2 Kronik 17 - Labib An Kreol Seselwa

Zozafat, Lerwa Zida

¹ Zozafat ti vin lerwa dan plas son papa Asa. I ti ranforsi son pozisyon kont Izrael.

² I ti plas son larme dan tou bann lavil fortifye dan Zida, i ti plas son troup dan tou bann lavil Efraim ki son papa Asa ti'n kaptire.

³ SENYER ti avek Zozafat akoz i ti swiv mannyer son zanset David ki ti servi SENYER dan konmansman son renny. I pa ti ador bann Baal.

⁴ I ti servi Bondye, son papa e obei son bann komannman, me pa parey Izrael ti pe fer.

⁵ SENYER ti byen etabli son pouvwar rwayal. Tou zabitan Zida ti anmenn bann kado pour Zozafat, de sort ki i ti vin byen ris e ganny bokou respe.

⁶ I ti servi SENYER avek tou son leker, e fer disparet dan Zida, bann landrwa sakre ek bann poto Asera.

⁷ Dan son trwazyenm lannen koman lerwa, Zozafat ti anvoy son bann sef Benn-Hail, Abdyas, Zakari, Netaneel, ek Mise, pour ansenny bann zabitan lavil Zida.

⁸ Avek zot, i ti osi anvoy nef levit: Semaya, Netanya, Zebadya, Asael, Semiramot, Zonatan, Adoniya, Tobiya ek Tob-Adoniya. Ti osi annan de pret: Elisama ek Zoranm.

⁹ Avek liv lalwa SENYER dan lanmen, zot ti ansenny lepep dan tou bann lavil Zida.

Lafors Militer Zozafat

¹⁰ Tou bann rwayonm otour rwayonm Zida ti annan gran lafreyer pour SENYER; zot pa ti oze fer lager kont Zozafat.

¹¹ Bann Filisten ti anmenn kado pour li, e gran kantite lobze annarzan pour zot taks. Bann Arab osi ti anmenn 7,700 mouton ek 7,700 kabri.

¹² Alor, Zozafat ti vin deplizanpli for. I ti fer konstri dan Zida bann lavil fortifye ek bann lavil rezerv pour provizyon.

¹³ I ti etabli bann lavil pour provizyon dan Zida, an gran kantite. I ti plas osi en kantite gerye vayan dan Zerizalenm.

¹⁴ La resansman par fanmir: Dan tribi Zida ti annan komandan 1,000, komandan Adna avek 300,000 konbatan elit.

¹⁵ Koman son asistan, ti annan sef Yoanann, komandan 280,000 zonm.

¹⁶ Osi koman asistan, ti annan Amasya, garson Zikri, en volonter dan servis SENYER, komandan 200,000 vayan gerye.

¹⁷ Dan Benzamen: Eliada, en vayan konbatan, avek 200,000 gerye arme avek fles ek boukliye.

¹⁸ Koman asistan, ti annan Yehozabad, komandan 180,000 zonm arme pour konba.

¹⁹ Sa ti bann gerye ki ti dan servis lerwa dan Zerizalenm, san kont bann ki ti'n ganny stasyonnen dan bann lavil fortifye partou dan Zida.