2 Kronik 31 - Labib An Kreol Seselwa

Ezekyas I Organiz Servis Tanp

¹ Kan lafet ti fini, tou Izraelit ki ti prezan, ti al dan bann lavil Zida. Zot ti demoli bann ros sakre ki ti'n ganny plase. Zot ti kraz bann ros sakre e detri tou bann landrwa sakre avek zot bann lotel partou dan Zida ek Benzamen, dan Efraim ek Manase. Apre, tou bann Izraelit ti al se zot dan zot prop lavil, sakenn dan son propriyete.

² Ezekyas ti retabli bann group pret ek levit sakenn dapre son responsabilite, pret ek levit pour swa bann sakrifis konplet ek sakrifis lakominyon, swa dan servis SENYER pour sante e aklanmen.

³ Lerwa ti donn kontribisyon sorti dan son prop byen pour sakrifis konplet: Sakrifis konplet bomaten ek aswar, sakrifis konplet pour saba, pour nouvellin, pandan lezot lafet parey in ekri dan lalwa SENYER.

⁴ I ti donn lord ki tou zabitan Zerizalenm i donn son par ki devre vin pour pret ek levit, pour ki zot ava kapab konsakre zot letan avek lalwa SENYER.

⁵ De ki lord ti ganny anonse, bann Izraelit ti anmenn en kantite zot premye rekolt: Dible, diven, delwil, dimyel, ek lezot prodwi sorti dan zot plantasyon. Zot ti osi anmenn en gran kantite ladim lo tou zot rekolt.

⁶ Tou bann zabitan Izrael ek Zida ki ti reste dan bann lavil Zida, ti osi anmenn ladim lo bef ek mouton, lo bann keksoz konsakre pour SENYER, zot Bondye. Zot ti met tousala ansanm e fer bann gro ta.

⁷ Zot ti konmans fer sa depi trwazyenm mwan e fini dan setyenm mwan.

⁸ Ler Ezekyas ek bann sef ti vini e war sa bann don, zot ti loue SENYER, e remersye pep Izrael.

⁹ Lerwa Ezekyas ti kestyonn bann pret ek bann levit konsernan sa bann lobze an ta.

¹⁰ Alor Gran-Pret Azarya, ki sorti dan fanmir Sadok ti reponn, “Depi ki lepep in konmans anmenn zot kontribisyon dan tanp SENYER, nou'n ganny ase manze e in menm reste, akoz SENYER in beni son pep; la sa kantite ki'n reste.”

¹¹ Alor, lerwa Ezekyas ti donn lord konstri bann lasal rezerv dan tanp SENYER, e zot ti fer li.

¹² Lepep ti anmenn regilyerman zot prodwi, zot ladim ek bann lofrann sakre. Levit Konanya ti annan responsabilite pour sa bann don; son frer Simei ti asiste li.

¹³ Lerwa Ezekyas ek Gran-Pret Azarya, sef tanp, ti donn lord pour nonm sa bann lenspekter: Yeyel, Azazya, Nahat, Asael, Yeremot, Yozabad, Elyel, Yismakya, Mahat, ek Benaya; zot tou, zot ti anba direksyon Konanya ek son frer Simei.

¹⁴ Kore, garson Yimna, ki ti levit, portye pour laport Les, ti ansarz bann don volonter ki zot ti ofer Bondye. I ti osi responsab pour distribye sa bann lofrann konsakre pour SENYER, ensi ki lezot lofrann.

¹⁵ Dan lavil bann pret anba son responsabilite, ti annan: Edenn, Minyamin, Zozye, Semaya, Amaria ek Sekanya pour partaz manze regilyerman avek son bann konpatriyot san tenir kont laz, dapre fonksyon e dapre zot group.

¹⁶ Zot ti osi donn en par sak zonm ki ti'n anrezistre depi laz 3 an, an montan, bann ki vin dan tanp SENYER pour servis tou le zour, dapre zot fonksyon e dapre zot group.

¹⁷ Bann pret ti ganny anrezistre dapre fanmir, tandis ki bann levit, apartir laz 20 an, an montan, dapre fonksyon e dapre group;

¹⁸ osi tou bann dan lasanble ti ganny anrezistre avek zot fanmir: Zanfan, fanm, garson ek fiy, akoz zot ti fidel e kontinyelman reste sen pour servis sanktyer.

¹⁹ Pour bann pret dan fanmir Aaron, ki viv dan lakanpanny pre avek bann lavil pret, ti annan dan sak lavil bann ki ti'n ganny swazir pour fer distribisyon manze avek tou pret ek levit ki ti lo zot lalis.

²⁰ Ezekyas ti fer tousala dan rwayonm Zida antye. I ti fer tou avek fidelite. I ti azir byen avek lazistis devan SENYER, son Bondye.

²¹ Tou sa ki i ti fer pour servis tanp Bondye, dapre lalwa ek komannman, i ti fer avek tou son leker pour Bondye e i ti prospere.