2 Kronik 28 - Labib An Kreol Seselwa

Akaz, Lerwa Zida

¹ Akaz ti annan 20 an ler i ti vin lerwa. I ti renny pandan 16 an dan Zerizalenm. Son bann aksyon, kontrerman avek pour son zanset David, pa ti fer plezir SENYER.

² Son konportman ti move, parey bann lerwa Izrael. I ti menm fer bann stati an metal pour bann bondye Baal.

³ I ti bril sakrifis dan Vale Inonm e menm bril son bann garson dan dife, koman sakrifis. I ti swiv bann pratik degoutan bann nasyon ki SENYER ti'n pouse pour fer plas pour pep Izrael.

⁴ I ti ofer sakrifis dan bann landrwa sakre, lo latet kolin e anba tou zarbis ver.

Lager kont Siri ek Izrael

⁵ Alor, SENYER son Bondye ti livre li dan lanmen lerwa Siri. Bann Siriyen ti bat li e pran en kantite prizonnyen ki ti ganny anmennen Damas. Akaz ti tonm osi dan lanmen lerwa Izrael ki ti donn li en bon bate.

⁶ Dan en sel zour, Peka, garson Remalia, ti touy 120,000 zonm, bannbrav gerye, dan rwayonm Zida akoz zot ti'n abandonn SENYER, Bondye zot zanset.

⁷ Zikri, en konbatan Efraim, ti touy Maseya, garson lerwa Zida, Azrikanm, komandan pale rwayal ek Elkana, segon apre lerwa.

⁸ Bann Izraelit ti pran 200,000 prizonnyen: Fanm, garson, fiy parmi zot prop pep e depouy zot avek bokou zot bann byen ki zot ti anmenn Samari.

⁹ En profet ki ti apel Oded, ti al zwenn larme ki ti pe retourn Samari. I ti dir zot, “SENYER, Bondye ou bann zanset, dan son lakoler kont zabitan Zida in abandonn zot dan ou lanmen. Me ou'n masakre zot avek telman vyolans ki menm lesyel in pran sa an kont.

¹⁰ Aprezan, zot oule fer sa bann zonm ek fanm Zerizalenm vin lesklav. Zot menm, pa zot in fer pese kont SENYER zot Bondye?

¹¹ Alor, ekout mwan: Fer sa bann prizonnyen ki zot in pran parmi zot frer, retourn kot zot, akoz SENYER pou tourn son gran lakoler kont zot.”

¹² Serten zonm parmi bann sef Efraim, Azarya, garson Yoanann, Berekya, garson Mesilemot, Ezekyas garson Saloum, Amasa, garson Hadlai, ti kont sa bann ki ti sorti lager.

¹³ Zot ti dir, “Ou pa pou anmenn sa bann prizonnyen isi. Zot pou fer nou responsab pour en fot grav anver SENYER. Eski zot oule ogmant nou pese ek nou fot? Nou deza koupab e SENYER i byen ankoler kont Izrael.”

¹⁴ Alor, bann gerye ti larg bann prizonnyen, la devan tou bann sef e devan lasanble. Zot ti kit bann piyaz lager.

¹⁵ Bann zonm ti ganny nonmen pour pran swen bann prizonnyen. Zot ti pran dan bann piyaz lager lenz pour donn bann ki ti touni ek sandal pour bann ki ti bezwen. Zot ti osi donn zot manze ek bwar, pans zot blesir e anmenn lo bourik, bann ki pa ti kapab marse, ziska Zeriko, lavil Palm, kot zot fanmir. Apre, zot ti retourn Samari.

Akaz i Demann Led Asiri

¹⁶ Dan sa lepok, lerwa Akaz ti anvoy demann led, lerwa Asiri.

¹⁷ Annefe, bann Edomit ti'n vin atak rwayonm Zida ankor e pran bann prizonnyen.

¹⁸ Bann Filisten ti atak bann lavil ki dan bann bafon, dan Sid Zida. Zot ti pran Bet-Semes, Ayalonn ek Gederot, Soko, Timna, Gimzo ek lezot vilaz dan vwazinaz, kot zot ti'n enstal zot.

¹⁹ SENYER ti'n imilye rwayonm Zida, akoz lerwa Akaz ki'n trenn pep Zida dan dekadans e li menm in enfidel anver SENYER.

²⁰ Alor, Teglat-Pilneser, lerwa Asiri ti vini; me olye ede i ti atak li.

²¹ Akaz ti'n pran en pe lobze dan tanp SENYER, dan pale rwayal e dan lakaz bann sef pour ofer koman prezan lerwa Asiri; me sa pa ti servi dan nanryen.

Bann Pese Akaz

²² Pandan sa bann moman kritik, Akaz ti fer plis sakrilez kont SENYER.

²³ I ti ofer sakrifis bann bondye Damas ki ti'n fer li perdi lager. La sa ki i ti mazinen: Si bann bondye lerwa Siri in ed zot, li osi i ava ofer sakrifis pour zot ed li. Me sa ti pour son maler e maler Izrael antye.

²⁴ Akaz ti rasanble tou bann lobze sakre dan tanp SENYER, e kas zot an morso. I ti ferm laport tanp SENYER. I ti konstri bann lotel dan tou kwen Zerizalenm.

²⁵ I ti etabli bann landrwa sakre dan sak lavil dan rwayonm Zida pour ofer lansan lezot bondye. Sa ti provok lakoler SENYER, Bondye son zanset.

²⁶ Tou lezot aksyon Akaz, premye ziska dernyen, in ganny ekri dan liv bann lerwa Zida ek lerwa Izrael. Sa liv i rakont tou sa ki i'n fer.

²⁷ Ler i ti mor, i ti ganny antere dan lavil Zerizalenm, me pa dan kavo bann lerwa Izrael. Son garson Ezekyas ti vin lerwa dan son plas.