2 Kronik 23 - Labib An Kreol Seselwa

Zoas I Ganny Konsakre Lerwa Zida

¹ Dan setyenm lannen, pret Yoyada ti pran kouraz. I ti fer en lalyans avek bann komandan 100: Azarya, garson Yerohanm, Ismael, garson Yohanann, Azarya, garson Obed, Maaseya, garson Adaya, Elisafat, garson Zikri.

² Tou sa bann zofisye ti al partou dan bann lavil Zida kot bann levit ek bann sef fanmir Izraelit. Zot ti retourn avek li Zerizalenm.

³ Zot ti rasanble dan tanp kot zot ti fer en lalyans avek lerwa. Yoyada ti dir zot, “La mon prezant zot garson lerwa. I ava rennyen koman lerwa dapre promes ki SENYER ti fer konsernan desandans David.

⁴ La sa ki zot devre fer: Kan bann pret ek bann levit ava vin pran servis zour saba, zot ava plas en tyer bann zonm pour gard la rantre Tanp.

⁵ En tyer ava gard pale rwayal, e en tyer ava gard laport Fondasyon. Tou dimoun ava reste dan lakour tanp.

⁶ Pa les personn antre dan tanp SENYER, sof bann pret ek levit ki pe ofisye; zot ava kapab antre, akoz zot in ganny konsakre. Leres lepep i devre respekte lord SENYER.

⁷ Tou lezot levit, sakenn avek son zarm dan lanmen, ava antour lerwa. I ava swiv li partou kot i ale. Sa enn ki esey antre dan tanp, i devre ganny touye.”

⁸ Bann levit ek pep Zida antye, ti fer tou sa ki pret Yoyada ti dir zot. Sak sef ti rasanble son bann zonm, bann ki ti pran servis saba ek bann ki ti pe termin zot servis pour sa zour. Pret Yoyada pa ti donn konze okenn group.

⁹ I ti donn sak komandan 100, bann lans, gran ek pti boukliye ki ti pour lerwa David e ki ankor la dan tanp Bondye.

¹⁰ I ti plas bann zonm devan batiman e otour lotel, depi kote Sid ziska lo kote Nor, sakenn avek son zarm, pare pour defann lerwa.

¹¹ Alor, pret Yoyada ti fer sorti Zoas, garson lerwa; i ti plas kouronn lo son latet, prezant li avek dokiman Temwannyaz. Apre, ansanm avek son bann garson, zot ti konsakre li avek delwil e proklanm li lerwa. Lepep ti kriye: Viv lerwa!

¹² Kan Atali ti antann sa tapaz lepep ki pe kriye dan lazwa pour aklanm lerwa, i ti desann kot tanp SENYER parmi bann dimoun ki ti'n rasanble.

¹³ I ti war lerwa pe debout pre avek bann kolonn kot lantre tanp. Komandan bann gerye ek bann zwer tronpet ti la obor lerwa. Popilasyon pei antye ti dan lazwa e bann mizisyen ti pe sonn tronpet. Bann santer avek zot lenstriman lanmizik ti pe diriz selebrasyon. Alor, Atali ti desir son lenz e kriye: Traizon! Traizon!

¹⁴ Pret Yoyada ti donn sa lord bann komandan gerye: Fer li sorti an deor bann ran gerye; okenn dimoun ki swiv li, ava ganny touye akoz bann pret ti'n dir: Fodre pa touy li dan tanp SENYER.

¹⁵ Alor, bann gerye ti trenn Atali dan direksyon pale rwayal e zot ti touy li kot Laport Seval.

Reform par Yoyada

¹⁶ Pret Yoyada ti etabli en lalyans ant lepep, lerwa ek li menm, pour ki zot vin pep SENYER.

¹⁷ Apre, tou dimoun ti al dan tanp Baal; zot ti demoli, kas son bann lotel ek son bann stati e touy Matann, pret Baal, devan bann lotel.

¹⁸ Apre, pret Yoyada ti plas bann pret levit parey David ti'n ordonnen pour vey lo tanp SENYER; en group pour ofer sakrifis konplet dan tanp, parey in ekri dan lalwa Moiz. I ti donn lord pour ki servis i deroul avek selebrasyon.

¹⁹ Pret Yoyada ti plas gardyen kot bann laport tanp SENYER. Apre, zot ti fer sir ki personn ki enpir pa antre pour okenn rezon.

²⁰ Pret Yoyada ti rasanble ankor bann komandan 100, bann gouverner, bann sef pei, ek bann dimoun enportan. I ti fer lerwa sorti dan tanp SENYER e ansanm, zot ti diriz ver pale rwayal dan en laprosesyon. I ti plas lerwa lo tronn rwayal.

²¹ Alor, tou dimoun ti dan lazwa. Apre ki Atali ti'n ganny touye, lavil ti retrouv son trankilite.