2 Kronik 16 - Labib An Kreol Seselwa

Asa I Al Lager kont Baasa, Lerwa Izrael

¹ Dan trannsizyenm lannen ki Asa ti lerwa Zida, Baasa lerwa Izrael, ti atak Zida. I ti fer konstri en miray pour protez Rama, pour li anpes Asa ek okenn son bann dimoun pas par la.

² Asa ti pran larzan ek lor dan trezor tanp SENYER e osi son trezor rwayal ki i ti anvoy Damas kot Benn-Hadad, lerwa Siri, avek sa mesaz:

³ Annou fer en lalyans ansanm parey mon papa ek ou papa ti fer. La mon pe anvoy ou en kado, larzan ek lor. Al kas lalyans ki egziste avek Baasa, lerwa Izrael pour ki i retir son bann gerye lo mon teritwar.

⁴ Benn-Hadad ti fer sa ki Asa ti demann li. I ti anvoy bann zofisye son larme atak bann lavil Izrael. Zot ti pran Iyonn, Dann ek Abel-Maim ek tou bann lavil rezerv provizyon dan Neftali.

⁵ Kan Baasa ti antann sa, i ti fer aret konstriksyon pour protez Rama.

⁶ Lerwa Asa ti pran bann zonm dan Zida e fer zot al pran tou ros ek dibwa konstriksyon ki Baasa ti'n prepare pour Rama. Zot ti servi sa materyo pour konstri miray proteksyon otour zot prop lavil, Geba ek Mispa.

⁷ Dan sa letan, profet Anani ti al war lerwa Asa. I ti dir li: Akoz ou'n met ou konfyans dan lerwa Siri olye lo SENYER, ou Bondye; larme Siri in sape anba ou kontrol.

⁸ Eski bann Etyopyen ek bann Libyen, pa ti annan en gran larme avek en gran kantite kales lager ek bann kavalye? Pourtan, SENYER, pa ti livre zot dan ou lanmen, zis akoz ou ti met ou konfyans dan li?

⁹ SENYER i pronmnen son regar partou lo later pour soutenir bann ki zot leker i konpletman atase avek li. Me la, ou'n azir dan en fason stipid e apartir sa moman, ou bann lennmi pou deklar lager kont ou.

¹⁰ Asa ti ankoler avek sa profet; i ti fer ansenn li dan prizon. I ti ankoler akoz parol profet Hanani. Dan sa letan i ti osi vin kriyel anver serten dimoun dan pei.

Lafen Renny Lerwa Asa

¹¹ Bann aksyon Asa in ganny anrezistre dan Liv Memwar bann lerwa Zida ek Izrael.

¹² Dan trantnevyenm lannen son renny, i ti ganny en maladi grav dan son de lipye. Malgre sa, i pa ti rod led SENYER, me i ti prefere al rod led bann geriser.

¹³ Asa ti mor dan karanteennyenm lannen son renny.

¹⁴ I ti ganny antere Zerizalenm, dan en kavo ki li menm ti'n fer fouye dan ros. Zot ti depoz son lekor lo en ta prodwi aromatik ki bann anbonmer i fer e bril en gran kantite lansan an son loner.