2 Kronik 32 - Labib An Kreol Seselwa

Senakerib I Atak Rwayonm Zida

¹ Apre ki Ezekyas ti'n montre son fidelite anver SENYER, Senakerib, lerwa Asiri, ti atak rwayonm Zida e pran son bann lavil fortifye.

² Ler Ezekyas ti war ki Senakerib ti annan lentansyon atak Zerizalenm,

³ i ti propoz avek son bann zofisye ek bann gerye pour bous tou bann sours delo an deor lavil. Zot ti aprouv son lide.

⁴ En kantite dimoun ti rasanble; zot ti bous tou bann sours delo ki koul dan milye pei. Zot ti dir: Fodre pa ki ler bann Asiriyen i arive, zot trouv delo annabondans.

⁵ Avek determinasyon, Ezekyas ti fer rekonstri miray lavil kot ti'n kase. I ti fer konstri bann tour ek en lot miray an deor. Dan lavil David, i ti fer ranforsi miray an deor; i ti fer fabrik en kantite lans ek boukliye.

⁶ I ti swazir bann komandan militer pour bann zabitan Zerizalenm e i ti rasanble zot kot laport lavil pour ankouraz zot:

⁷ Pran kouraz e reste byen for! Pa per lerwa Asiriyen avek son gran larme; sa enn ki avek nou, i pli for ki zot.

⁸ Avek li, i annan zis lafors imen, me SENYER, nou Bondye i avek nou. Li menm nou sekour e i pou konbat dan nou plas. Parol Ezekyas, lerwa Zida, ti donn konfyans lepep.

Senakerib I Menas Zerizalenm

⁹ Apre sa, Senakerib, lerwa Asiriyen, ki ti'n anserkle lavil Lakis avek tou son bann zonm, ti anvoy enn son serviter avek en mesaz pour Ezekyas, lerwa Zida, e pour pep Zida antye ki ti Zerizalenm:

¹⁰ La sa ki Senakerib, lerwa Asiri i dir: Dan lekel ki zot met zot konfyans pour reste Zerizalenm pandan latak?

¹¹ Kan lerwa Ezekyas i dir zot: SENYER, nou Bondye, pou delivre nou dan pouvwar lerwa Asiriyen, i pe anbet zot pour fer zot mor par lafanmin e par laswaf.

¹² Annefe, pa Ezekyas li menm ki ti fer disparet bann landrwa sakre ek bann lotel SENYER? Pa li menm ki ti donn sa lord bann zabitan Zerizalenm ek Zida: Zot ava ador SENYER devan en sel lotel e ofer sakrifis zis lo sa lotel?

¹³ Zot pa konnen sa ki mwan ek mon zanset nou'n fer avek pep lezot pei? Eski bann bondye sa bann nasyon ti kapab delivre zot pei dan mon lanmen?

¹⁴ Lekel parmi bann bondye sa bann nasyon ki mon bann zanset in detri, napa enn ki'n kapab delivre son pep dan mon lanmen.

¹⁵ Aprezan, pa les Ezekyas tronp zot e anmenn zot dan move semen. Pa krwar li! Napa okenn bondye parmi sa bann nasyon ki'n kapab delivre son pep dan mon lanmen, ni dan lanmen mon bann zanset. Alor, pa krwar ki zot bann bondye pou kapab delivre zot dan mon lanmen.

¹⁶ Bann mesaze Senakerib ki kontinyen koz kont SENYER Bondye e kont Ezekyas, son serviter.

¹⁷ Senakerib ti osi ekri en let pour ensilte SENYER, Bondye Izrael. I ti dir: Parey bann bondye sa bann nasyon pa'n kapab delivre zot pep dan mon lanmen, Bondye Ezekyas osi pa pou kapab delivre son pep dan mon lanmen.

¹⁸ Zot ti kriy sa byen for dan langaz Ebre devan pep Zerizalenm. Zot lentansyon ti pour fer per e dekouraz pep Zerizalenm ki ti lo miray, pour zot esey pran lavil.

¹⁹ Zot ti koz lo Bondye Zerizalenm dan menm fason ki zot ti koz lo bondye lezot nasyon lo later, ki'n ganny fer par lanmen zonm.

²⁰ Apre sa, lerwa Ezekyas ek profet Ezai, garson Amoz, ti priye e kriye ver lesyel.

²¹ SENYER ti anvoy en lanz ki ti detri tou bann vayan gerye ek bann komandan dan kan lerwa Asiriyen. Alor, lerwa Asiriyen, kouver avek laont, ti retourn dan son pei. Plitar, ler i ti antre dan tanp son bondye, serten son bann prop garson ti touy li avek lepe.

²² Konmsa ki SENYER ti delivre Ezekyas ek pep Zerizalenm anba latak Senakerib, lerwa Asiri ek tou son bann lennmi. Zot ti ganny lape par tou kote.

²³ Bokou dimoun ti anmenn bann lofrann pour SENYER dan Zerizalenm, avek kado presye pour Ezekyas, lerwa Zida. Depi sa, bann nasyon ti annan gran respe pour li.

Maladi Ezekyas

²⁴ Dan sa letan, Ezekyas ti tonm malad e i ti pre pour mor. I ti priy SENYER ki ti reponn e donn li en siny.

²⁵ Me Ezekyas pa ti montre rekonesans pour benediksyon ki i ti gannyen; i ti plito montre larogans. SENYER ti ankoler kont li, kont Zida e kont Zerizalenm.

²⁶ Me, malgre son larogans, Ezekyas ti anfen imilye li avek tou bann zabitan Zerizalenm. Lakoler SENYER ti apeze e i pa ti reazir kont zot pandan renny Ezekyas.

Larises Ezekyas

²⁷ Ezekyas ti tre ris e zot ti kouver li avek gran loner. I ti fer konstri plizyer kof for pour plas son trezor: Larzan ek lor, pyer presyez, lesans, bann boukliye ek toudsort lobze valer.

²⁸ I ti osi fer konstri bann magazen rezerv pour dible, diven, delwil, bann park ek bann lanklo pour son bann troupo bef ek mouton.

²⁹ I ti menm fer konstri bann lavil pour li. I ti posed en kantite troupo mouton, kabri ek bef. Bondye ti'n donn li bokou larises.

³⁰ Lerwa Ezekyas ki ti fer detourn delo sours Giyonn pour anmenn delo ver Was dan lavil David. Ezekyas ti prospere dan tou sa ki i ti antreprann.

³¹ Me dan zafer bann anbasader ki ti sorti Babilonn, Bondye ti les li lib pour teste li, pour war tou sa ki i ti annan dan fon son leker. Bann sef Babilonyen ti anvoy mesaze pour kestyonn li lo levennman ekstraordiner ki'n arive dan son pei.

³² Tou lezot aksyon Ezekyas, tou son fidelite anver SENYER, in ganny ekri dan vizyon profet Ezai, garson Amoz, dan Liv bann Lerwa Zida ek Izrael.

³³ Kan Ezekyas ti mor, i ti ganny antere dan seksyon siperyer kavo bann desandan David. Tou zabitan Zida ek Zerizalenm ti onor son lanmor. Son garson Manase ti vin lerwa dan son plas.