2 Kronik 22 - Labib An Kreol Seselwa

Akazya, Lerwa Zida

¹ Bann zabitan Zerizalenm ti swazir Akazya, pli zenn garson Yoranm, pour vin lerwa dan son plas. Annefe, tou bann gran frer ti'n ganny touye par bann zonm ki ti antre dan kan Zida ansanm avek bann Arab. Alor Akazya, garson Yoranm ti vin lerwa.

² Akazya ti annan 42 an ler i ti vin lerwa, e i ti renny enn an dan Zerizalenm. Son manman ti apel Atali e i ti pti zanfan Omri, papa Akab.

³ Akazya ti osi swiv bann move legzanp fanmir Akab, akoz move konsey son manman.

⁴ I ti fer sa ki mal parey fanmir Akab, ki pa ti fer plezir SENYER. Apre lanmor son papa, zot ti vin son konseye, me pour son maler.

⁵ I ti swiv zot konsey e al avek Yoranm, garson Akab lerwa Izrael, pour lager kont Hazael, lerwa Siri, dan lavil Ramot-Galaad. Pandan konba, bann Siriyen ti bles lerwa Yoranm.

⁶ I ti bezwen retourn Zizreel pour sonny son blesir ki i ti'n gannyen Rama, ler i ti pe konbat kont Hazael, ler Aranm. Akazya, garson Yoranm, ti al war li laba Zizreel, akoz i ti byen malad.

⁷ Bondye ti fer sa vizit kot Yoranm vin maler pour Akazya. Annefe, de ki Akazya ti arive ansanm avek Yoranm zot ti al zwenn Zehou, garson Nimsi. SENYER ti'n konsakre Zehou koman lerwa pour detri fanmir Akab.

⁸ Ler Zehou ti pe egzekit zizman Bondye lo fanmir Akab, i ti rankontre bann sef dan rwayonm Zida ek bann neve Akazya, ki ti dan servis lerwa, e i ti masakre zot tou.

⁹ Apre, zot ti al rod Akazya ki ti pe kasyet Samari. Zot ti anmenn li kot Zehou ki ti fer touy li. I ti fer anter li dan en tonbo, akoz zot ti dir: Apre tou i pti zanfan Zozafat, ki ti servi Bondye avek tou son leker. Dan fanmir Akazya, personn pa ti kapab vin lerwa.

Atali I Vin Larenn Zida

¹⁰ Ler Atali, manman Akazya, ti antann lanmor son garson, i ti fer detri tou bann desandan fanmir rwayal Zida.

¹¹ Me an sekre, Yehosabeat, fiy lerwa Yoranm, ti pran Zoas, garson Akazya, pour anpes li ganny touye par son bann frer; i ti al kasyet li, avek son nouris, dan en lasanm dan tanp. Alor Yohosabeat, fiy lerwa Yoranm, fanm pret Yoyada, ki ti ser Akazya, ti kasyet Zoas pour anpes Atali touy li, akoz i ti ser Akazya.

¹² Zot ti kasyet li pandan 6 an dan tanp Bondye, pandan ki Atali ti larenn pei.