2 Kronik 20 - Labib An Kreol Seselwa

Lager kont Edonm: Lapriyer Zozafat

¹ Plitar, larme bann Moabit ek bann Amonit, ede par bann Maonit, ti vin fer lager kont Zozafat.

² Bann mesaze ti vin anons Zozafat: En gran larme sorti Edonm lo lot kote lanmer Mor pe vin atak ou. Aktyelman zot in ariv Hasasonn-Tamar, setadir: Enn-Gedi.

³ Zozafat ti per. I ti deside pour konsilte SENYER e donn lord pour fer en zenn partou dan pei Zida antye.

⁴ Bann Zideen sorti dan tou kote, ti rasanble dan Zerizalenm pour demann led SENYER.

⁵ Zozafat ti debout devan lasanble ki'n sorti partou dan Zida ek Zerizalenm, dan nouvo lakour tanp.

⁶ I ti dir: SENYER, Bondye nou zanset! Ou menm Bondye ki dan lesyel, ou menm ki gouvern tou rwayonm bann nasyon; ou menm ki posed lafors ek pwisans e personn pa kapab opoz ou.

⁷ Ou ti sas bann zabitan sa pei, kan ou pep, Izrael, ti ariv isi, pour ou donn sa pei pour touzour, desandan ou zanmi, Abrahanm.

⁸ Zot in vin reste la, e zot in konstri en sanktyer pour ou. Zot ti dir:

⁹ Si zanmen en maler i tonm lo nou en zour, swa par lager, swa par en lepidemi, ouswa lafanmin, nou pou vin plas nou devan sa tanp, devan ou, akoz ou prezans i la dan sa sanktyer. Dan nou maler, nou pou kriy ver ou, ou pou antann nou e ou pou sov nou.

¹⁰ Bann Amonit, bann Moabit, ek bann Edomit, ki ou pa ti les Izrael atake kan zot ti arive sorti Lezip e ki zot in evite detri,

¹¹ aprezan, la rekonpans ki nou gannyen: Zot vin sas nou dan propriyete ki ou menm, ou'n donn nou.

¹² Nou demann ou, nou Bondye: Pa in ler pour ou etabli lazistis kont zot? Nou santi nou, feb devan sa gran larme ki pe vin atak nou, nou pa konnen ki nou pou fer, me nou lizye i reste fikse lo ou.

Laviktwar pour Zida

¹³ Alor, tou bann zonm Zida ti debout devan SENYER avek zot fanm ek zot bann zanfan.

¹⁴ Alor, lespri SENYER ti vin lo Yazyel, en levit, garson Zakari, e pti zanfan Benaya, ki sorti dan fanmir Asaf.

¹⁵ Yazyel ti dir: Pep Zida ek zabitan Zerizalenm, e osi lerwa Zozafat! Ekoute! La sa ki SENYER i deklare: Pa bezwen per, pa les sa gran larme fer ou per, akoz Bondye ki pou konbat pour ou.

¹⁶ Demen, desann kont zot lennmi, ki pe mont dan direksyon Ziz, e zwenn zot dan fon vale an fas avek dezer Yerouel.

¹⁷ Zot pa bezwen atake; zis pran pozisyon e espere. Zot ava war kot SENYER i ranport laviktwar pour zot. Pep Zida ek pep Zerizalenm! Pa per. Pa bezwen per. Sorti demen e al atak zot. Mwan SENYER, mon pou avek zot.

¹⁸ Zozafat ti prosternen, son fron ater; lepep ti tonm ater parey li, devan SENYER.

¹⁹ Bann levit ki sorti dan bann Keatit ek bann Koreit ti lev debout pour loue SENYER, Bondye Izrael, avek en lavwa tre for.

²⁰ Zot ti lev granmaten pour al dan dezer Tekoa. Pandan ki zot ti pe ale, Zozafat ti debout. I ti dir: Ekout mwan, pep Zida ek zabitan Zerizalenm! Met tou zot konfyans dan SENYER zot Bondye e zot ava reste for. Fer konfyans dan bann profet e zot ava ranport laviktwar.

²¹ Apre, i ti pran konsey avek lepep. I ti swazir bann ki ti pou sante e loue SENYER. Zot ti met rob pour sa lokazyon e zot ti mars devan larme. Zot ti sante: Selebre SENYER, akoz son fidelite i pour touzour!

²² Ler bann santer ti konmans sante, loue SENYER avek aklamasyon, SENYER ti mont en latak kont bann Amonit, bann Moabit ek bann Edomit ki ti'n vin atak Zida; zot ti ganny bate.

²³ Bann Amonit ek bann Moabit ti atak bann Edomit dan rezyon montanny Seir e detri zot konpletman. Apre, kan zot ti'n fini avek bann Edomit, zot ti lager ant zot e masakre kanmarad.

²⁴ Ler bann Zideen ti ariv dan landrwa kot zot ti kapab war dezer, zot ti rod lennmi, me zot ti war zis kadav partou ater; ti napa okenn sirvivan.

²⁵ Kan Zozafat ek son bann zonm ti arive pour fer piyaz, zot ti ganny en kantite zannimo, lenz ek en gran kantite lobze valer. Ti annan telman bokou, ki zot pa ti kapab anmennen. Zot ti pran trwa zour pour fini ranmase.

²⁶ Katriyenm zour, zot ti rasanble dan vale Beraka, pou remersye SENYER. Pour sa rezon, sa landrwa, ziska ozordi, i apel Beraka, savedir, remersiman.

²⁷ Apre sa, tou bann zonm ki sorti Zida ek Zerizalenm, avek Zozafat devan, ti retourn Zerizalenm dan lazwa, akoz SENYER ti'n delivre zot kont zot lennmi.

²⁸ Zot ti antre Zerizalenm dan direksyon tanp SENYER, akonpannyen avek lanmizik, laarp, lir, ek tronpet.

²⁹ Kan tou bann rwayonm ti tande ki mannyer SENYER in konbat bann lennmi Izrael, zot ti ganny gran lafreyer pour Bondye.

³⁰ Rwayonm Zozafat ti trankil, e Bondye ti donn li lape lo tou son bann frontyer.

Lafen Renny Zozafat

³¹ Zozafat ti vin lerwa Zida ler i ti annan 35 an. I ti lerwa dan Zerizalenm pandan 25 an. Son manman ti apel Azouba, fiy Sili.

³² Zozafat ti swiv legzanp Asa, son papa, e i ti fer tou sa ki fer plezir SENYER.

³³ Pourtan, i pa ti fer disparet bann landrwa sakre, de sort ki lepep pa ti servi Bondye zot zanset avek tou zot leker.

³⁴ Tou lezot aksyon Zozafat, premye ziska dernyen, in ganny ekri dan Liv Memwar Yehou, garson Hanani. Tousala in ganny anrezistre dan Liv bann Lerwa Izrael.

³⁵ Dan serten moman son lavi, Zozafat, lerwa Zida ti'n asosye li avek Akazya, lerwa Izrael, ki ti pe mal azir.

³⁶ Ansanm, zot ti'n konstri bato pour al Tarsis. Zot ti konstri bato dan por Esyonn-Geber pour al Tarsis.

³⁷ Alor, profet Eliezer, garson Dodava sorti Maresa, ti profetiz kont Zozafat. I ti dir: Akoz ou'n asosye ou avek Akazya, SENYER pou detri tou sa ki ou'n konstri. Annefe, tou bato ti koule, zot pa ti reisi ariv Tarsis.