2 Kronik 34 - Labib An Kreol Seselwa

Zozyas, Lerwa Rwayonm Zida

¹ Zozyas ti annan 8 an ler i ti vin lerwa. I ti renny pandan 31 an dan Zerizalenm.

² I ti fer tou sa ki byen devan SENYER e i ti swiv legzanp son zanset, David. I pa ti devye pour al ni adrwat, ni agos.

Reform par Lerwa Zozyas

³ Dan wityenm lannen renny Zosyas, alor ki i ti ankor en zenn garson, i ti konmans aprann lavolonte Bondye parey David, son zanset. Dan douzyenm lannen son renny, i ti konmans debaras Zerizalenm ek rwayonm Zida avek bann landrwa sakre, bann poto sakre ek tou bann stati an bwa e an metal.

⁴ Zozyas ti fer demoli devan li tou bann lotel Baal e anmenmtan kraz bann lotel lansan ki ti lo la. I ti koup bann poto sakre e kraz bann stati. Tousala ti ganny brile e lasann ti ganny fannen lo latonm bann pret ki'n ofer sakrifis.

⁵ Zot ti osi bril lezo sa bann pret lo sa bann menm lotel. Konmsa ki Zozyas ti pirifye Zerizalenm ek rwayonm Zida.

⁶ I ti pas dan bann lavil Manase, Efraim, Simeon ek Neftali e fer fouy parmi bann batiman anrin dan zalantour.

⁷ I ti demoli bann lotel e kraz an pti morso tou bann ros sakre ek bann stati, e detri tou bann lotel lansan dan pei Izrael antye. Apre, i ti retourn Zerizalenm.

Liv Lalwa I Ganny Dekouver

⁸ Dan dizwityenm lannen renny Zozyas, apre ki i ti'n pirifye pei ek tanp, i ti donn lord Safann, garson Asalya, Maaseya, gouverner lavil, ek Yoas, garson Yoakaz, arsivis lerwa, pour al repar tanp SENYER, son Bondye.

⁹ Zot ti al kot Gran-Pret Hilkiya e donn larzan ki dimoun ti'n anmase pour tanp Bondye. Bann levit ki gard lantre ti'n rekolte sa larzan avek bann zabitan Manase ek Efraim, ek tou leres pep Izrael ek zabitan Zida, Benzamen ek Zerizalenm.

¹⁰ Sa larzan ti ganny remet avek bann zonm responsab pour travayer dan tanp SENYER, pour fer reparasyon ek renovasyon tanp SENYER.

¹¹ Konmsa, sarpantye, mason ek lezot zouvriye ti ganny larzan pour aste ros ki'n ganny taye, dibwa pour fer baro ek pontir pour soutenir batiman ki bann lerwa rwayonm Zida ti'n les tonm anrin.

¹² Bann travayer ti fer en bon travay. Zot ti anba responsabilite levit Yahat ek Abdyas, sorti dan fanmir Merari, Zakari ek Mesoulanm, dan klan bann Kehatit. Ti annan osi lezot levit, ki ti bann bon mizisyen.

¹³ Zot ti ansarz bann porter e diriz tou lezot travayer dapre zot metye; ti annan osi bann levit ki ti skrib, administrater ek portye.

¹⁴ Letan zot ti pe tir larzan ki zot ti'n anmennen dan tanp SENYER, pret Hilkiya ti dekouver liv lalwa SENYER ki ti'n ganny donnen par lentermedyer Moiz.

¹⁵ Alor, Hilkiya ti dir avek skrib Safann, “Mon'n trouv liv lalwa dan tanp SENYER.” I ti remet sa liv avek Safann.

¹⁶ Safann ti donn sa liv avek lerwa e i ti soumet son rapor: Ou bann travayer pe fer travay ki zot ti'n ganny demande pour fer.

¹⁷ Bann pret in remet tou larzan ki ti dan kof tanp avek bann sef ki ti ansarz travay e zot in pey bann zouvriye.

