2 Kronik 21 - Labib An Kreol Seselwa

¹ Kan Zozafat ti mor, zot ti anter li dan tonbo son bann zanset dan lavil David. Yoranm, son garson ti vin lerwa dan son plas.

Yoranm, Lerwa Zida

² Yoranm ti annan sis frer, zanfan Zozafat: Azarya, Yehiel, Zakari, Azarya, Mikael, ek Sefatya.

³ Zot papa, Zozafat, ti'n donn zot bann gro kado: Lobze annarzan, lobze annor ek lezot lobze valer. I ti osi donn zot bann lavil fortifye dan Zida, me i ti swazir Yoranm pour ranplas li koman lerwa, akoz i ti son premye garson.

⁴ Ler Yoranm ti'n fini byen etabli li lo rwayonm son papa, i ti masakre tou son bann frer ek serten bann sef Izraelit.

⁵ Yoranm ti annan 32 an ler i ti vin lerwa. I ti renny pandan 8 an dan Zerizalenm.

⁶ I ti fer parey tou bann lerwa Izrael, parey fanmir Akab ti'n fer, akoz i ti'n marye avek en fiy Akab. Son bann aksyon pa ti fer plezir SENYER.

⁷ Pourtan, SENYER pa ti oule detri fanmir David, akoz lalyans ki i ti'n fer avek li. Annefe, i ti'n promet ki i pou touzour annan enn parmi son desandan koman lerwa dan son plas, lo tronn Izrael.

⁸ Pandan ki Yoranm ti lerwa, bann Edomit ti revolte kont son dominasyon e etabli zot prop lerwa.

⁹ Alor, Yoranm ek son bann komandan larme avek bann kales lager ti al atak bann Edomit. Pandan lannwit, zot ti leve e bat bann Edomit ek zot bann sef ki ti'n anserkle zot.

¹⁰ Depi sa letan, ziska ozordi, bann Edomit in touzour revolte. Dan sa menm lepok, Libna osi ti revolte kont dominasyon Yoranm, akoz i ti'n abandonn SENYER, Bondye son bann zanset.

¹¹ Yoranm ti menm enstal bann landrwa sakre lo bann montanny Zida. I ti ankouraz bann zabitan Zerizalenm pour tonm dan prostitisyon e trenn Zida dan ladorasyon bann zidol.

¹² Yoranm ti ganny en let sorti kot profet Eli ki ti dir: La SENYER, Bondye ou papa David, i deklare: Akoz ou pa'n swiv legzanp ou papa, Zozafat, ni ou gran papa Asa, lerwa Zida,

¹³ me ou'n prefere fer parey bann lerwa Izrael; akoz ou'n ankouraz bann zabitan Zerizalenm ek Zida tonm dan prostitisyon parey Akab ti fer avek Izrael; akoz ou'n touy ou bann frer, bann garson ou papa ki ti menm meyer ki ou,

¹⁴ SENYER pou anvoy en gro fleo lo ou pep, lo ou bann zanfan, lo ou bann fanm e lo tou sa ki ou posede.

¹⁵ Kanta ou, ou pou ganny en maladi grav dan ou vant ki pou vin pli grav, zour an zour, ziska ou zentesten i sorti deor.

¹⁶ SENYER ti revey lespri bann Filisten, bann Arab ki ti vwazen avek bann Etyopyen, pour fer lager kont Yoranm.

¹⁷ Zot ti atak Zida e anvai pei. Zot ti depouy pale rwayal e pran tou keksoz valer. Zot ti anmenn koman prizonnyen, bann garson ek bann fanm Yoranm. Zis Akazya, son dernyen garson, ki ti reste.

¹⁸ Apre tousala, SENYER ti anvoy lo Yoranm en maladi enkirab dan son zentesten.

¹⁹ Sak zour, sa maladi ti vin deplizanpli grav e apre 2 an, son zentesten ti sorti an deor son lekor. Yoranm ti mor dan soufrans terib. An tou ka, son pep pa ti alim dife parey zot ti fer pour son bann zanset.

²⁰ Yoranm ti annan 32 an ler i ti vin lerwa. I ti rennyen pandan 8 an dan Zerizalenm. Personn pa ti regret son lanmor. I ti ganny antere dan lavil David, me pa dan kavo bann lerwa.