti ganny organize. Bann pret ek bann levit ti debout dan zot plas dapre zot group, parey lerwa ti'n ordonnen.

¹¹ Zot ti egorz bann zenn mouton ek bann kabri ti ganny pour sakrifis Pak. Bann pret ti resevwar disan e fer laspersyon, tandis ki bann levit ti depouy bann zannimo.

¹² Zot ti separ zannimo ki devre ganny ofer koman sakrifis konplet, pour donn diferan fanmir parmi lepep, pour ki zot prezant devan SENYER, parey i'n rekomande dan Liv Moiz. Zot ti fer parey avek bann toro.

¹³ Zot ti fer tou dapre lareg: Roti zenn mouton Pak lo dife, kwi bann lofrann sakre dan bann marmit, sodyer, ek lezot resipyan e servi lepep ki ti la, toudswit apre.

¹⁴ Apre, zot ti prepar sa ki pour zot e pour bann pret, bann desandan Aaron ki ti okipe ziska aswar, pe ofer sakrifis konplet ek lagres. Pour sa rezon ki bann levit ti bezwen prepar sa ki pour bann pret, bann desandan Aaron.

¹⁵ Bann santer lafanmir Asaf ti pran zot fonksyon, dapre lord David ek Asaf; Hemann ek Yedoutoun, bann konseye lerwa, ek bann portye ti kot sak laport. Zot pa ti bezwen kit zot pozisyon, akoz lezot levit ti prepar zot par.

¹⁶ Konmsa ki tou servis SENYER ti ganny organize sa zour, pour selebre Pak e ofer sakrifis konplet lo lotel SENYER, dapre lord ki lerwa Zozyas ti'n donnen.

¹⁷ Dan sa letan, tou bann Izraelit ki ti la, ti selebre Pak ek lafet Dipen san lelven pandan set zour.

¹⁸ Zot pa ti'n selebre en tel lafet Pak depi lepok profet Samyel. Okenn lerwa Izrael pa'n zanmen organiz en selebrasyon Pak parey sa enn ki Zozyas ti selebre ansanm avek bann pret, levit, ek zabitan Zerizalenm, lepep rwayonm Zida ek Izrael ki ti la.

¹⁹ Sa selebrasyon Pak ti fer dan dizwityenm lannen renny Zozyas.

Lafen Renny Zozyas

²⁰ Apre tousala, kan Zozyas ti'n fini met lord dan tanp, Neko, lerwa Lezip ti monte pour atak lavil Karkemis lo larivyer Efrat. Zozyas ti sorti kont li.

²¹ Me Neko ti anvoy bann mesaze dir li, “Ki ou annan avek mwan, lerwa Zida? Mon pa pe vin lager kont ou, me kont en lennmi ki mon pe vin atake e Bondye in dir mwan fer vit. Pa opoz Bondye ki avek mwan, akoz i pou detri ou.”

²² Me Zozyas pa ti ekout mesaz Neko. O kontrer, san tenir kont ki sa mesaz ti sorti kot Bondye, i ti degiz li pour al konbat dan laplenn Megido.

²³ Bann tirer fles ti tir lo lerwa Zozyas ki ti dir avek son bann zonm, “Anmenn mwan, akoz mon'n ganny gravman blese.”

²⁴ Son bann zonm ti lev li dan son kales lager e met li dan son lot kales kot i ti mor. Zot ti anter li dan kavo son bann zanset. Tou bann zabitan Zerizalenm ek Zida ti port dey pour Zozyas.

²⁵ Profet Zeremi ti konpoz en kantik dey lo lerwa Zozyas. Depi sa lepok ziska ozordi, tou bann santer ek santez i fer mansyon Zozyas dan zot bann kantik dey. Sa i en koutim ki'n reste dan pei Izrael. Sa bann kantik in reste dan koleksyon Lamantasyon.

²⁶ Tou bann aksyon Zozyas, son devouman pour SENYER, son lobeisans pour lalwa SENYER,

²⁷ tou levennman son lavi, depi konmansman ziska lafen, in ganny ekri dan liv Listwar bann Lerwa Izrael ek Zida.