2 Kronik 30 - Labib An Kreol Seselwa

Ezekyas I Fer Preparasyon pour Selebre Pak

¹ Ezekyas ti anvoy mesaz kot Izrael antye ek Zida, e i ti ekri let pour envit Efraim ek Manase dan tanp SENYER dan Zerizalenm, pour selebre Pak an loner SENYER, Bondye Izrael.

² Lerwa, bann sef ek tou lasanble dan Zerizalenm, ti'n deside selebre Pak dan dezyenm mwan.

³ Selebrasyon pa ti kapab ganny fer dan son letan normal, akoz ti napa ase pret ki ti'n pirifye zot; anplis lepep pa ti'n rasanble Zerizalenm. Alor zot pa ti kapab fer selebrasyon.

⁴ Sa desizyon ti sanble bon pour lerwa ek lepep antye.

⁵ Alor, zot ti deside anvoy en proklanmasyon atraver Izrael antye, depi Berseba ziska Dann. Zot ti demann lepep pour rasanble Zerizalenm e selebre Pak an loner SENYER, Bondye Izrael. Pa bokou dimoun ti pe selebre parey ti'n ganny ordonnen.

⁶ Alor, parey lerwa ti'n donn lord, bann mesaze ti al partou atraver Izrael ek Zida avek let sorti kot lerwa ek bann sef: Pep Izrael, retourn kot SENYER, Bondye Abrahanm, Izaak, ek Izrael, pour li retourn ankor ver zot, leres Izrael, ki'n sape dan lanmen bann lerwa Asiri.

⁷ Pa fer parey zot bann zanset ek zot bann frer, ki ti enfidel anver SENYER, Bondye zot zanset ki'n livre zot dan dezolasyon, parey zot war.

⁸ Aprezan, aret antete parey zot zanset, me soumet zot anver SENYER; vin dan son sanktyer ki i'n konsakre pour touzour. Servi SENYER zot Bondye, pour li detourn kont zot son gran lakoler.

⁹ Si zot retourn ver SENYER, alor bann ki pe gard zot frer ek zot zanfan prizonnyen, ava pran konpasyon pour zot e ava les zot retourn dan zot pei. SENYER zot Bondye i bon e i ranpli avek konpasyon. I pa pou detourn kont zot, si zot retourn ver li.

¹⁰ Bann mesaze ti al dan en lavil apre lot dan teritwar Efraim ek Manase, ziska Zabilon. Me dimoun ti zis riye e gognard zot.

¹¹ Pourtan, detrwa dimoun dan tribi Aser, Manase ek Zabilon ti rekonnet zot tor e zot ti al Zerizalenm.

¹² Dan rwayonm Zida osi, Bondye ti avek bann zabitan pour gard zot ini e dakor pour obei lord ki lerwa ek bann sef in donnen dapre parol SENYER.

Selebrasyon Pak

¹³ Dan dezyenm mwan lannen, en gran lafoul dimoun ti rasanble Zerizalenm pour selebre lafet dipen san lelven.

¹⁴ Zot ti demoli bann lotel ki ti dan Zerizalenm, fer disparet bann lotel lansan e zet zot dan vale Sedron.

¹⁵ Dan katorzyenm zour, sa dezyenm mwan, zot ti touy bann mouton pour lafet Pak. Avek kanmizri, bann pret ek levit ti konsakre zot pour zot kapab ofer sakrifis konplet dan tanp SENYER.

¹⁶ Zot ti plas zot dan lord dapre lalwa Moiz, serviter Bondye. Bann pret ti asperz disan ki bann levit ti pas avek zot.

¹⁷ Dan lasanble, bokou dimoun pa ti'n pirifye zot pour ofer sakrifis SENYER. Alor, bann levit ti bezwen egorz bann mouton Pak, pour tou bann ki pa ti'n pirifye zot e ki pa ti kapab ofer zot mouton pour SENYER.

¹⁸ Bokou parmi lepep ki ti sorti dan teritwar Efraim, Manase, Isakar ek Zabilon pa ti'n pirifye zot. Me zot ti kantmenm manz repa Pak, kontrerman avek regleman. Alor, Ezekyas ti priy pour zot: SENYER, dan ou bonte, pardonn zot tou,

¹⁹ ki pe vin avek tou zot leker ver ou, SENYER, Bondye zot zanset, menm si zot pa pir parey lalwa sanktyer i egzize.

²⁰ SENYER ti ekout Ezekyas e i ti eparny lepep.

²¹ Tou bann Izraelit ki ti prezan dan Zerizalenm ti selebre lafet dipen san lelven dan lazwa pandan set zour, tandis ki bann levit ek bann pret ti sante e selebre SENYER avek tou zot lafors, tou le zour, akonpannyen par lenstriman lanmizik pwisan an loner SENYER.

²² Ezekyas ti ankouraz bann levit ki ti montre bon disernman anver servis SENYER. Pandan set zour, lepep ti partisip dan bann repa Pak. Zot ti ofer sakrifis lakominyon e sant louanz an loner SENYER, Bondye zot zanset.

²³ Lasanble antye ti deside pour kontiny lafet pandan ankor set zour e zot ti kontinyen selebre dan lazwa.

²⁴ Lerwa Ezekyas ti fourni lasanble avek 1,000 toro ek 7,000 mouton pour lofrann. Bann sef osi ti donn 1,000 toro ek 10,000 mouton ek kabri. En kantite pret ti pirifye zot.

²⁵ Tou dimoun dan Zida ti selebre dan lazwa, ansanm avek bann pret ek bann levit, bann Izraelit ki ti'n sorti dan rwayonm Nor, menm bann ki ti'n vin enstal zot dan teritwar Zida.

²⁶ Ti annan gran lazwa dan Zerizalenm, akoz depi Salomon, garson David, lerwa Izrael, pa ti'n zanmen annan en tel selebrasyon dan Zerizalenm.

²⁷ Bann pret ek bann levit ti debout e beni lepep. Lao dan lesyel, Bondye, ti ekout zot lapriyer.