¹⁸ Safann ti dir lerwa, “Gran-Pret Hilkiya in donn mwan en liv.” Safann ti lir sa liv devan lerwa.

¹⁹ Kan lerwa ti antann parol ki ti sorti dan liv lalwa, i ti desir son lenz.

²⁰ Apre, i ti fer apel Hilkiya, Aikanm, garson Safann, Abdonn, garson Mise, skrib Safann ek Asaya en serviter lerwa. I ti dir zot,

²¹ “Al konsilte avek SENYER pour mwan e pour leres pep Izrael ek Zida, konsernan konteni sa liv ki nou'n fek dekouver. I vre ki nou bann zanset pa'n obei bann komannman ki ladan, e zot in sibir konsekans gran lakoler SENYER kont nou.”

²² Hilkiya avek lezot zonm ki lerwa ti'n swazir, ti al kot profetes Houlda, en zabitan Nouvo Zerizalenm, fanm Saloum, garson Tokat, pti zanfan Hasra ki ti responsab bann lenz dan tanp. Sa bann zonm ti met devan Houlda sa sityasyon ki ti rezon zot vizit.

²³ Alor, Houlda ti dir zot al dir lerwa: La sa ki SENYER, Bondye Izrael i deklare: Al dir sa zonm ki'n anvoy zot kot mwan:

²⁴ La sa ki SENYER i deklare: Mon pe anvoy maler lo Zerizalenm ek son zabitan. Mon pou fer realize tou sa bann malediksyon ki'n ekri dan sa liv e ki'n ganny lir devan lerwa Zida.

²⁵ Akoz zot in abandonn mwan e zot in ofer lansan devan lezot bondye, zot in fer monte mon lakoler par zot bann aksyon. Alor, mon lakoler pou tonm lo sa lavil e i pa pou kalme.

²⁶ Kanta lerwa Zida ki'n anvoy zot rod konsey SENYER, zot ava dir li: La sa ki SENYER, Bondye Izrael i deklare: Ou'n antann tou sa bann parol.

²⁷ Ou leker in ganny touse e ou'n imilye ou devan mwan ler ou ti antann tou sa bann parol kont Zerizalenm e kont son bann zabitan. Ou'n imilye ou devan mwan, ou'n desir ou lenz e ou'n plere. Alor, mwan osi mon'n antann ou, SENYER i deklare.

²⁸ Mon pou les ou mor anpe, e ou ava al dan ou tonbo san war sa bann maler ki mon pe anvoy lo Zerizalenm ek son zabitan. Zot ti raport sa mesaz avek lerwa.

Zozyas I Renouvle Lalyans avek Bondye

²⁹ Lerwa ti fer rasanble bann ansyen dan Zida ek Zerizalenm.

³⁰ I ti mont dan tanp SENYER akonpannyen avek tou bann zonm Zida ek zabitan Zerizalenm, bann pret ek levit, tou dimoun, ris koman pov. Lerwa ti lir devan zot tou, parol lalyans ekri dan sa liv ki ti'n ganny dekouver dan tanp SENYER.

³¹ I ti debout dan son plas e i ti renouvle lalyans avek SENYER, pour swiv SENYER e obeir son bann komannman, bann lalwa ek bann regleman avek tou zot leker, e pour obeir tou parol lalyans ki'n ekri dan sa liv.

³² Apre, i ti demann tou dimoun dan Zerizalenm e dan teritwar Benzamen pour fer sa promes. Alor, tou zabitan Zerizalenm ti promet pour zot respekte lalyans avek Bondye zot zanset.

³³ Zozyas ti fer disparet tou bann pratik degoutan ki ti sorti dan tou bann pei e dan teritwar Izrael. I ti fer tou bann zabitan Izrael retournen pour servi SENYER, zot Bondye. Pandan tou lavi Zozyas, pep Izrael ti servi SENYER, Bondye zot zanset.