2 Kronik 33 - Labib An Kreol Seselwa

Manase, Lerwa Rwayonm Zida

¹ Manase ti annan 12 an ler i ti vin lerwa. I ti renny pandan 55 an dan Zerizalenm.

² I ti fer sa ki mal devan SENYER. I ti swiv tou bann pratik degoutan parey lezot bann nasyon ki SENYER ti'n fer disparet devan bann Izraelit.

³ I ti rekonstri bann landrwa sakre ki son papa Ezekyas ti'n detri e retabli bann lotel pour ladorasyon bann Baal. I ti remet an plas bann poto Asera e ador bann zetwal dan lesyel.

⁴ I ti etabli bann lotel dan tanp SENYER. Lo sa size SENYER ti'n dir: Mon pou touzour gard mon prezans dan Zerizalenm.

⁵ Dan tou le de lakour tanp SENYER, i ti konstri bann lotel pour ladorasyon tou bann zetwal.

⁶ I ti ofer son bann garson koman sakrifis dan dife, dan vale Inonm. I ti pratik divinasyon, sorselri, konsilte bann ki predir lavenir ek bann ki envok dimoun mor. Deplizanpli, i ti fer sa ki mal devan SENYER pour fer son lakoler monte.

⁷ I ti plas en stati ki i ti'n fer dan tanp Bondye. Pourtan Bondye ti'n dir avek David ek son garson, Salomon: Isi, dan sa tanp, dan Zerizalenm ki mon'n swazir parmi tou bann tribi Izrael, ki mon pou gard mon prezans pour touzour.

⁸ Si pep Izrael i obei tou mon bann komannman, bann lalwa, ek bann regleman ki mon'n donn zot par lentermedyer Moiz, mon pa pou fer zot al dan tou kote, lwen avek sa pei ki mon ti donn zot zanset.

⁹ Me Manase ti fer egare bann zabitan Zida ek Zerizalenm pour fer ankor pir ki bann nasyon ki SENYER ti detri pour donn plas Izrael.

Manase I Repanti

¹⁰ SENYER ti koz avek lerwa Manase ek son pep, me zot pa ti pran okenn ka.

¹¹ Alor, SENYER ti anvoy bann komandan ek larme lerwa Asiriyen kont zot. Zot ti pran Manase prizonnyen, kros li avek lanmson, anmar li avek lasenn an bronz e anmenn li Babilonn.

¹² Dan son gran maler, Manase ti sipliy faver SENYER son Bondye e i ti imilye li bokou devan Bondye son bann zanset.

¹³ I ti priye, e Bondye ti aksepte son demann, e ekout son bann siplikasyon. I ti fer li retourn Zerizalenm dan son rwayonm. Alor, Manase ti rekonnet ki SENYER i li menm Bondye.

¹⁴ Apre, i ti fer konstri en miray proteksyon an deor lavil David ki ti pas lo kot Was avek Gihonn, dan vale ki al ziska laport Pwason. Manase ti antour Ofel avek en miray. I ti osi plas bann sef militer dan tou bann lavil fortifye dan Zida.

¹⁵ I ti retir tou bann bondye etranze ek bann stati ki i ti'n plas dan tanp SENYER, avek tou bann lotel ki i ti'n etabli lo montanny tanp, dan Zerizalenm e zet tousala an deor lavil.

¹⁶ I ti osi rekonstri lotel SENYER, kot i ti ofer sakrifis lape ek rekonesans. I ti demann pep Zida pour ador SENYER, Bondye Izrael.

¹⁷ Lepep ti kontinyen ofer sakrifis dan bann landrwa sakre dan pei, selman an loner SENYER, son Bondye.

¹⁸ Tou leres bann aksyon Manase ek lapriyer ki i ti adres son Bondye in ganny ekri dan liv Listwar bann Lerwa Izrael. Ladan, i annan osi bann mesaz ki i ti'n resevwar sorti kot SENYER, Bondye Izrael, par lentermedyer bann profet.

¹⁹ Son lapriyer e lafason ki Bondye ti ekout li, son bann pese ek lenfidelite anver Bondye in ganny ekri dan Liv Listwar Hozai. Sa liv i osi donn non bann landrwa kot Manase ti konstri bann landrwa sakre, kot i ti plas bann poto sakre ek bann stati, avan son imilyasyon.

²⁰ Kan Manase ti mor, zot ti anter li dan son lakour. Son garson Amonn ti vin lerwa dan son plas.

Renny Lerwa Amonn

²¹ Amonn ti annan 22 an kan i ti vin lerwa. I ti renny pour 2 an dan Zerizalenm.

²² I ti fer sa ki mal devan SENYER, parey son papa, Manase ti fer. Amonn ti ofer sakrifis devan tou stati ki son papa ti fer e adore.

²³ I pa ti imilye li devan SENYER parey son papa, Manase. I ti komet bokou plis fot ankor.

²⁴ En bann serviter ti fer konplo kont li e zot ti touy li dan son pale.

²⁵ Me pep Zida ti touy tou bann ki ti dan sa konplo kont lerwa Amonn. Zot ti met Zozyas, son garson, koman lerwa dan son plas.