2 Kronik 19 - Labib An Kreol Seselwa

Profet I Reprimann Zozafat

¹ Zozafat ti retourn se li Zerizalenm, sen e sof.

² Profet Yehou, garson Hanani, ti vin zwenn li. I ti dir lerwa Zozafat, “Eski ou devre port sekour en move dimoun? Eski ou devre kontan en dimoun ki deteste SENYER? Akoz sa, SENYER i ankoler avek ou.

³ Pourtan i annan bon keksoz ki ou'n fer: Ou'n fer disparet dan pei bann poto sakre Asera e ou'n deside servi Bondye avek tou ou leker.”

⁴ Zozafat ti enstal li Zerizalenm. Apre, i ti rekonmans vwayaze parmi zabitan son prop pei, depi Berseba ziska dan rezyon montanny Efraim. I ti fer zot retourn ver SENYER, Bondye zot zanset.

⁵ I ti apwent bann ziz dan sak lavil fortifye dan rwayonm Zida.

⁶ I ti dir zot, “Fer atansyon dan tou sa ki zot fer. Rann zizman ki zis, fer li non pa pour zonm, me pour SENYER. I ava avek zot ler zot rann zizman.

⁷ Mon swete ki zot annan gran respe pour SENYER. Azir byen dan tou sirkonstans, akoz dan SENYER nou Bondye, napa ni lenzistis, ni preferans, ni koripsyon.”

⁸ Dan Zerizalenm osi, Zozafat ti apwent bann levit, bann pret, ek bann sef fanmir Izraelit, pour rann lazistis lo non SENYER e regle bann dispit.

⁹ I ti ordonn zot, “Dan tou, azir avek respe pour SENYER, avek fidelite e avek tou ou leker.

¹⁰ Kan en ka i ganny anmenn devan ou, par enn ou frer, sorti dan son lavil konsernan en krim oubyen laplikasyon lalwa, komannman, regleman, ou koutim, ou ava averti li pour pa rann ou koupab devan SENYER. SENYER pa pou pran lakoler kont ou, ni kont ou frer.

¹¹ Gran-Pret Amaria ava gid ou dan bann zafer ki konsern SENYER, e Zebadya, gouverner dan rwayonm Zida, ava ou konseye pour bann zafer lerwa. Bann levit ava asiste ou dan ladministrasyon. Pran kouraz e travay for. SENYER i avek sa enn ki azir byen.”