2 Kronik 26 - Labib An Kreol Seselwa

Ozyas, Lerwa Zida

¹ Pep Zida ti swazir Ozyas ki ti annan 16 an, pour fer li vin lerwa dan plas son papa Amasya.

² Apre lanmor son papa, i ti rekonstri lavil Eilat e rann li avek Zida.

³ Ozyas ti annan 16 an ler i ti vin lerwa e i ti renny 52 an dan Zerizalenm. Son manman ki ti sorti Zerizalenm, ti apel Yekolya.

⁴ Son bann aksyon ti fer plezir SENYER, parey son papa, Amasya.

Ozyas pa Reste Fidel

⁵ Ozyas ti fer tou pour servi Bondye toultan ki Zakari ti vivan. Zakari ti annan vizyon Bondye e ti ansenny li respe pour Bondye. SENYER ti fer li prospere osi lontan ki i ti servi li.

⁶ Ozyas ti al lager kont bann Filisten, detri bann miray lavil Gat, Yabne ek Asdod. I ti konstri bann lavil dan Asdod e dan teritwar Filisten.

⁷ Bondye ti ed li kont bann Filisten, kont bann Arab ki ti reste Gour-Baal e kont bann Maonit.

⁸ Bann Amonit ti pey taks avek Ozyas, akoz i ti'n vin tre pwisan e son repitasyon ti ariv ziska lo frontyer Lezip.

⁹ Ozyas ti osi konstri bann tour sekirite dan Zerizalenm, kot laport Kwen, laport Vale e kot kwen miray.

¹⁰ I ti konstri tour geter dan dezer e fouy en kantite pwi, akoz i ti annan bokou zannimo dan bann bafon e dan laplenn. I ti anploy labourer pour kiltiv son bann plantasyon, plantasyon rezen e dan bann kolin e dan bann landrwa fertil, akoz i ti kontan kiltiv later.

¹¹ Ozyas ti osi annan en larme ki ti touzour pare pour lager, par reziman dapre resansman par sekreter Yeyel ek administrater Maseya. Tou le de ti anba komann Hananya, en zofisye lerwa.

¹² An tou, ti annan 2,600 komandan par sef fanmir. Tousala zot ti bann brav gerye.

¹³ Anba zot komann, ti annan en larme 307,500 brav gerye e kapab, en larme for pour defann lerwa kont son bann lennmi.

¹⁴ Ozyas ti ekip son larme antye avek boukliye, lans, kasket, pektoral proteksyon, fles ek ros anminisyon.

¹⁵ I ti fer son enzenyer konstri bann masin lager dan Zerizalenm ki i ti plas lo bann tour, ek defans lo bann kwen miray pour tir fles e anvoy bann gro ros. Repitasyon Ozyas ti fannen e i ti ganny bokou led. Pour sa rezon, i ti vin tre pwisan.

Ozyas I Ganny Pini pour Son Vantardiz

¹⁶ Me ler i ti'n vin pwisan, lorgey ti ranpli son leker e fer li tonbe. I pa ti fidel anver SENYER son Bondye. I ti fer en sakrilez: I ti antre dan tanp SENYER pour bril lansan lo lotel lansan.

¹⁷ Gran-Pret Azarya, avek 80 pret brav e kouraze ti swiv li.

¹⁸ Zot ti opoz lerwa Ozyas. Zot ti dir li, “Ou napa drwa bril lansan an loner SENYER. Sa drwa i rezerve pour bann pret, desandan Aaron, ki'n ganny konsakre pour bril lansan. Sorti dan sanktyer, akoz ou pe komet en sakrilez, sa i pou en dezoner devan SENYER Bondye.”

¹⁹ Ozyas ki ti annan en lansanswar dan son lanmen, ti pran en gran lakoler kont bann pret. Dan son lakoler, deswit maladi lalep ti paret lo son fron, dan prezans bann pret, devan lotel lansan, dan tanp SENYER.

²⁰ Gran-Pret Azarya ek lezot pret ti get li e zot ti war lalep lo son fron. Zot ti depese met li deor. Li menm Ozyas, ti prese pour ale, akoz i ti santi ki SENYER ti'n pini li.

Lafen Renny Lerwa Ozyas

²¹ Ozyas ti reste avek lalep ziska son lanmor. Akoz i ti ganny lalep, i ti oblize reste dan en lakaz izole; i ti napa drwa retourn dan tanp SENYER. Son garson Yotanm, sef dan pale rwayal, ti renny lo rwayonm dan son plas.

²² Lezot bann aksyon Ozyas, depi premye ziska dernyen, in ganny ekri par Ezai, garson Amoz.

²³ Kan Ozyas ti mor e ganny antere dan en propriyete bann lerwa, akoz zot ti dir, “I ganny lalep.” Alor, son garson, Yotanm, ti vin lerwa dan son plas.