2 Kronik 25 - Labib An Kreol Seselwa

Amasya, Lerwa Zida

¹ Amasya ti annan 25 an ler i ti vin lerwa e i ti renny pandan 29 an dan Zerizalenm. Son manman ki ti sorti Zerizalenm, ti apel Yehoadann.

² Son aksyon ti fer plezir SENYER, me i pa ti azir avek en leker kontan.

³ Ler i ti'n byen etabli son rwayonm, i ti fer touy bann zofisye ki ti'n asasin lerwa, son papa.

⁴ Me i pa ti touy zot bann zanfan, par respe pour lalwa ki SENYER in ordonnen dan liv Moiz: Bann paran pa pou mor pour pese zot zanfan, ni zanfan pour pese zot paran. Sakenn pou mor pour son prop pese.

⁵ Amasya ti rasanble tou bann zonm dan son rwayonm dan tribi Zida ek Benzamen. I ti plas zot dapre fanmir anba bann komandan 1000, ek bann komandan 100. I ti fer en resansman bann zennzan 20 an, an montan e i ti ganny 300,000 zonm ki kapab lager avek lans ek boukliye.

⁶ I ti osi rekrit 100,000 zonm sorti dan Izrael, pour trwa tonn larzan.

⁷ Me en profet ti al kot lerwa. I ti dir li, “Mazeste, pa les larme Izrael al lager akote ou, akoz SENYER pa avek Izrael, bann zonm ki sorti Efraim.

⁸ Si zot al avek ou dan lager, menm si ou larme i for, Bondye ki annan pouvwar donn laviktwar ek defet, pou fer ou tonbe devan lennmi.”

⁹ Amasya ti dir avek profet, “Alor ki pou arive apre ki mon'n pey tou sa larzan bann Izraelit?” Profet ti reponn, “SENYER i kapab donn ou bokou plis.”

¹⁰ Alor, Amasya ti fer ale bann troup ki ti sorti Efraim. Zot ti retourn se zot byen ankoler kont Zida.

¹¹ Amasya ti pran son kouraz e ralye son pep deryer li dan vale Disel. La, i ti touy 10,000 Edomit.

¹² Bann zonm Zida ti pran ankor 10,000 Edomit prizonnyen ki zot ti anmenn anler lo en oter. La, zot ti ganny zete dan presipis e zot tou, zot ti al kraze anba.

¹³ Kanta bann zonm ki Amasya ti'n fer ale e anpes zot pran par dan lager, ti al atak bann lavil Zida depi Samari, ziska Bet-Horonn. Zot ti touy 3,000 zonm e fer piyaz dan lavil.

¹⁴ Kan Amasya ti retournen apre son laviktwar bann Edomit, i ti fer anmenn bann stati bondye Edomit. I ti fer etabli zot koman son bondye; i ti ador zot e ofer zot lansan.

¹⁵ Alor, SENYER ti ankoler kont Amasya e anvoy en profet demann li, “Akoz ou'n al ver bondye sa pep, ki li menm pa'n kapab delivre son pep dan ou lanmen?”

¹⁶ Me letan i ti pe koze lerwa ti demann li, “Lekel ki'n nonm ou konseye lerwa? Arete si ou pa oule lanmor.” Profet pa ti ensiste, me i ti dir, “Mon konnen ki Bondye in deside detri ou pour sa ki ou'n fer e ou pa'n ekout mon konsey.”

Lager kont Izrael

¹⁷ Apre ki Amasya, lerwa Zida, ti'n tenir konsey, i ti anvoy bann mesaze kot Yoas, garson Yoakaz, garson Zehou, lerwa Izrael pour dir, “Annou konfront kanmarad.”

¹⁸ Lerwa Izrael ti fer dir Amasya, lerwa Zida, “Brousay pikan dan montanny Liban ti fer dir pye sed Liban: Donn mwan ou fiy pour marye avek mon garson! Me en zannimo sovaz Liban ti pas par la e kraz brousay pikan.

¹⁹ Ou dir ou'n bat Edonm. Ou pe montre lafyerte e ou pe fer vantar. Reste se ou aprezan. Pa rod maler; ou pou tonbe, e Zida avek ou.”

²⁰ Amasya pa ti pran kont sa mesaz. Annefe, Bondye ti oule livre li dan lanmen son bann lennmi, akoz i ti'n al ver bann bondye Edomit.

²¹ Alor Yoas, lerwa Izrael, ti sorti pour al lager. Son larme ti konfront larme Amasya dan batay Bet-Semes, ki dan teritwar Zida.

²² Zida ti ganny bate par Izrael, tou son bann zonm ti sove e retourn se zot.

²³ Yoas, lerwa Izrael, ti pran prizonnyen Amasya, garson Yoas, garson Yoakaz. I ti anmenn li Zerizalenm kot i ti demoli miray lo preski 200 met longer, ant laport Efraim ek laport Kwen.

²⁴ I ti sezi tou lor ek larzan, tou bann lobze valer ki ti dan tanp Bondye e kot Obed-Edonm, ek trezor ki ti dan pale rwayal. I ti osi pran bann otaz e retourn Samari.

Lafen Renny Amasya

²⁵ Amasya, lerwa Zida ti viv ankor 15 an apre lanmor Yoas, garson Yoakaz lerwa Izrael.

²⁶ Lezot aksyon Amasya, premye ziska dernyen, in ganny ekri dan liv Listwar bann lerwa Zida ek Izrael.

²⁷ Depi letan ki Amasya ti abandonn SENYER, serten dimoun ti mont en konplo kont li dan Zerizalenm. I ti sove pour al Lakis, kot zot ti swiv li e touy li.

²⁸ Apre, son lekor ti ganny anmennen Zerizalenm lo seval. I ti ganny antere parmi son bann zanset, dan lavil David.